“Alla ta’ Abraham, Alla ta’ Iżakk, Alla ta’ Ġakobb” (ara Eż 3:6).
B’dan l-isem int dhert quddiem Mosè,
meta wrejtu kif int ridt teħles lill-poplu tiegħek mill-jasar tal-Eġittu.
Alla ta’ Abraham, Alla ta’ Iżakk, Alla ta’ Ġakobb:
Alla li jidħol f’patt mal-bniedem;
Alla li jintrabat b’patt ta’ mħabba fidila, għal dejjem,
Ħanin u kollu mogħdrija
ma’ kull bniedem u ma’ kull poplu maħqur.
“Jien ħarist u rajt it-tbatija tal-poplu tiegħi […] smajt il-karba tagħhom […] u għaraft l-uġigħ tagħhom” (Eż 3:7).
Alla tal-uċuħ u tal-ismijiet.
Alla ta’ kull wieħed u waħda mit-tliet mija u ħamsa u tletin ruħ immassakrati hawn fl-24 ta’ Marzu 1944,
li l-fdalijiet tagħhom jistrieħu f’dawn l-oqbra.
Int taf l-uċuħ u l-ismijiet tagħhom.
Ilkoll, anki dawk it-tnax li baqgħu moħbija għalina; għalik ħadd mhu moħbi.
Alla ta’ Ġesù, Missierna li int fis-smewwiet.
Grazzi għalih, il-Mislub li qam,
aħna nafu li ismek
“Alla ta’ Abraham, Alla ta’ Iżakk, Alla ta’ Ġakobb”
ifisser li m’intix Alla tal-mejtin imma tal-ħajjin (ara Mt 22:32),
li l-patt tiegħek ta’ mħabba fidila hu aqwa mill-mewt
u hu garanzija ta’ qawmien.
Agħmel, o Mulej, li f’dan il-post
ikkonsagrat b’tifkira ta’ dawk li mietu għal-libertà u l-ġustizzja,
neħilsu mill-ktajjen tal-egoiżmu u tal-indifferenza
u mill-għollieq jaqbad ta’ dan il-mafkar
nisimgħu fis-sikta l-isem tiegħek:
“Alla ta’ Abraham, Alla ta’ Iżakk, Alla ta’ Ġakobb”,
Alla ta’ Ġesù,
Alla tal-ħajjin.
Amen.
miġjub mit-Taljan għall-Malti minn Francesco Pio Attard