|
Għeżież ħuti, Illum irrid nerġa’ ntenni li l-persuni anzjani kienu dejjem protagonisti fil-Knisja u hekk għadhom sallum. U llum aktar minn qatt qabel, il-Knisja trid tagħti eżempju lis-soċjetà kollha li minkejja n-nuqqas ta’ saħħa li l-xjuħija ġġib magħha, xi drabi b’mod serju ħafna, l-anzjani huma dejjem importanti, anzi indispensabbli. Huma jġorru fihom it-tifkira u l-għerf tal-ħajja biex jgħadduhom lill-oħrajn, u jipparteċipaw b’mod sħiħ fil-missjoni tal-Knisja. Niftakru li f’għajnejn Alla, il-ħajja umana dejjem tikkonserva l-valur tagħha li jmur ’l hemm minn dak kollu li b’xi mod jista’ jiddiskriminha. Mis-seklu XX ‘l hawn il-ħajja tal-bniedem qiegħda dejjem aktar titwal u dan ifisser li qed jiżdied in-numru ta’ persuni li jiffaċċaw sitwazzjonijiet ta’ mard fejn tonqos is-saħħa fiżika u fejn spiss jista’ ikun hemm deterjorament tal-kapaċità mentali. Dawn il-patoloġiji qed jitolbu lill-oqsma soċjali-sanitari biex jinvestu kemm fir-riċerka kif ukoll fl-għajnuna u fil-kura li tingħata kemm f’ħdan l-istrutturi ta’ assistenza soċjali kif ukoll fi ħdan il-familja, li tibqa’ l-post privileġġat fejn wieħed iħoss li għandu min jilqgħu u min hu qrib tiegħu. Hu importanti li jkun hemm is-sapport b’għajnuniet u sevizzi adatti mogħtija b’rispett lejn id-dinjità, l-identità u l-ħtiġijiet tal-persuna li jkollha bżonn l-għajnuna, iżda jrid ikun hemm ukoll rispett lejn il-familjari u l-operaturi professjonali li jgħinuha. U dan jista’ jseħħ biss jekk ikun hemm fiduċja u tinbena relazzjoni ta’ rispett lejn xulxin. Il-kura mgħixa b’dan il-mod issir esperjenza rikka ħafna, kemm professjonalment kif ukoll umanament. Iżda jekk ma tkunx mgħixha b’dan il-mod, issir dejjem aktar sempliċiment protezzjoni fiżika mogħtija b’ċertu kesħa. Għalhekk tinduna kemm hu neċessarju l-impenn fl-assistenza fejn flimkien mal-mudell tradizzjonali biomediku jkun hemm l-ispazju għad-dinjità u l-libertà, ‘l bogħod mill-għeluq u mis-silenzju; minn dik it-tortura tas-silenzju! Ħafna drabi is-silenzju jinbidel f’tortura. Il-persuni li jkollhom bżonn l-għajnuna spiss isibu ruħhom ċirkundati minn dan l-għeluq u s-silenzju. Huwa f’din il-prospettiva li nixtieq nisħaq fuq l-importanza tal-aspett reliġjuż u spiritwali. Din id-dimensjoni tibqa’ vitali anki meta l-kapaċitajiet tal-moħħ jonqsu jew jintilfu. Dan ifisser li jrid ikun hemm approach pastorali partikulari biex wieħed jakkumpanja l-ħajja reliġjuża tal-persuni anzjani li jbatu minn forom differenti ta’ patolġiji deġenerattivi gravi, ħalli moħħhom u qalbhom ma jinterrompux id-djalogu r-relazzjoni ma’ Alla. Nixtieq intemm billi nsellem lill-anzjani. Għeżież ħbieb, intom mhux biss dawk li tilqgħu l-messaġġ tal-Evanġelju, imma l-Magħmudija tagħtikom id-dritt li tkunu dejjem ħabbara ta’ dan il-messaġġ. Kull ġurnata intom tistgħu tgħixu bħala xhieda tal-Mulej, fil-familji tagħkom, fil-parroċċa u kulfejn tkunu u hekk twasslu lil ħafna, speċjalment liż-żgħażagħ, biex jagħrfu lil Kristu u ‘l-Evanġelju tiegħu. Ftakru: kienu żewġ anzjani li għarfu lil Ġesu fit-tempju u li ħabbruh b’ferħ u b’tama. Nitlob lill-Madonna tieħu ħsiebkom u nirringrazzjakom minn qalbi għat-talb tagħkom. Issa, ilkoll flimkien nitolbu lill-Madonna għal dawk li jaħdmu fil-qasam tas-saħħa, għall-morda, għall-anzjani, u mbagħad nirċievu l-barka. (Sliem għalik Marija…..) Miġjub għall-Malti minn Vivienne Attard.
|