Għeżież ħuti, il-jum it-tajjeb!
Il-Liturġija ta’ dar-raba’ Ħadd tal-Għid tissokta bl-għan li tgħinna niskopru mill-ġdid l-identità tagħna bħala dixxipli tal-Mulej Irxuxtat. Fl-Atti tal-Appostli, Pietru jiddikjara bla ħabi li l-fejqan tal-magħtub, li kien wettaq, u li dwaru kienet qed titkellem Ġerusalemm kollha, kien sar f’isem Ġesù, għax “fih biss hemm is-salvazzjoni” (4,12). F’dak ir-raġel imfejjaq hemm kull wieħed u waħda minna – dak ir-raġel hu l-figura tagħna: aħna lkoll ninsabu hemmhekk-, hemm il-komunitajiet tagħna: kull wieħed u waħda minna jista’ jfieq mill-bosta għamliet ta’ mard spiritwali li għandu – l-ambizzjoni, l-għażż, il-kburija – jekk jaċċetta bil-fiduċja li jqiegħed l-eżistenza tiegħu f’idejn il-Mulej Irxuxtat. “F’isem Ġesù Kristu n-Nażżarenu – jafferma Pietru – dan jinsab quddiemkom imfejjaq” (v. 10). Iżda min hu dan Kristu li jfejjaq? Fiex jikkonsisti li tkun imfejjaq minnu? Minn xiex ifejjaqna? U b’liema atteġġjamenti?
It-tweġiba għal dawn il-mistoqsijiet kollha nsibuha fl-Evanġelju tal-lum, fejn Ġesù jgħid: “Jiena r-ragħaj it-tajjeb. Ir-ragħaj it-tajjeb jagħti ħajtu għan-nagħaġ tiegħu” (Ġw 10,11) . Din l-awtopreżentazzjoni ta’ Ġesù ma nistgħux nirriduċuha għal xi seħer emottiv, mingħajr ebda effett konkret! Ġesù jfejjaq minħabba li hu ragħaj li jagħti l-ħajja. Hu u jagħti ħajtu għalina, Ġesù jgħid lil kull wieħed u waħda minna: “ħajtek tiswa tant għalija, li biex insalvaha nagħti lili nnifsi kollni kemm jien”. U hija propju din l-offerta ta’ ħajtu li tagħmlu Ragħaj Tajjeb per eċċellenza, dak li jfejjaq, dak li lilna jippermettilna ngħejxu ħajja sabiħa u għammiela.
It-tieni parti tal-istess paġna evanġelika tgħidilna liema huma l-kundizzjonijiet li bihom Ġesù jista’ jfejjaqna u li bihom Hu jista’ jagħmlilna ħajjitna ferrieħa u għammiela: “Jien hu ir-ragħaj it-tajjeb – jgħid Ġesù – nagħraf lin-nagħaġ tiegħi u huma jagħrfu lili, kif Missieri jagħraf lili u jien nagħraf lill-Missier (vv 14-15). Ġesù mhux qed jitkellem dwar għarfien intellettiv, le, imma dwar relazzjoni personali, ta’ preferenza, ta’ tenerezza reċiproka, rifless tal-istess relazzjoni intima ta’ mħabba bejnu u bejn il-Missier. Dan hu l-atteġġjament li bih tkun mitmuma r-relazzjoni ħajja ma’ Ġesù: li nħalluh isir jafna. Ma ningħalqux fina nfusna, ninfetaħ għall-Mulej, ħalli Hu jsir jafni. Hu attent ħafna għal kull wieħed u waħda minna, jaf il-fond ta’ qalbna: jaf il-preġji u d-difetti tagħna, il-proġetti li wettaqna u t-tamiet li baqgħu bla temma. Imma jaċċettana hekk, kif aħna, bid-dnubiet tagħna wkoll, biex ifejjaqna, biex jaħfrilna, imexxina bl-imħabba, sabiex inkunu nistgħu nimxu fil-mogħdijiet imħarbta mingħajr ma nitilfu t-triq. Hu jakkkumpanjana.
Min-naħa tagħna, aħna msejħin biex insiru nafu lil Ġesù. Dan jimplika laqgħa miegħu, laqgħa li tqanqal ix-xewqa li nimxu warajh billi nabbandunaw l-atteġġjamenti awtoreferenzjali ħallli nibdew mexjin f’toroq ġodda, li jindikalna Kristu nnifsu, u miftuħin għall-ixqfa vasti. Meta fil-komunitajiet tagħna tibred ix-xewqa li ngħejxu r-relazzjoni ma’ Ġesù, li nisimgħu leħnu u nimxu warajh fedelment, hu inevtiabbli li nibdew ninħakmu minn modi oħra ta’ ħsieb u ngħejxu ħajja li ma tkunx koerenti mal-Evanġelju.
Marija, Ommna tgħinna inkabbru dejjem aktar bil-qawwa r-relazzjoni tagħna ma’ Ġesù. Tiftaħna għal Ġesù sabiex Hu jidħol fina. Relazzjoni aktar b’saħħitha: Hu qam. B’hekk inkunu nistgħu nimxu warajh tul ħajjitna kollha. F’dan il-Jum Dinji ta’ Talb għall-Vokazzjonijiet, Marija tinterċedi għalina biex ikunu ħafna dawk li jwieġbu bil-ġenerożità u l-perseveranza lill-Mulej li jsejhilhom u jħallu kollox biex ixerrdu s-Saltna tiegħu.
Wara r-Regina Coeli:
Għeżież ħuti,
Jien imħasseb ħafna minħabba dak li qed jiġri f’dal-ġranet fin-Nikaragwa, fejn, wara protesta soċjali, inqala’ l-ġlied li ħalla wkoll xi vittmi. Nesprimi l-qrubija tiegħi bit-talb lejn dak il-pajjiż u ningħaqad mal-Isqfijiet fit-talba biex tieqaf kull vjolenza, ikun evitat it-tixrid tad-demm u l-kwistjonijiet li hemm, jissolvew paċifikament u b’sens ta’ responsabbiltà.
Kif kont qed ngħid ftit ilu, f’dan ir-raba’ Ħadd tal-Għid, fil-Knisja kollha qed niċċelebraw il-Jum Dinji tat-Talb għall-Vokazzjonijiet. It-tema hi: Isma’, iddixxerni, għejx is-sejħa ta-Mulej. Niżżu ħajr lill-Mulej għax għadu jqanqal fil-Knisja stejjer ta’ mħabba lejn Ġesù Kristu, għall-ġieħ u l-glorja tiegħu u għas-servizz tal-aħwa. Illum, b’mod partikolari, nirringrazzjawh għas-saċerdoti l-ġodda li jien ordnajt ftit tal-ħin ilu fil-Bażilika ta’ San Pietru. U nitolbu ‘l-Mulej li jibgħat ħafna ħaddiema tajba biex jaħdmu fl-għalqa tiegħu, kif ukoll biex ikattar il-vokazzjonijiet għall-ħajja konsagrata u għaż-żwieġ nisrani. Kif kont qed ngħid, illum ordnajt 16-il saċerdot. Minnhom erba’ ġew hawn biex isellmulkom u jagħtukom il-barka flimkien miegħi. (Erba’ saċerdoti novelli ħarġu fit-tieqa ħdejn il-Papa).
Insellem minn qalbi lilkom ilkoll Rumani u pellegrini li ġejtu mill-Italja u minn tant pajjiżi oħra, partikolarment lil dawk li ġew minn Setúbal, minn Lisbona, minn Krakovja, u lis-sorijiet ‘Pie Discepole del Divin Maestro’ li ġew mill-Korea.
Insellem lill-pellegrini minn Castiglione d’Adda, Torralba, Modica, Cremona u Brescia, il-kor parrokkjali min Ugovizza; liż-żgħażagħ tal-Griżma minn Gazzaniga, Pollenza u Cisano sul Neva.
Nawgura lil kulħadd il-Ħadd it-tajjeb; u, jekk jogħġobkom, tinsewx titolbu għalija. Il-pranzu t-tajjeb u arrivederci!
Miġjub għall-Malti mit-Taljan minn Joe Huber