Għeżież ħuti, l-għodwa t-tajba! Il-Vanġelu ta' dan il-Ħadd, it-tielet Ħadd tal-Għid, hu dak tad-dixxipli ta' Għemmaws (Luqa 24, 13-35). Dawn kienu żewġ dixxipli ta' Ġesù, li, wara l-mewt tiegħu u wara li għadda s-Sibt, iħallu Ġerusalemm biex imorru lejn il-villaġġ bl-isem ta' Għemmaws, qalbhom sewda u skuraġġiti. Tul it-triq, Ġesù rxuxtat jingħaqad magħhom imma huma ma jagħrfuhx. Meta rahom dasqstant qalbhom sewda, l-ewwel jgħinhom jifhmu li l-passjoni u l-mewt tal-Messija kienu diġà fil-pjan t'Alla u mħabbrin fl-Iskrittura Mqaddsa, u b'hekk reġa' ħeġġeġ in-nar tat-tama fi qlubhom. Dak il-ħin id-dixxipli ħassew ġibda straordinarja lejn dak il-bniedem misterjuż u stednuh jibqa' magħhom għal dak il-lejl. Ġesù aċċetta u daħal magħhom id-dar tagħhom. U meta kienu mal-mejda u Hu bierek il-ħobż u qasmu, għarfuh, imma Hu għeb minn quddiemhom, u ħalliehom mistgħaġbin. Wara li kienu ġew imdawlin mill-Kelma, kienu għarfu lil Ġesù Rxoxt mill-qsim tal-ħobż, sinjal ġdid tal-preżenza tiegħu. U mill-ewwel ħassew il-bżonn li jmorru lura lejn Ġerusalemm, biex iwasslu l-esperjenza li kienu għexu, lid-dixxipli l-oħra, biex jgħidulhom li kienu ltaqgħu ma' Ġesù u li kienu għarfuh mill-ġest tal-qsim tal-ħobż. It-triq ta' Għemmaws għalhekk, issir is-simbolu tal-mixja tal-fidi tagħna: l-Iskrittura u l-Ewkaristija huma l-elementi indispensabbli biex niltaqgħu mal-Mulej. Aħna wkoll, ta' spiss, naslu għall-Quddiesa tal-Ħadd bil-preokkupazzjonijiet tagħna, bid-diffikultajiet u d-delużjonijiet... Kultant il-ħajja tferina u aħna mmorru bil-geddum lejn l-”Għemmaws” tagħna, u nagħtu daharna lill-pjan ta' Alla. Nitbegħedu minnu. Imma tilqagħna l-Liturġija tal-Kelma: Ġesù jispjegalna l-Iskrittura u jerġa' jħeġġeġ fi qlubna n-nar tal-fidi u tat-tama, waqt li fit-Tqarbin itina l-qawwa. Il-Kelma t'Alla, l-Ewkaristija. Naqraw kuljum silta mill-Vanġelu u l-Ħadd immorru nirċievu l-Ewkaristija, nirċievu lil Ġesù. Hekk ġara mad-dixxipli ta' Għemmaws: semgħu l-Kelma, ħadu sehem fil-qsim tal-ħobż u minn qalbhom sewda u telliefa kif kienu qabel, imtlew bil-ferħ. Għeżież ħuti, il-Kelma t'Alla u l-Ewkaristija dejjem jimlewna bil-ferħ. Ftakruh sew dan! Meta inti mdejjaq, aqbad il-Kelma t'Alla. Meta tħossok bla kuraġġ, aqbad il-Kelma t'Alla u mur il-Quddiesa tal-Ħadd biex titqarben, biex tieħu sehem fil-misteru ta' Ġesù. Il-Kelma t'Alla, l-Ewkaristija, jimlewna bil-ferħ. Bl-interċessjoni ta' Marija Santissma nitolbu biex kull nisrani, hu u jgħix mill-ġdid l-esperjenza tad-dixxipli ta' Għemmaws, speċjalment fil-quddiesa tal-Ħadd, jiskopri mill-ġdid il-grazzja tal-laqgħa mal-Mulej li tittrasforma, il-laqgħa mal-Mulej irxuxtat li hu dejjem magħna. Wara li nkunu tlifna t-triq dejjem hemm Kelma t'Alla li treġġgħana lura lejn dik it-tajba u fl-għeja tagħna u d-delużjonijiet dejjem hemm Ħobż maqsum li jgħinna nimxu 'l quddiem fil-mixja tagħna.
Wara r-Regina Coeli: APPELL
Għeżież ħuti, Nixtieq nistedinkom tqegħedu fi ħdan il-Madonna s-sitwazzjoni fl-Ukranja, fejn it-tensjonijiet mhemmx li jieqfu. Is-sitwazzjoni hija gravi. Flimkien magħkom nitlob għall-vittmi ta' dawn il-jiem u nitlob lill-Mulej biex jirfed il-qlub b'sentimenti ta' paċifikazzjoni u fratellanza. Nitolbu wkoll għall-mejtin li ħalliet it-traġedja tal-muntanja li ftit tal-jiem ilu laqtet villaġġ fl-Afganistan. Alla li jista' kollox, li jaf isem kull wieħed u waħda minnhom, jilqagħhom fil-paċi tiegħu u lil dawk li ħesluha, jtihom il-qawwa li jibqgħu mexjin bl-għajnuna ta' dawk li qed jitħabtu biex itaffulhom it-tbatijiet tagħhom.
* * * Għeżież ħuti, Illum huwa l-Jum Nazzjonali tal-Università Kattolika tal-Qalb ta' Ġesù, bit-tema: “Maż-żgħażagħ, il-protagonisti tal-futur”. Tema sabiħa ħafna! Kemm hawn żgħażagħ hawnhekk illum? Kemm? Intom il-protagonisti tal-futur! Intom dħaltu fil-futur, fl-istorja. Din hi t-tema tallum. Nitlob għal din l-università kbira biex tibqa' fidila għall-missjoni oriġinarja tagħha u tkun aġġornata mad-dinja tallum. Jekk il-Bambin irid ftit żmien ieħor se mmur inżur il-fakultà tal-Mediċina u l-Kirurġija tal-Poliklinika Gemelli, hawn f'Ruma, li tagħlaq 50 sena mit-twaqqif tagħha u hija parti mill-Università Kattolika tal-Qalb ta' Ġesù. Insellem lilkom għeżież fidili Rumani u pellegrini! B'mod partikolari nsellem lill-fidili tad-djoċesi ta' Parma mmexxijin mill-Isqof Enrico Solmi, flimkien ma bosta żgħażagħ li qed jagħmlu l-mixja bl-isem ta' “il-Konċilju taż-Żgħażagħ”. Isem sabiħ! Kuraġġ! Il-mixja t-tajba lil kulħadd! Insellem lill-assoċjazzjoni “Meter” li għal kważi għoxrin sena ilha tiġġieled kontra l-abbuż tal-minuri. Grazzi għall-impenn tagħkom! Insellem ukoll lil-parteċipanti li qed jieħdu sehem fil-”Mixja għall-Ħajja”, li din is-sena għandha bixra internazzjonali u ekumenika. Lill-”Meter” u lill-parteċipanti fil-”Mixja għall-Ħajja” awguri sbieħ u kuraġġ, ibqgħu aħdmu fuq dan! Insellem lill-assoċjazzjonijiet “Relais Sourds” minn Lyons fi Franza. “Il Portico” u “ Jardin de los niños” mill-Arġentina, is-Sorijiet ta' Santa Dorotea; il-fidili Melkiti mill-Awstralja u dawk minn Alcorcón fi Spanja; iż-żgħażagħ Pollakki minn Rybnik, segwaċi ta' Piergiorgio Frassati, il-kor u l-banda ta' Lenola, il-korijiet tad-djoċesi ta' Udine u l-assoċjazzjonijiet tal-Camperisti Taljani. Nirringrazzja wkoll għall-preżenza tagħhom lil tant gruppi mill-parroċċi u gruppi ta' żgħażagħ! Lilkom ilkoll nawguralkom il-Ħadd it-tajjeb. L-ikla t-tajba u arrivederci!
Miġjub għall-Malti minn Joe Huber. |