Għeżież ħuti, il-jum it-tajjeb!
L-Evanġelju tal-lum jeħodna fiċ-Ċenaklu. Waqt l-Aħħar Ċena, qabel ma’ mar għall-passjoni u l-mewt fuq is-salib, Ġesù jwiegħed lill-Appostli d-don tal-Ispirtu s-Santu, li kellu jgħallimhom u jfakkarhom f’dak li Hu kien qal lill-komunità tad-dixxipli. Jgħidha Ġesù nnifsu: «Il-Paraklitu, l-Ispirtu s-Santu li l-Missier se jibgħat f’ismi, jgħallimkom kollox u jfakkarkom dak kollu li għidtilkom» (14,26). Jgħallem u jfakkar. Dan jagħmel l-Ispirtu s-Santu fi qlubna.
Fil-ħin li kien sejjer lura għand il-Missier, Ġesù jħabbar il-miġja tal-Ispirtu s-Santu li, qabel kollox, se jgħallem lid-dixxipli jifhmu dejjem aħjar l-Evanġelju, jilqugħ fl-eżistenza tagħhom u jtuħ il-ħajja u jqegħduh fis-seħħ bix-xhieda tagħhom. Filwaqt li kien se jafda f’idejn l-Appostli – li appuntu tfisser ‘mistednin’ – il-missjoni li jwasslu l-aħbar tal-Evanġelju fid-dinja kollha, Ġesù jwiegħed li huma ma kienux se jibqgħu waħedhom: se jkun magħhom l-Ispirtu s-Santu, il-Paraklitu, li se jkun ħdejhom anzi se jkun fihom, biex jiddefendihom u jsostnihom. Ġesù jmur lura għand il-Missier imma jkompla jakkumpanja u jgħallem lid-dixxipli tiegħu permezz tad-don tal-Ispirtu s-Santu.
It-tieni aspett tad-don tal-Ispirtu s-Santu hu li jgħin lill-Appostli jiftakru kliem Ġesù. L-Ispirtu għandu x-xogħol li jerġa jqajjem il-memorja, ifakkar kliem Ġesù. L-Imgħallem Divin diġà wassal dak lkollu li kellu ħsieb jafda lill-appostli: biH, il-Verb inkarnat, ir-rivelazzjoni waslet fil-milja tagħha. L-Ispirtu jfakkar it-tagħlim ta’ Ġesù fiċ-ċirkostani differenti u konkreti tal-ħajja, biex ikun jista’ jitqiegġed fis-seħħ. Dan hu propju dak li għadu jiġri fil-Knisja llum, immexxija mid-dawl u l-qawwa tal-Ispirtu s-Santu, biex tkun tista’ twassal lil kulħadd ir-rigal tas-salvazzjoni, jiġifieri l-imħabba u l-ħniena t’Alla. Per eżempju, meta f’dawn il-ġranet tkunu qed taqraw silta mill-Evanġelju – kif tajtkom parir tagħmlu jien – itolbu lill-Ispirtu s-Santu: “Għinni nifhem u niftakar dan il-kliem ta’ Ġesù. Imbagħad naqraw il-pass, kuljum. Imma l-ewwel ngħidu dik it-talba lill-Ispirtu s-Santu f’qalbna: “Għinni niftakar u għinnni nifhem”.
Aħna m’aħniex waħedna: Ġesù jinsab magħna, f’nofsna, ġewwa fina! Il-preżenza l-ġdida tiegħu fl-istorja sseħħ permezz tad-don tal-Ispirtu s-Santu, li biH hu possibbli nibnu relazzjoni, rabta ħajja, miegħU, mal-Imsallab Irxuxtat. L-Ispirtu mxerred ġewwa fina bis-Sagramenti tal-magħmudija u tal-Konfermazzjoni, jaħdem fina. Hu jmexxi l-ħsieb tagħna, l-imġieba, jgħinna nagħżlu t-tajjeb mill-ħażin; jgħinna nipprattikaw il-karità ta’ Ġesù, l-għotja tiegħu innifsu lill-oħrajn, speċjalment lil min hu l-aktar fil-bżonn.
M’aħniex waħedna! Is-sinjal tal-preżenza tal-Ispirtu s-Santu hija wkoll il-paċi li Ġesù jagħti lid-dixxipli tiegħu: «Intikom il-paċi tiegħi» (v. 27). Hi (paċi) differenti minn dik li aħna l-bnedmin nawguraw lil xulxin, jew li nippruvaw nagħmlu. Il-paċi ta’ Ġesù tgelgel mir-rebħa fuq id-dnub, fuq l-egoiżmu li jżommuna milli nħobbu lil xulxin bħal aħwa. Hija d-don ta’ Alla u sinjal tal-preżenza tiegħu. Kull dixxiplu li llum hu msejjaħ biex jimxi wara Ġesù billi jġorr salibu, tinżel fih il-paċi tal-Imsallab Irxuxtat, biċ-ċertezza tar-rebħa tiegħu u bl-istennija tal-miġja tal-aħħar tiegħu.
Il-Verġni Marija tgħinna nilqgħu bil-ħlewwa lill-Ispirtu s-Santu bħala Mgħallem ġewwa fina u bħala Tifkira ħajja ta’ Kristu,S fil-mixja tagħna ta’ kuljum.
Wara r-Regina Coeli:
Għeżież ħuti,
Tislima minn qiegħ qalbi tmur lejn ħutna tal-Knejjes tal-Orjent li llum qed jiċċelebraw l-Għid. Il-Mulej itihom ilkoll ir-rigali tad-dawl tiegħu u tal-paċi tiegħu. Christos anesti!
Qed jasluli b’għafsa ta’ qalb kbira l-aħbarijiet mis-Sirja dwar l-ispirali tal-vjolenza li qed tkompli tħażżen is-sitwazzjoni umanitarja tal-pajjiż, partikolarment fil-belt ta’ Aleppo, u li qed tkompli taħsad vittmi innoċenti saħansitra fost it-tfal, il-morda u fost dawk li b’sagrifiċċju kbir huma mpenjati biex jgħinu lill-proxxmu. Inħeġġeġ lill-partijiet kollha mdaħħlin fil-kunflitt biex jirrispettaw il-waqfien mill-ġlied u biex isaħħu d-djalogu li għaddej, l-unika triq li twassal għall-paċi.
Il-Ħadd li ġej f’Ruma se tibda l-Konferenza bit-tema “L-iżvilupp sostenibbli u x-xogħol l-aktar vulnerabbli”. Nawgura li dan l-avveniment jissensibiliżża lill-awtoritajiet, lill-istituzzjonijiet politiċi u ekonomiċi biex jagħtu każ tad-dinjità umana, b’rispett sħiħ lejn ir-regolamenti dwar ix-xogħol u dwar l-ambjent.
Insellem lilkom, pellegrini li ġejtu mill-Italja u minn pajjiżi oħra. Insellem partikolarment lill-fidili li ġew minn Madrid, Barcellona u Varsavja, kif ukoll lill-Komunità Abramo li hija impenjata fi proġetti ta’ evanġeliżżazzjoni fl-Ewropa, lill-pellegrini minn Olgiate Comasco, Bagnolo Mella u lill-dawk li se jagħmlu l-Griżma tal-Isqof minn Castelli Calepio.
Insllem lill-“Assoċjazzjoni Meter” li minn bosta snin ‘l hawn titqabad kontra kull forma ta’ abbuż fuq il-minuri. Din hi traġedja! M’għandniex nittolleraw l-abbużi fuq il-minuri. Għandna niddefendu lill-minuri u nikkastigaw bl-aħrax lil min jabbużahom. Grazzi tal-impenn tagħkom u komplu wettqu din il-ħidma b’impenn!
Nawgura lil kulħadd il-Ħadd it-tajjeb. Jekk jogħġobkom, tinsewx titolbu għalija. Il-pranzu t-tajjeb u arrivederci!
Miġjub għall-Malti mit-Taljan minn Joe Huber