Għeżież ħuti, il-jum it-tajjeb?
Il-vanġelu tal-lum jippreżentalna lil Ġesù waqt l-aħħar ikla, fil-mument meta jaf li l-mewt kienet tassew qrib. Kienet wasalt is-“siegħa” tiegħu. Jinsab mad-dixxipli għall-aħħar darba, u għalhekkk irid jistampa sewwa f’moħħhom verità mill-aktar importanti: anke meta Hu ma jkunx għadu magħhom fil-ġisem, huma xorta waħda jistgħu jibqgħu marbutin miegħu b’mod ġdid, u hekk xorta waħda jagħmlu ħafna frott. Ilkoll kemm aħna nistgħu nkunu magħqudin ma’ Ġesù b’mod ġdid. Jekk mill-banda l-oħra xi ħadd jitlef din l-għaqda miegħu, din il-komunjoni miegħu, isir sterili, anzi, jagħmel il-ħsara lill-komunità. U biex juri din ir-realtà, dan il-mod ġdid kif inkunu magħqudin miegħu, Ġesù juża x-xbiha tad-dielja u l-friegħi u jgħid hekk: “Hekk kif il-fergħa ma tistax tagħmel il-frott waħedha jekk ma tibqax mad-dielja, bl-istess mod anqas intom jekk ma tibqgħux fija. Jien id-dielja, intom il-friegħi” (Ġw 15, 4-5). B’din ix-xbiha jgħallimna kif nibqħu fih, kif inkunu marbutin miegħu, minkejja li hu mhux preżenti fostna fil-ġisem.
Ġesù huwa d-dielja, u minn ġo fih – kif l-umdu jterraq fis-siġra – jagħddi lill-friegħi l-imħabba stess ta’ Alla, l-Ispirtu s-Santu. Dan hu li qed ngħid: aħna l-friegħi, u permezz ta’ din il-parabbola Ġesù jrid ifiehmna kemm hu meħtieġ li nibqgħu magħqudin miegħu. Il-friegħi ma jistgħux ifendu għal rashom, imma jiddependu għal kollox mid-dielja, għax fiha hemm l-għajn tal-ħajja tagħhom. L-istess għalina l-insara. Permezz tal-magħmudija ġejna msawwra fi Kristu, u minnu qlajna b’xejn ir-rigal ta’ ħajja ġdida; u nistgħu nibqgħu f’għaqda li tagħtina l-ħajja ma’ Kristu. Jeħtieġ li nibqgħu fidili lejn il-Magħmudija, u nikbru fil-ħbiberija ma’ Ġesù permezz tat-talb, it-talb ta’ kuljum, is-smiegħ tal-Kelma tiegħu – il-qari tal-Vanġelu – u r-rieda li nwettquha, il-parteċipazzjoni fis-Sagramenti, speċjalment fl-Ewkaristija u l-Qrar.
Jekk xi ħadd ikun magħqud ma’ Ġesù b’mod intimu, igawdi d-doni tal-Ispirtu s-Santu, li – kif jgħid San Pawl – huma “l-imħabba, l-hena, is-sliem, is-sabar, il-ħniena, it-tjieba, il-fidi, il-ħlewwa, ir-rażan” (Gal 5,22). Dawn huma r-rigali li jaslulna jekk nibqgħu magħqudin ma’ Ġesù; u minħabba fihom persuna li hi magħquda ma’ Ġesù b’dan il-mod tagħmel ħafna ġid lill-proxxmu u lis-soċjetà, hija persuna nisranija. Minn din l-imġieba fil-fatt jingħaraf jekk xi ħadd hux nisrani jew le, l-istess kif mill-frott tingħaraf is-siġra. Il-frott ta’ din l-għaqda profonda ma’ Ġesù huma tal-għaġeb: il-persuna kollha tagħna tiġi mibdula mill-grazzja tal-Ispirtu: ir-ruħ, l-intelliġenza, ir-rieda, l-affetti, u anke l-ġisem, għax aħna għaqda ta’ spirtu u ġisem. Nirċievu mod ġdid kif neżistu, il-ħajja ta’ Kristu ssir tagħna: nistgħu naħsbu bħalu, inġibu ruħna bħalu, naraw id-dinja u l-affarijiet ta’ madwarna bl-għajnejn ta’ Ġesù. B’konsegwenza ta’ hekk nisgħu nħobbu lill-aħwa, l-ewwel nett l-aktar fqar u batuti, kif għamel Hu, inħobbuhom bil-qalb tiegħu u hekk inwasslu fid-dinja frott ta’ tjieba, mħabba u paċi.
Kull wieħed minna huwa fergħa fid-dielja waħdanija; u aħna flimkien imsejjħin biex inwasslu l-frott ta’ din il-komunjoni li sidienha huma Kristu u l-Knisja. Ejjew nafdaw lilna nfusna fl-interċessjoni tal-Verġni Marija, sabiex inkunu friegħi ħajjin fil-Knisja u nagħtu xhieda tal-fidi tagħna billi l-imġieba tagħna tkun taqbel ma dak li nemmnu – għaqda bejn il-ħajja u l-fidi – waqt li nafu li lkoll, skont is-sejħa ta’ kull wieħed minnha, għandna sehem mill-missjoni salvifika waħdanija ta’ Kristu.
-----
Wara r-Regina Coeli l-Papa wassal dan il-messaġġ:
Għeżież ħuti,
lilkom li ġejjin mill-Italja u minn ħafna partijiet tad-dinja, insellem lil kull wieħed u waħda minnhom!
Ilbieraħ f’Turin ġie mħabbar Beatu Luigi Bordino, lajk ikkonsagrat tal-Kongregazzjoni tal-Aħwa ta’ San Giuseppe Benedetto Cottolengo. Hu ddedika ħajtu lill-persuni morda u batuti, u ngħata bla mistrieħ lill-aktar fqar, idewwilhom u jnaddfilhom il-feriti. Inroddu ħajr lill-Mulej għal dan id-dixxiplu umli u ġeneruż.
Insellem illum b’mod speċjali lill-Associazioni Méter, fil-Jum tat-Tfal vittmi tal-vjolenza. Nirringrazzjakom tal-impenn tagħkom li bih tfittxu li tevitaw dawn l-atti kriminali. Ilkoll kemm aħna hemm bżonn li nimpenjaw irwieħena sabiex kull persuna umana, speċjalment it-tfal, tkun dejjem imħarsa u protetta.
Insellem minn qalbi lill-pellegrini li hawn preżenti llum, tassew wisq biex insemmi kull grupp! Nittama li almenu l-Coro San Biagio ikantalna ftit. Insellem lil dawk ġejjin minn Amsterdam, Zagreb, Litija (fis-Slovenja), Madrid, u Lugo (li jinsab ukoll fi Spanja). Nilqa’ bil-qalb ħafna Taljani: il-parroċċi, l-għaqdiet u l-iskejjel. Ħsieb partikulari jmur għaż-żgħażagħ li rċevew jew li se jirċievu l-griżma.
Nawgura lil kulħadd il-Ħadd it-tajjeb. Nitlobkom ma tinsewx titolbu għalija. L-ikla t-tajba u nsellmilkom.
Miġjub għall-Malti mit-Taljan minn Fr Jonathan Farrugia