Verġni Marija,
f’dan il-jum ta’ festa f’ġieħ l-Immakulata Kunċizzjoni tiegħek,
ġejt noffrilek l-omaġġ ta’ fidi u mħabba
tal-poplu qaddis ta’ Alla li jgħix f’din il-Belt u f’din id-Djoċesi.
Ġejt f’isem il-familji, bil-ferħ u n-niket tagħhom;
f’isem it-tfal u ż-żgħażagħ, miftuħin għall-ħajja;
f’isem l-anzjani, mgħobbija bis-snin u bl-esperjenza;
b’mod partikulari ġejt għandek
f’isem il-morda, il-ħabsin,
u min l-iżjed li qed iħoss iebsa l-mixja.
Bħala Ragħaj ġejt anki f’isem dawk
li waslu hawn minn artijiet imbiegħda jfittxu l-paċi u x-xogħol.
Taħt il-mant tiegħek hemm post għal kulħadd,
għax int l-Omm tal-Ħniena.
Qalbek mimlija bil-ħlewwa lejn uliedek kollha:
il-ħlewwa ta’ Alla, li minnek ħa l-ġisem
u sar ħuna, Ġesù,
Feddej ta’ kull raġel u ta’ kull mara.
Meta nħarsu lejk, Omm Immakulata tagħna,
nagħrfu r-rebħa tal-Ħniena divina
fuq id-dnub u fuq il-konsegwenzi kollha tiegħu;
u terġa’ tixgħel f’qalbna t-tama f’ħajja aħjar,
ħielsa mill-jasar, mill-korla u mill-biża’.
Il-lum, hawn, fil-qalba ta’ Ruma, inħossu l-leħen tiegħek ta’ omm
isejħilna lkoll biex nibdew mexjin
lejn dak il-Bieb, li jirrappreżenta lil Kristu.
Int qed tgħid lil kulħadd: “Ejjew, ersqu kollkom fiduċja;
idħlu u ilqgħu d-don tal-Ħniena;
la tibżgħux, la tistħux:
il-Missier qed jistenniekom b’dirgħajh miftuħa
biex jagħtikom il-maħfra tiegħu u jilqagħkom fid-dar tiegħu.
Ejjew ilkoll ixorbu mill-għajn tal-paċi u ta’ l-hena”.
Irroddulek ħajr, Omm tagħna Immakulata,
għax f’din il-mixja ta’ rikonċiljazzjoni
int ma tħalliniex interrqu waħidna, imma sseħibna,
tinsab qrib tagħna u tweżinna f’kull diffikultà.
Imbierka inti, Omm tagħna, issa u dejjem. Amen.
miġjuba mit-Taljan għall-Malti minn Francesco Pio Attard