Sur
Direttur,
għeżież tfal,
membri tal-istaff,
ħbieb,
Nirringrazzjakom tal-laqgħa tant entużjasta li tajtuni. Grazzi tal-ħin li qed tippermettuli nqatta’ magħkom
Għeżież tfal, nixtieq nagħmlilkom mistoqsija, ħa nara jekk tgħinunix? Qaluli li intom intelliġenti ħafna, u għalhekk iddeċidejt. Ġesù irrabja xi darba? Tiftakru meta? Naf li hi mistoqsija iebsa, però se ngħinkom….. Kien meta l-Appostli ma ridux lit-tfal jersqu lejH. Din hija l-unika darba li fl-Evanġelju ta’ San Mark insibu din il-frażi (cfr 10, 13-15). Xi ħaġa li tixbaħ kif ngħiduha aħna: imtela’ bil-korla. Intom irrabjajtu xi darba? Tajjeb, l-istess għamel Ġesù, meta ma ħallewhx ikun qrib tat-tfal, qrib tagħkom. It-tfal huma fost l-aktar favoriti ta’ Ġesù. Mhux għax ma jħobbx lill-kbar, imma kien iħossu hieni meta seta’ jkun magħhom. Kien jieħu gost ħafna bil-ħbiberija u bil-kumpanija tagħhom. Qal lid-dixxipli: «Jekk ma ssirux bħat-tfal ma tidħlux fis-Saltna tas-Sema» (Mattew 18,3). It-tfal kienu bogħod u l-kbar ma riedux iħalluhom joqorbu lejn Ġesù, imma Ġesù sejħilhom, għannaqhom u qiegħdhom fin-nofs biex kulħadd jitgħallem ikun bħalhom.
Illum jgħid l-istess ħaġa lilna. Iħares lejna u jgħidilna: tgħallmu minnhom. Irridu nitgħallmu mingħandkom, mill-fiduċja li għandkom, mill-ferħ, mit-tenerezza. Mill-ħila tagħkom li titqabdu, mill-qawwa tagħkom. Mill-ħila li m’hawnx bħala li tirreżistu.
Veru kapaċi jitqabdu. Hux veru mamijiet? Hux veru papjiet u nanniet?
Inħarsu lejkom u niksbu l-forza, niksbu l-qawwa biex ikollna fiduċja, biex nibqgħu mexjin ‘il quddiem. Ommijiet, missirijiet, nanniet, naf li mhu faċli xejn li tkunu u hawn. Ikun hemm waqtiet ta’ sofferenza kbira, ta’ inċertezza. Ikun hemm mumenti ta’ dwejjaq kbar li jgħafsu l-qalb u jkun hemm mumenti ta’ ferħ kbir. Iż-żewġ sentimenti li jgħammru flimkien ġewwa fina. Imma ebda rimedju mhu aqwa mit-tenerezza tagħkom, mill-qrubija tagħkom. U huwa ta’ ferħ għalija li naf li bejnietkom il-familji tgħinu ‘l xulxin, tqawwu qalb xulxin, issostnu lil xulxin biex tibqgħu tħarsu ‘l quddiem u tgħelbu dan il-waqt.
Tistgħu toqgħodu fuq it-tobba, l-infermieri u l-impjegati kollha ta’ din id-dar. Grazzi għal din il-vokazzjoni ta’ servizz, li tgħinu mhux biss biex tikkuraw imma wkoll biex takkumpanjaw is-sofferenza ta’ ħutkom.
Ma ninsewx li Ġesù jinsab qrib uliedu. Qiegħed qrib ħafna, qrib il-qalb. Toqgħodux ittellgħu u tiżżlu biex titolbuh, tittitubawx biex titkellmu miegħu, biex taqsmu miegħu d-domandi tagħkom, it-tbatija. Hu dejjem hemm qiegħed, dejjem, u mhux se jħallikom taqgħu.
U aħna ċerti minn ħaġa waħda u nikkonferma dan għal darb’oħra. Fejn hemm it-tfal hemm l-omm. Fejn hemm Ġesù hemm Marija, il-Verġni ta’ Caacupè. Nitolbuha biex tħariskom taħt il-mant tagħha, biex tinterċedi għalikom u għall-familji tagħkom.
U tinsewx titolbu għalija. Jien żgur li t-talb tagħkom jasal fis-sema.
Miġjub għall-Malti mit-Taljan minn Joe Huber