Għeżież ħuti, l-għodwa t-tajba!
Kuntent ħafna li qed inżurkom dal-għodu. Ma stajtx niġi l-Paragwaj u ma niġix għandkom, ma nirfisx l-art tagħkom.
Qed niltaqgħu f’din il-Parroċċa ddedikata lill-Familja Mqaddsa, u nistqarr magħkom li minn meta bdejt naħseb f’din iż-żjara, minn meta bdejt il-vjaġġ tiegħi minn Ruma sa hawn, ħsiebi kien fil-Familja Mqaddsa. U jien u naħseb fikom, ftakart fil-Familja Mqaddsa. Jien u nħares lejn wiċċkom, uliedkom, in-nanniet tagħkom. Jien u nisma’ l-istejjer tagħkom u dak kollu li għamiltu biex stajtu tibqgħu tgħixu hawn, it-taqbid kollu li għaddejtu minnu biex ikollkom ħajja dinjituża, saqaf fuq raskom. Dak kollu li qed tagħmlu biex tibqgħu għaddejjin minkejja l-qilla tat-temp, l-għargħar ta’ l-aħħar ġimgħat, dan kollu jfakkarni fil-familja ċkejkna ta’ Betlehem. Taqbida li ma serqitilkomx it-tbissima, il-ferħ, it-tama. Taħbit li ma ħadilkomx is-solidarjetà, għall-kuntrarju, ħeġġiġha u kabbarha.
Nixtieq nieqaf ftit fuq Ġużeppi u Marija f’Betlehem. Huma kellhom iħallu arthom, l-għeżież tagħhom, lil ħbiebhom. Kellhom iħallu kull ma kellhom u jitilqu lejn art oħra. Art fejn ma kienu jafu lil ħadd, ma kellhomx dar, lanqas familja. Dak il-ħin, dik il-koppja żagħżugħa kellha lil Ġesù. F’dak il-kuntet, fi stalla li rranġaw kif setgħu, dik il-koppja żagħżugħa tatna lil Ġesù. Kienu waħidhom, f’art barranija, huma t-tlieta. Fid-daqqa u l-ħin, bdew jitfaċċaw in-nies: xi rgħajja, persuni bħalhom li kellhom iħallu r-realtà tagħhom biex isibu opportunitajiet aħjar għall-familji tagħhom. Anki l-ħajja ta’ dawn kienet marbuta mat-temp mhux dejjem ħanin, u ma’ tipi oħra ta’ tbatija.
Meta saru jafu bit-twelid ta’ Ġesù, qorbu lejhom, saru proxxmu għalihom, qraban tagħhom. Saru mill-ewwel il-familja ta’ Marija u Ġużeppi. Il-familja ta’ Ġesù.
Dan hu li jseħħ meta Ġesù jidħol f’ħajjitna. Dan hu li tqanqal fina l-fidi. Il-fidi tagħmilna proxxmu, tagħmilna proxxmu tal-ħajja ta’ l-oħrajn, tqarribna lejn il-ħajja ta’ l-oħrajn. Il-fidi tqanqal l-impenn tagħna ma’ l-oħrajn, il-fidi tqanqal is-solidarjetà tagħna: virtù umana u Nisranija, li intom għandkom u li ħafna, ħafna għandhom u li jeħtieġ nitgħallmu. It-twelid ta’ Ġesù jerġa’ jseddqilna ħajjitna. Fidi li ma ssirx solidarjetà hi fidi mejta, fidi falza. “Le, jien Kattoliku ħafna, Kattolika ħafna, immur il-Quddiesa kull nhar ta’ Ħadd”. Imma għidli, Sinjur, Sinjura, x’qed jiġri hemm f’Bañado? “Aħ, ma nafx… iva… le… ma nafx, iva…, naf li hemm in-nies tgħix hemm, imma ma nafx…”. Tmur kemm tmur Quddiesa l-Ħadd, jekk m’għandekx qalb solidali, jekk ma tafx minn xiex inhu għaddej il-poplu tiegħek, il-fidi tiegħek hi dgħajfa ħafna, jew hi marida, jew hi mejta. Hi fidi mingħajr Kristu. Il-fidi mingħajr solidarjetà hi fidi mingħajr Kristu, hi fidi bla Alla, hi fidi bla aħwa. U allura jgħodd dak li jingħad, li nittama li qed niftakru tajjeb, imma li jinkwadra sew din il-problema ta’ fidi bla solidarjetà: “Alla bla poplu, poplu bla aħwa, poplu bla Ġesù”. Din hi l-fidi bla solidarjetà. U Alla niżel qalb il-poplu tiegħu li Hu kien għażel biex isieħbu, u lil dan il-poplu bagħatlu lil Ibnu biex jifdih, biex jgħinu. Alla sar solidali ma’ dak il-poplu, u Ġesù ma sab l-ebda problema jinżel, jiċċekken, jitbaxxa, sa ma miet għal kull wieħed u waħda minna, b’din is-solidarjetà ta’ ħuna, solidarjetà li tiġi mill-imħabba li kellu għal Missieru u mill-imħabba li kellu għalina. Ftakru: meta fidi m’hix solidali, jew hi dgħajfa, jew marida, jew mejta. M’hix il-fidi ta’ Ġesù.
Kif kont qed ngħidilkom, l-ewwel li kien solidali kien il-Mulej, li għażel li jgħix fostna, għażel li jgħix f’nofsna. Jien ġejt hawn bħal dawk ir-rgħajja li kien hemm Betlehem. Nixtieq inkun qrib tagħkom. Nixtieq inbierek il-fidi tagħkom, nixtieq inbierek idejkom, nixtieq inbierek il-komunità tagħkom. Ġejt biex irroddilkom ħajr, għax il-fidi saret tama u hi tama li tqanqal għall-imħabba. Il-fidi li Ġesù jagħti hi fidi li kapaċi toħlom il-ġejjieni u tissielet għalih fil-preżent. Propju għalhekk nixtieq nagħmlilkom il-qalb biex tkomplu tkunu missjunarji ta’ din il-fidi, biex tkomplu xxerrdu l-fidi ma’ dawn it-toroq, ma’ dawn il-mogħdijiet. Din il-fidi li tagħmilna solidali bejnietna, ma’ Ħuna l-kbir Ġesù, u l-Omm tagħna, il-Verġni Marija. Kunu qrib ta’ xulxin, speċjalment ta’ dawk l-iktar żgħażagħ u ta’ l-anzjani. Wieżnu lill-familji żgħażagħ u lil dawk li għaddejjin minn mumenti iebsin. Forsi l-iktar messaġġ b’saħħtu li intom tistgħu tagħtu lill-oħrajn hi din il-fidi solidali. Ix-xitan iridkom tillatikaw bejnietkom, u hekk jifridkom u jirvinakom u jisirqilkom il-fidi. Solidarjetà bejn l-aħwa biex tħarsu l-fidi! U hekk ukoll din il-fidi solidali tkun messaġġ għall-belt kollha!
Nixtieq nitlob għall-familji tagħkom, u nitlob lill-Familja Mqaddsa biex il-mudell tagħha, ix-xhieda tagħha tisskota tkun dawl fil-mixja, tħeġġiġ fil-mumenti diffiċli, u tagħtina l-grazzja ta’ don, li nitolbuh flimkien, ilkoll kemm aħna: jalla l-Familja Mqaddsa tagħtina “rgħajja”, tagħtina saċerdoti, isqfijiet, kapaċi jsieħbu, iwieżnu u jħeġġu l-ħajja tal-familji tagħkom. Kapaċi jrawmu dik il-fidi solidali li qatt m’hi mirbuħa.
Nistedinkom titolbu flimkien u nitlobkom ukoll ma tinsewx titolbu għalija.
U nitolbu flimkien talba lill-Missier biex jagħmilna aħwa, hu li bagħtilna lil Ħuna l-kbir, Ibnu Ġesù, u tana Omm li timxi magħna.
Missierna…
Barka.
U imxu! U tħallux ix-xitan jifridkom! Is-sliem!
miġjuba mit-Taljan għall-Malti minn Francesco Pio Attard