Żjara pastorali fil-Parroċċa Rumana
ta’ San Tumas Appostlu
OMELIJA TAL-PAPA FRANĠISKU
Il-Ħadd, 16 ta’ Frar, 2014
Jum wieħed, id-dixxipli ta’ Ġesu’ kienu qed jieklu l-qamħ, għaliex kienu bil-ġuħ; imma kien jum is-Sibt, u dak inhar ma setgħux jieklu l-qamħ. Imma huma kielu, għamlu hekk [jitħnuh b’idejhom]. Il-fariżej qalu: “Araw x’inhuma jgħamlu! Min jagħmel hekk imur kontra l-liġi u jħammeġ ruħu għaliex ma jwettaqx il-liġi!”. Ġesu’ weġibhom: “Ma jħammiġx ir-ruħ dak li aħna nieħdu minn barra. Iħammeġ lir-ruħ dak li jiġi minn ġewwa, minn qalbek”. U nemmen li llum jagħmlilna tajjeb naħsbu mhux jekk ruħna hijiex nadifa jew maħmuġa, imma naħsbu x’hemm fil-qalb tiegħi, x’għandi ġewwa fija, li jiena naf li għandi u li ħadd ma jafu. Ngħidu l-verita’ lilna nfusna: u dan mhux ħaġa ħafifa! Għaliex aħna dejjem infittxu li nitgħattew meta naraw xi ħaġa li ma tkunx tajba ġewwa fina, le? Li ma toħroġx barra, le? X’hemm fil-qalb tagħna: hemm imħabba? Ejjew naħsbu: jiena nħobb lill-ġenituri tiegħi, lil uliedi, lil marti, lil żewġi, in-nies ta’ fejn ngħix, il-morda? ... Inħobb? Hemm mibegħda? Jiena nobgħod lil xi ħadd? Għaliex ħafna drabi aħna nsibu li hemm mibegħda, le? “Jiena nħobb lil kulħadd, minbarra dak jew dik!”. Din hija mibegħda, le? X’hemm fil-qalb tiegħi, maħfra? Hemm atteġġjament ta’ maħfra għal dawk li naqsuni, jew hemm atteġġjament ta’ vendetta – “inħallsu!” – (“jew inħallasha!”). Jeħtieġilna nistaqsu lilna nfusna x’hemm ġewwa fina, għaliex dak li huwa ġewwa joħroġ barra u jagħmel il-ħażin, jekk hu ħażin; u jekk hu tajjeb, joħroġ barra u jagħmel it-tajjeb. U huwa ħafna sabiħ li ngħidu l-verita lilna nfusna, u nistħu meta nsibu ruħna f’qagħada li m’hijiex kif jixtieqha Alla, ma tkunx tajba; meta l-qalb tiegħi hija f’qagħada ta’ mibegħda, ta’ vendetta, tant qagħadiet ta’ dnub. Kif inhi qalbi?...
Ġesu’ qiegħed jgħidilna llum, per eżempju – nagħti biss eżempju: “Smajtu xi ntqal lin-nies ta’ qabel: “La toqtolx”. Imma jien ngħidilkom li min jinkorla għal ħuh, ikun joqtlu, f’qalbu”. U min jinsulta lil ħuh, ikun joqtlu f’qalbu, min jobgħod lil ħuh, joqtol lil ħuh f’qalbu; min jisparla kontra ħuh, ikun joqtlu f’qalbu. Aħna, forsi, ma nintebħux b’dan, u mbagħad nitkellmu, “insemmu” lil dak u lill-ieħor, nisparlaw fuq dak jew l-ieħor... U dan huwa toqtol lil ħuk. Għalhekk huwa importanti nagħraf x’hemm ġewwa fija, x’ikun qed jiġri ġewwa qalbi. Jekk wieħed jifhem lil ħuh, il-persuni, iħobb, għax jaħfer: jifhem, jaħfer, ikun paċenzjuż ... Hija mħabba jew mibegħda? Jeħtieġilna dan inkunu nafuh sewwa. U nitolbu lill-Mulej żewġ grazzi. L-ewwel: Li nagħraf x’hemm f’qalbi, biex ma nitqarrqux, biex ma ngħixux imqarrqin. It-tieni grazzja: li nagħmlu dak il-ġid li hemm fi qlubna u li ma nagħmlux il-ħażen li hemm fi qlubna. E fuq din “la toqtolx” niftakru li l-kliem joqtol. Ukoll il-ħsibijiet ħżiena kontra l-ieħor joqtlu. Ħafna drabi, meta nisimgħu n-nies jitkellmu, jitkellmu mhux sewwa fuq l-oħrajn, jidher li d-dnub tal-kalunnja, il-dnub tal-malafama ġew imneħħija mill-Kmandamenti; u li titkellem ħażin fuq xi persuna huwa dnub. U għaliex nitkellem ħażin fuq persuna? Għaliex f’qalbi għandi mibegħda, antipatija, mhux imħabba. Nitolbu dejjem din il-grazzja: li nkun naf x’qiegħed jiġri f’qalbi, biex inkun nista’ nagħmel għażla tajba, l-għażla tat-tajjeb. U nitolbu l-Mulej jgħinna li nkunu nixtiequ t-tajjeb lil xulxin. U jekk jien ma nkunx nista’ nixtieq it-tajjeb lil xi persuna, għaliex ma nkunx nista’? Nitlob għal din il-persuna, biex jien inkun nista’ nixtieqilha t-tajjeb. U hekk nimxi ‘l quddiem, fil-waqt li niftakar dejjem li dak li jħammeġ il-ħajja tagħna huwa dak il-ħażin li joħroġ minn qlubna. Nitolbu l-Mulej jgħinna.
Miġjub għall-Malti minn Patri Silvestru Bonavia OFM Cap.