Omelija tal-Qdusija Tiegħu Papa Franġisku
Konċelebrazzjoni Ewkaristika
fl-ex stadium Romagnoli
Żjara Pastorali fil-Molise, Campobasso,
Is-Sibt, 5 ta’ Lulju 2014.
“Lil dawk li jaqduh, il-għerf ħelishom mit-taħbit” (Għerf 10,9)
L-ewwel qari fakkarna fil-kwalitajiet tal-għerf divin, li jeħles mill-ħażen u mill-jasar lil dawk li jaqdu ‘l-Mulej. Il-Mulej ma jżommx ruħu newtrali, imma bl-għerf tiegħu jżomm mal-persuni fraġli, mal-persuni diskriminati u maħkuma, li jintelqu f’idejh b’fiduċja. Din hi l-esperjenza ta’ Ġakobb u ta’ Ġużeppi , li nsibuha rakkuntata fit-Testment il-Qadim, u minnha joħorġu żewġ aspetti essenzjali tal-ħajja tal-Knisja: il-Knisja hi poplu li jaqdi ‘l Alla; il-Knisja hi poplu li jgħix il-ħelsien mogħti lilu minn Alla.
L-ewwelnett aħna poplu li jaqdi lil Alla. Naqduh b’diversi modi, l-aktar bit-talb u bl-adorazzjoni, bit-tħabbir tal-Vanġelu u bix-xhieda tal-imħabba. Il-Verġni Marija, “il-qaddejja tal-Mulej”( Lk 1,38; ara 1,48) hi dejjem ikona tal-Knisja. Wara li l-anġlu ta l-aħbar u nisslet fi ħdanha lil Ġesu’, hi malajr marret tħaffef biex tgħin lill-qariba tagħha Eliżabetta, li kienet imdaħħla sew fiż-żmien. Hekk Marija turina li t-triq privileġġata biex naqdu lill-Mulej hi li naqdu lil ħutna fil-bżonn.
Fl-iskola tal-Omm, il-Knisja titgħallem tkun kuljum “qaddejja tal-Mulej”, lesta li toħroġ biex tmur kulfejn hemm bżonn, li tkun attenta u tieħu ħsieb iċ-ċkejknin u l-imwarrbin. Iżda aħna lkoll msejħin biex inwettqu l-qadi b’imħabba fir-realtajiet ordinarji tal-ħajja, jiġifieri fil-familja, fil-parroċċa, fuq ix-xogħol, mal-ġirien......Din hi l-imħabba li ngħixuha kuljum, il-karita’ ordinarja.
Ix-xhieda tal-imħabba hi t-triq per eċċellenza tal-evanġelizzazzjoni. Il-Knisja, preżenza ta’ omm u oħt li taqsam mal-oħrajn id-diffikultajiet u l-fraġilta’ tagħhom, dejjem kienet “fuq quddiem” f’din ix-xhieda. B’hekk, il-komunita’ nisranija tfittex li ssawwab fis-soċjeta’ dik “ir-ruħ b’dak l-iżjed” li jwasslek biex tħares aktar ‘l bogħod u tittama.
Dan qed tagħmluh intom ukoll, għeżież ħuti ta’ din id-Djoċesi, qed tagħmluh b’ħafna ġenerożita’ u sostnuti miż-żelu pastorali tal-Isqof tagħkom. U lilkom ilkoll, saċerdoti, persuni konsagrati, lajċi, inħeġġiġkom biex tibqgħu miexja f’din it-triq billi taqdu lil Alla fis-servizz li tagħtu lil ħutkom il-bnedmin u billi xxerrdu ma’ kullimkien il-kultura tas-solidarjeta’. Hemm ħafna bżonnu dan l-impenn meta hemm sitwazzjonijiet materjali u spiritwali li huma prekarji ħafna, speċjalment fejn hemm il-problema tan-nuqqas ta’ xogħol, pjaga li titlob sforz u kuraġġ minn kulħadd. Il-qagħda tax-xogħol hi sfida li titlob responsabbilta’ b’mod partikulari mill-istituzzjonijiet, mill-qasam imprenditorjali u finanzjarju. Jeħtieġ li d-dinjita’ tal-bniedem tkun fiċ-ċentru ta’ kull perspettiva u ta’ kull azzjoni. L-interessi l-oħra, ukoll jekk leġittimi, huma sekondarji. Fiċ-ċentru hemm id-dinjita’ tal-persuna umana! Għaliex? Għax il-bniedem hu xbieha t’Alla, il-bniedem ġie maħluq fuq ix-xbieha t’ Alla u aħna lkoll xbieha t’Alla!
Il-Knisja hi l-poplu li jaqdi l-Mulej. Allura l-poplu jagħmel esperjenza tal-ħelsien u jgħix f’dan il-ħelsien li jagħtih il-Mulej. Huwa dejjem il-Mulej li jagħtina l-veru ħelsien. Qabel kollox ninħelsu mid-dnub, mill-egoiżmu fil-forom kollha tiegħu: dan il-ħelsien iwassalna biex ningħataw għall-oħrajn u dan nagħmluh bil-ferħ, bħalma għamlet il-Verġni ta’ Nażaret li kienet ħielsa minnha nnifisha u ma qagħditx taħseb fuq il-kundizzjoni tagħha - xi ħaġa li bir-raġun kollu setgħet għamlitha – imma ħasbet f’min kien aktar fil-bżonn f’dak il-mument. Il-ħelsien tagħha f’Alla ssarraf f’imħabba. Dan hu l-ħelsien li Alla jagħtina u jeħtieġ li ma nitilfuhx: il-ħelsien li naduraw lil Alla, li naqdu lil Alla u li naqduh ukoll f’ħutna l-bnedmin.
Bil-grazzja t’Alla, nagħmlu l-esperjenza ta’ dan il-ħelsien fil-komunita’ nisranija meta aħna nkunu lesti li naqdu lil xulxin. Meta mingħajr għira, mingħajr partiti, mingħajr seksik..... nkunu lesti li naqdu lil xulxin; iva naqdu lil xulxin! Allura l-Mulej jeħlisna mill-ambizzjoni u mir-rivalita’ li jeqirdu l-għaqda tal-komunjoni. Jeħlisna min-nuqqas ta’ fiduċja u mis-swied il-qalb – dan is-swied il-qalb hu perikuluż, għax inħossuna mdejqin; attenti għax dan hu perikoluż! Jeħlisna mill-biża’, mill-vojt ġewwieni, mill-iżolament, jeħlisna milli noqogħdu nibku l-passat, milli ngergru. Anki fil-komunitajiet tagħna jkun hemm dawn l-atteġġjamenti negattivi, li jwasslu biex il-persuni jaħsbu u jirreferu biss għalihom infushom, aktar lesti li jiddefendu ruħhom milli jagħtu lilhom infushom. Imma, la kif għidna fis-Salm responsorjali: “Mulej, int l-għajnuna u l-ħelsien tiegħi”, Kristu jeħlisna minn dan in-negattiv kollu li jeżisti fil-ħajja tagħna. U allura d-dixxipli, aħna dixxipli tal-Mulej, minkejja li dejjem nibqgħu dgħajfa u midinba – għax ilkoll hekk aħna – minkejja dan kollu, aħna msejħin biex ngħixu b’ferħ u b’kuraġġ il-fidi tagħna, il-komunjoni tagħna ma’ Alla u ma’ ħutna l-bnedmin, l-adorazzjoni lil Alla u msejħin biex naffrontaw b’qawwa l-għeja u t-tiġrib tal-ħajja.
Għeżież ħuti, jalla l-Verġni mbierka, li intom tqimu taħt it-titlu tal-Madonna tal-Ħelsien, twassalkom biex tiksbu l-ferħ fil-qadi tal-Mulej u biex timxu fit-triq tal-ħelsien li hu tana: fil-ħelsien tal-adorazzjoni, tat-talb u tal-qadi lill-oħrajn. Jalla Marija tgħinkom tkunu Knisja Omm, Knisja li tilqa’ u li hi attenta għal kulħadd. Jalla Marija dejjem tkun qrib tagħkom, qrib tal-morda tagħkom, tal-anzjani li huma l-għerf tal-poplu, taż-żgħażagħ tagħkom. Jalla hi tkun sinjal ta’ faraġ u ta’ tama għall-poplu tagħkom. Jalla l-Madonna tal-ħelsien timxi magħna, tgħinna, tfarraġna, tagħtina l-paċi u l-ferħ!
Miġjub għall-Malti mit-Taljan minn Vivienne Attard.