Konċistorju Ordinarju Pubbliku għall-Ħatra ta' Kardinali Ġodda
Omelija tal-Qdusija Tiegħu il-Papa Franġisku
Bażilika tal-Vatikan
Is-Sibt 22 ta' Frar, 2014
“Ġesu’ kien miexi quddiemhom...” (Mk 10, 32)
F’dan il-waqt ukoll, Ġesu’ jimxi quddiemna. Huwa dejjem ikun quddiemna. Huwa dejjem ikun qabilna u jiftħilna t-triq... Din hija l-fiduċja tagħna u l-ferħ tagħna.: inkunu dixxipli tiegħu, inkunu miegħu, nimxu warajh, fuq il-passi tiegħu...
Meta flimkien mal-Kardinali ikkonċelebrajna l-ewwel quddiesa fil-Kappella Sistina, “nimxu” kienet l-ewwel kelma li l-Mulej qiegħed quddiemna: nimxu, u mbagħad, nibnu u nistqarru.
Illum terġa’ tiġi dik il-kelma, imma bħala azzjoni, bħala l-azzjoni ta’ Ġesu’ li tkompli: “Ġesu’ kien miexi...”. Fl-Evanġelju, dan jolqotna: Ġesu’ jimxi ħafna, u jgħallem fit-triq lil dawk li huma tiegħu. Dan huwa importanti. Ġesu’ ma ġiex biex jgħallem xi filosofija, xi ideoloġija ... imma “triq”, triq li rridu nimxu miegħu, u t-triq nitgħallmuha waqt li nibdew nimxuha, interrquha. Iva, għeżież Ħuti, dan huwa l-ferħ tagħna: nimxu ma’ Ġesu’.
U din mhix ħaġa ħafifa, mhix ħaġa komda, għaliex it-triq li Ġesu’ għażel hija t-triq tas-salib. Meta kienu fit-triq, Huwa kien jitkellem mad-dixxipli tiegħu fuq dak li kien se jseħħ għaliH f’Ġerusalemm: iħabbar minn qabel il-passjoni, il-mewt u l-qawmien. U huma “stgħaġbu” u kienu “mimlijin bil-biżgħa”. Mistgħaġbin, ċertament, għaliex għalihom li tmur Ġerusalemm kien ifisser jieħdu sehem mit-trijonf tal-Messija, tar-rebħa tiegħu – dan jidher wara mit-talba ta’ Ġakbu u Ġwanni; u mimlijin bil-biżgħa minħabba dak li Ġesu’ kien jeħtieġlu jgħaddi minnu, u li huma wkoll irriskjaw li jgħaddu.
B’mod differenti mid-dixxipli ta’ dak iż-żmien, aħna nafu li Ġesu’ rebaħ, u m’għandniex għalfejn nibżgħu mis-Salib, anzi, fis-Salib għandna t-tama tagħna. Madankollu, aħna wkoll dejjem bħala bnedmin, aħna midinbin, u aħna esposti għat-tentazzjoni li naħsbu bħala bnedmin u mhux bħal Alla.
U meta naħsbu bil-mod tad-dinja, x’inhi l-konsegwenza? Jgħidilna l-Evanġelju: “Il-ħdax l-oħra saħnu għal Ġakbu u Ġwanni” (v 41). Saħnu. Tirbaħ il-mentalita’ tad-dinja, jidħlu l-ġlied, il-għira, il-partiti...
Hekku, din il-Kelma li llum il-Mulej qiegħed itennielna hija ħafna ta’ ġid! Tnaddafna minn ġewwa. Tqiegħed dawl fil-kuxjenzi tagħna, u tgħinna li nkunu ħaġa waħda għal kollox ma’ Ġesu’, u biex nagħmlu dan flimkien, fil-mument li fih il-Kulleġġ tal-Kardinali qiegħed jikber biż-żieda ta’ Membri ġodda.
“Għalhekk, Ġesu’ sejjħilhom lejH...” (Mk 10, 42). Dan hu l-ġest l-ieħor tal-Mulej. Matul it-triq, wieħed jinduna li jkun hemm bżonn li jitkellem mat-Tnax, jieqaf, u jsejjħilhom lejH. Ħuti, inħallu lill-Mulej Ġesu’ isejjħila lejH! InħalluH isejħilna flimkien lejH. U nisimgħuH, bil-ferħ li flimkien nilqgħu il-Kelma tiegħu, li nħallu lilna nfusna niġu mgħallmin minnha u mill-Ispirtu Qaddis, sabiex insiru dejjem aktar qalb waħda u ruħ waħda, madwaru.
U kif aħna hekk, imsejħin flimkien, “imsejħin għaliH” mill-Imgħallem waħdieni tagħna, ngħidilkom dak li l-Knisja teħtieġ: teħtieġ lilkom, il-kollaborazzjoni tagħkom, u qabel dan ukoll tal-komunjoni tagħkom, miegħi u bejnietkom. Il-Knisja teħtieġ il-kuraġġ tagħkom biex ixxandru l-Evanġelju f’kull okkażżjoni f’waqtha u barra minn waqtha, u biex tagħtu xhieda għall-verita’. Il-Knisja għandha bżonn it-talb tagħkom, biex il-merħla ta’ Kristu timxi tajjeb, it-talb – ma ninsewhx – li flimkien max-xandir tal-Kelma, huwa l-ewwel dmir tal-Isqof. Il-Knisja teħtieġ il-kompassjoni tagħkom fuq kollox f’dan il-waqt ta’ niket u tbatija f’tant Pajjiżi fid-dinja. Ejjew nuru flimkien li aħna qrib b’mod spiritwali ta’ tant komunitajiet ekkleżjali, ta’ tant insara li qegħdin ibatu diskriminazzjoni u persekuzzjoni. Jeħtieġilna niġġieldu kontra kull diskriminazzjoni! Il-Knisja teħtieġ it-talb tagħna għalihom sabiex ikunu qawwijin fil-fidi u jkunu jafu imorru kontra l-ħażen bit-tajjeb. U din it-talba tagħna ssir għal kull raġel u mara li qed isofru inġustizzja minħabba l-konvinzjonijiet reliġjużi tagħhom.
Il-Knisja teħtieġna sabiex inkunu nies ta’ paċi u nagħmlu l-paċi bil-ħidma tagħna, bix-xewqat tagħna, bit-talb tagħna. Nagħmlu l-paċi! Inkunu bennejja tal-paċi! Għalhekk nitolbu għall-paċi u r-rikonċiljazzjoni bejn il-popli li f’dawn iż-żminijiet huma ppruvati mill-vjolenza, billi jiġu mwarrbin u mill-gwerra.
Ħuti l-aktar għeżież, grazzi! Grazzi! Ejjew nimxu flimkien wara l-Mulej, u nħallu lilna nfusna dejjem inkunu msejjħin minnu, f’nofs il-Poplu fidil, il-Poplu qaddis u fidil ta’ Alla, fidil għal ommna l-Knisja mqaddsa. Grazzi.
Miġjub għall-Malti minn Patri Silvestru Bonavia OFM Cap.