QUDDIESA IN CŒNA DOMINI
OMELIJA TAL-QDUSIJA TIEGĦU FRANĠISKU
C.A.R.A. Auxilium
Castelnuovo di Porto (Ruma)
Ħamis ix-Xirka, 24 ta’ Marzu 2016
Il-ġesti jitkellmu ħafna iżjed mix-xbihat u l-kliem. Il-ġesti. F’din il-Kelma ta’ Alla li għadna kemm qrajna hemm żewġ ġesti: Ġesù li jaqdi, li jaħsel ir-riġlejn. Hu, li kien il-kap, jaħsel riġlejn l-oħrajn, dawk li kienu tiegħu, iż-żgħar nett. It-tieni ġest: Ġuda li jmur għand l-għedewwa ta’ Ġesù, għand dawk li ma jridux il-paċi ma’ Ġesù, biex jieħu l-flus li bihom ittradieh, it-tletin biċċa tal-fidda. Żewġ ġesti. Anki l-lum għandna żewġ ġesti: l-ewwel hu dak tal-lejla: ilkoll kemm aħna, flimkien, Musulmani, Ħindu, Kattoliċi, flimkien. Il-ġest l-ieħor hu dak ta’ tlitt ijiem ilu: ġest ta’ gwerra, ta’ qerda f’belt ta’ l-Ewropa, ta’ persuni li ma jridux jgħixu fil-paċi. Imma wara dak il-ġest, bħal wara Ġuda, kien hemm oħrajn. Wara Ġuda kien hemm dawk li tawh il-flus biex jagħtihom f’idejhom lil Ġesù. Wara dak il-ġest ta’ tlitt ijiem ilu f’dik il-kapitali Ewropea, hemm il-fabbrikanti, it-traffikanti ta’ l-armi li jridu d-demm, mhux il-paċi; li jridu l-gwerra, mhux l-imħabba ta’ l-aħwa.
Żewġ ġesti bħal xulxin: minn naħa Ġesù jaħsel ir-riġlejn, waqt li Ġuda jbigħ lil Ġesù għall-flus; u minn naħa intom, aħna, ilkoll flimkien, bosta reliġjonijiet, diversi kulturi, imma wlied l-istess Missier, aħwa, waqt li dawk l-imsejkna qed jixtru l-armi biex jeqirdu din l-imħabba ta’ l-aħwa. Il-lum, f’dan il-mument, meta jien se nagħmel l-istess ġest ta’ Ġesù u naħsel ir-riġlejn tagħkom it-tnax, ilkoll kemm aħna qed nagħmlu l-istess ġest ta’ mħabba bejn l-aħwa, u lkoll flimkien nistgħu ngħidu: “Aħna lkoll differenti minn xulxin, għandna kulturi u reliġjonijiet differenti, imma aħna aħwa u rridu ngħixu fis-sliem”. U dan hu l-ġest li jien qed nagħmel magħkom. Kull wieħed u waħda minna għandu l-istorja tiegħu, kull wieħed u waħda minnkom għandu storja: tant slaleb, tant uġigħ, imma anki qalb miftuħa li tixtieq l-imħabba bejn l-aħwa. Kull wieħed u waħda, fil-lingwa reliġjuża tiegħu, ħa jitlob lill-Mulej biex id-dinja kollha tittieħed minn din l-imħabba ta’ l-aħwa, biex ma jkun hemm qatt dawk it-tletin biċċa tal-fidda biex jinqatel ħija, biex dejjem ikun hemm din l-imħabba u t-tjieba bejn l-aħwa. Hekk ikun.
Kelmtejn fi tmiem il-Quddiesa
Issa nixtieq insellmilkom wieħed wieħed u waħda waħda, minn qalbi. Nirringrazzjakom ta’ din il-laqgħa tagħna. U ejjew niftakru biss u nuru kemm hu sabiħ li ngħixu flimkien bħal aħwa, b’kulturi, reliġjonijiet u tradizzjonijiet differenti: aħna lkoll aħwa! U dan kollu għandu isem: paċi u mħabba. Grazzi.
miġjub mit-Taljan għall-Malti minn Francesco Pio Attard