ĦADD I-PALM U ĦADD IL-PASSJONI TAL-MULEJ
OMELIJA TAL-PAPA FRANĠISKU
Pjazza San Pietru
XXIX Jum Dinji Taż-Żgħażagħ
Il-Ħadd, 13 ta’ April 2014
Din il-ġimgħa tibda bil-purċissjoni ferrieħa bil-friegħi taż-żebbuġ: il-poplu kollu jilqa’ ‘l Ġesu’. It-tfal, iż-żgħażagħ ikantaw, ifaħħru lil Ġesu’.
Imma din il-ġimgħa tkompli fil-misteru tal-mewt ta’ Ġesu’ u tal-Qawmien tiegħu. Smajna l-r-rakkont tal-Passjoni tal-Mulej. Jagħmlilna tajjeb jekk biss nagħmlu mistoqsija waħda: Jien min jien? Jien min jien quddiem il-Mulej tiegħi? Jien min jien quddiem Ġesu’ li jidħol f’festa Ġerusalemm? Jien għandi l-qawwa li nesprimi l-ferħ tiegħi, li nfaħħru? Jew inżomm ruħi ‘l bogħod? Jien min jien, quddiem Ġesu’ li jbati?
Smajna ħafna ismijiet, ħafna ismijiet. Il-grupp tal-mexxejja, xi saċerdoti, xi fariżej, xi imgħallmin tal-liġi, li kienu ddeċidew li joqtluH. Kienu jistennew l-okkażżjoni biex jaqbduh. Jiena bħal xi wieħed minnhom?
Smajna wkoll isem ieħor: Ġuda. 30 munita. Jiena bħal Ġuda? Smajna ismijiet oħrajn: id-dixxipli li ma kienu qed jifhmu xejn, li kienu reqdin waqt li l-Mulej kien qed ibati. Il-ħajja tiegħi hija rieqda? Jew jiena bħad-dixxipli li ma kienux qed jifhmu x’jiġifieri tittradixxi lil Ġesu’? Bħad-dixxiplu l-ieħor li ried isolvi kollox bis-sejf: Jiena bħalhom? Jiena bħal Ġuda, li jagħmel ta’ bir-ruħu li jħobb u jbus l-Imgħallem biex jagħtih f’idejn l-għedewwa, biex jittradiH? Jien traditur? Jiena bħal dawk il-mexxejja li bil-għaġġla jwaqqfu t-tribunal u jfittxu xhieda foloz: jiena wieħed minnhom? U meta nagħmel dawn il-ħwejjeġ, jekk nagħmilhom, nemmen li b’daqshekk se nsalva l-poplu?
Jiena bħal Pilatu? Meta nara li s-sitwazzjoni hija diffiċli, naħsel idejja u ma nerfax ir-responsabbilta tiegħi u nħalli li jiġu kkundannati – jew nikkundanna jiena – l-persuni?
Jiena bħal dik il-folla li ma kenitx taf sewwa jekk kenitx f’laqgħa reliġjuża, jew f’qorti jew f’xi spettaklu, u tagħżel lil Barabba? Għalihom kien l-istess: kienet aktar okkażżjoni li jieħdu gost sabiex jumiljaw lil Ġesu’.
Jiena bħas-suldati li jsawwtu lill-Mulej, li jobżqulu, li jinsultawH, li jgħaddu ż-żmien billi jumiljaw il-Mulej?
Jiena bħaċ-Ċirinew li waqt li kien ġej lura mix-xogħol, għajjien, imma li kellu rieda tajba li jgħin lill-Mulej iġorr is-salib?
Jiena bħal dawk li kienu għaddejjin quddiem is-Salib u kienu jiddieħku b’Ġesu’: “Kien daqshekk kuraġġjuż! Ħa jinżel mis-salib, u aħna nemmnu fiH!”. Twaqqa’ għaċ-ċajt lil Ġesu’ ...
Jiena bħal dawk in-nisa kuraġġjużi, jew bħal Omm Ġesu’, li kienu hemm, ibatu fis-skiet?
Jiena bħal Ġużeppi, id-dixxiplu bil-moħbi, li jġib il-ġisem ta’ Ġesu’ bi mħabba, biex jidfnu?
Jiena bħaż-żewġ Marijiet li jibqgħu quddiem il-qabar jibku, jitolbu?
Jiena bħal dawk il-kapijiet li l-għada marru għand Pilatu biex jgħidulu: “Ħares li dan kien qal li kien sejjer iqum. Li ma jseħħx xi ngann ieħor!” u jagħalqu l-ħajja, jagħalqu l-qabar biex jiddefendu d-duttrina, sabiex il-ħajja ma toħroġx barra?
Fejn hija qalbi? Lil min nixbah jiena minn dawn il-persuni ? Jalla din il-mistoqsija takkumpanjana matul din il-ġimgħa kollha.
Miġjub għall-Malti minn Patri Silvestru Bonavia OFM Cap.