ŻJARA PASTORALI TAL-QDUSIJA TIEGĦU L-PAPA FRANĠISKU

FI PRATO U FIRENZE

(10 TA’ NOVEMBRU 2015)

QUDDIESA

OMELIJA TAL-QDUSIJA TIEGĦU L-PAPA

Stadju Komunali “Artemio Franchi”, Firenze

It-Tlieta 10 ta’ Novembru 2015

Fil-Vanġelu tal-lum Ġesù lid-dixxipli tiegħu jagħmlilhom żewġ mistoqsijiet.  L-ewwel waħda: “In-nies min tgħid li hu Bin il-bniedem?” (Mt 16:13) hi mistoqsija li turi kemm il-qalb u l-ħarsa ta’ Ġesù huma miftuħa għal kulħadd.  Lil Ġesù jinteressah dak li taħseb in-nies mhux biex jikkuntentaha, imma biex jista’ jikkomunika magħha.  Jekk ma jkunx jaf x’qed taħseb in-nies, id-dixxiplu jiżola ruħu u jibda jiġġudika n-nies skond x’jaħseb hu u l-konvinzjonijiet tiegħu.  Kuntatt tajjeb mar-realtà, ma’ dak li għaddejja minnu n-nies, bid-dmugħ u l-ferħ tagħha, hu l-uniku mod biex nistgħu ngħinuha, niffurmawha u nikkomunikaw magħha.  Hu l-uniku mod biex inkellmu lill-qlub tan-nies billi mmissu l-esperjenza tagħhom ta’ kuljum: ix-xogħol, il-familja, il-problemi tas-saħħa, it-traffiku, l-iskola, is-servizzi tas-saħħa u l-bqija…  Hu l-uniku mod biex niftħu qalbhom ħalli jisimgħu lil Alla.  Fir-realtà, meta Alla ried jitkellem magħna, sar bniedem.  Id-dixxipli ta’ Ġesù m’għandhom qatt jinsew mnejn ġew magħżula, jiġifieri minn qalb in-nies, u m’għandhom qatt jaqgħu għat-tentazzjoni li jkollhom atteġġjamenti mbiegħda, bħallikieku dak li n-nies qed taħseb u tgħix ma jolqothomx jew m’hux importanti għalihom.

U dan jgħodd għalina wkoll.  U l-fatt li l-lum inġbarna biex niċċelebraw il-Quddiesa fi stadju sportiv ifakkarna f’dan.  Il-Knisja, bħal Ġesù, tgħix qalb in-nies u għan-nies.  Għalhekk il-Knisja, fl-istorja kollha tagħha, dejjem ġarret fiha l-istess mistoqsija: Min hu Ġesù għall-bnedmin tal-lum?

Anki l-Papa San Ljun il-Kbir, li kien mit-Toskana, u li l-lum qed niċċelebraw it-tifkira tiegħu, kellu f’qalbu din il-mistoqsija, din it-‘tensjoni’ appostolika biex jara li kulħadd jasal jagħraf lil Ġesù, u jsir jafU għal dak li hu tassew, mhux xi xbieha tiegħu mgħawġa mill-filosofiji u mill-ideoloġiji taż-żmien.

U għalhekk jeħtieġ nikbru fil-fidi personali fiH.  U hawn titfaċċa t-tieni mistoqsija li Ġesù jagħmel lid-dixxipli: “Imma intom, min tgħidu li jien?” (Mt 16:15).  Mistoqsija li għadha tidwi anki l-lum fil-kuxjenza tagħna d-dixxipli tiegħu, u hi deċiżiva għall-identità tagħna u l-missjoni tagħna.  Huwa biss jekk nagħrfu lil Ġesù fil-verità tiegħu li nkunu kapaċi nħarsu lejn il-verità tal-qagħda umana tagħna, u nkunu nistgħu nagħtu sehemna għall-umanizzazzjoni sħiħa tas-soċjetà.

Li nħarsu u nxandru l-fidi retta f’Ġesù Kristu hi l-qalba ta’ l-identità Nisranija tagħna, għax meta nagħrfu l-misteru ta’ l-Iben ta’ Alla magħmul bniedem nistgħu ninfdu fil-misteru ta’ Alla u fil-misteru tal-bniedem.

Għall-mistoqsija ta’ Ġesù jwieġeb Xmun: “Int il-Messija, l-Iben ta’ Alla l-ħaj” (v. 16).  Din it-tweġiba tiġbor fiha l-missjoni kollha ta’ Pietru u dak li għad ikun għall-Knisja l-ministeru Petrin, jiġifieri li jħares u jxandar il-verità tal-fidi; jiddefendi u jippromovi l-komunjoni bejn il-Knejjes kollha; iħares id-dixxiplina tal-Knisja.  Il-Papa Ljun kien u jibqa’, f’din il-missjoni, mudell eżemplari, kemm fit-tagħlim li bih idawwalna, u kemm fil-ġesti tiegħu kollhom ħlewwa, ħniena u qawwa ta’ Alla.

Anki l-lum, għeżież ħuti, il-ferħ tagħna hu li nistgħu naqsmu flimkien din il-fidi u nwieġbu flimkien lill-Mulej Ġesù: “Għalina int il-Messija, l-Iben ta’ Alla l-ħaj”.  Il-ferħ tagħna hu wkoll li mmorru kontra l-kurrent u negħlbu l-opinjoni ta’ żmienna, li, bħal dak iż-żmien, m’hux jirnexxilha tilmaħ f’Ġesù iżjed minn profeta jew minn għalliem.  Il-ferħ tagħna hu li nistgħu nagħrfu fiH il-preżenza ta’ Alla, il-Mibgħut tal-Missier, l-Iben li ġie biex isir strument ta’ salvazzjoni għall-bnedmin kollha.  Din l-istqarrija ta’ fidi li għamel Xmun Pietru tibqa’ tgħodd għalina wkoll.  Hi ma tirrappreżentax biss il-bażi tas-salvazzjoni tagħna, imma wkoll it-triq li fiha titwettaq u l-mira li lejha miexja.

Fl-għeruq tal-misteru tas-salvazzjoni fil-fatt hemm ir-rieda ta’ Alla ħanin, li ma jċedix quddiem min ma jifhmux, quddiem il-ħtija u l-miżerja tal-bniedem, imma jingħata lilu sa ma jsir Huwa nnifsu bniedem biex jiltaqa’ ma’ kull persuna fil-qagħda konkreta tagħha.  Din l-imħabba ħanina ta’ Alla hi dak li Xmun Pietru jagħraf fuq wiċċ Ġesù.  L-istess wiċċ li aħna msejħin nagħrfu fix-xejriet li bihom il-Mulej żgurana mill-preżenza tiegħu fostna: fil-Kelma tiegħu, li ddawwal id-dlamijiet ta’ moħħna u ta’ qalbna; fis-Sagramenti, li jqajmuna minn kull mewt tagħna għal ħajja ġdida; fil-komunjoni fraterna, li l-Ispirtu s-Santu jnissel qalb id-dixxipli tiegħu; fl-imħabba bla tarf, li ssir qadi ġeneruż u premuruż lejn kulħadd; fil-fqir, li jfakkarna kif Ġesù ried li l-ogħla rivelazzjoni tiegħu nnifsu u tal-Missier ikollha x-xbieha tal-mislub umiljat.

Din il-verità tal-fidi hi verità li tiskandalizza, għax titlob minna li nemmnu f’Ġesù, li, għalkemm kien Alla, tbattal, tbaxxa għall-qagħda ta’ qaddej, sal-mewt tas-salib, u għalhekk Alla għamlu Sid ta’ l-univers (ara Fil 2:6-11).  Hi l-verità li sal-lum għadha tagħti skandlu lil min ma jittollerax il-misteru ta’ Alla stampat fuq wiċċ Kristu.  Hu l-verità li ma nistgħux intiegħmu u nħaddnu jekk, kif jgħid San Pawl, ma nidħlux fil-misteru ta’ Ġesù Kristu, u mingħajr ma nagħmlu tagħna l-istess sentimenti tiegħu (ara Fil 2:5).  Mill-Qalb ta’ Kristu biss nistgħu nifhmu, nistqarru u ngħixu l-verità tiegħU.

Fir-relatà, il-komunjoni bejn divin u uman, imwettqa b’mod sħiħ f’Ġesù, hi d-destinazzjoni tagħna, fejn trid tasal l-istorja tal-bniedem skond il-pjan tal-Missier.  Hi l-beatitudni tal-laqgħa bejn id-dgħufija tagħna u l-kobor tiegħU, bejn iċ-ċokon tagħna u l-ħniena tiegħU li timla kull limitu tagħna.  Imma din id-destinazzjoni m’hix biss ix-xefaq li jdawwal il-mixja tagħna, imma hi dik li tiġbidna bil-qawwa ħelwa tagħha; hi dik li nibdew induqu minn issa u ngħixu minn hawn u nibnuha jum wara l-ieħor b’kull ġid li niżirgħu madwarna.  Din hi ż-żerriegħa li tgħinna noħolqu umanità ġdida, imġedda, fejn ħadd ma jitħalla mal-ġenb jew jintrema; fejn min jaqdi hu l-ikbar; fejn iċ-ċkejknin u l-foqra huma milqugħa u megħjuna.

Alla u l-bniedem m’humiex żewġt itruf kontra xulxin: huma minn dejjem fittxew lil xulxin, għax Alla jagħraf fil-bniedem ix-xbieha tiegħu u l-bniedem jista’ jagħraf lilu nnifsu biss jekk iħares lejn Alla.  Dan hu l-veru għerf, li l-Ktieb ta’ Bin Sirak isemmi bħala karatteristika ta’ min jagħżel li jimxi wara l-Mulej.  Hu l-għerf ta’ San Ljun il-Kbir, frott ta’ ħafna elementi li fih jiltaqgħu flimkien: kelma, intelliġenza, talb, tagħlim, memorja.  Imma San Ljun ifakkarna wkoll li ma jistax ikun hemm għerf veru jekk mhux fir-rabta ma’ Kristu u fil-qadi lill-Knisja.  Din hi t-triq li fiha niltaqgħu mal-bniedem u nistgħu nagħmlu dan bl-ispirtu tas-Samaritan it-tajjeb.  Mhux ta’ b’xejn li l-umaniżmu, li tiegħu Firenze kienet xhud fl-aktar żminijiet kreattivi tagħha, dejjem kellu l-wiċċ ta’ l-imħabba karitattiva.  Jalla dan il-wirt ikun għammiel b’umaniżmu ġdid għal din il-belt u għall-Italja kollha.

* * *

Nixtieq nirringrazzjakom ta’ din il-merħba sabiħa, matul il-jum kollu.  Nirringrazzja lis-Sinjur Kardinal Arċisqof; nirringrazzja lill-Kardinali u Isqfijiet tal-Konferenza Episkopali Taljana, bil-President tagħha.  Dak kollu li l-lum għamiltu għalija, hu xhieda.  Grazzi lil kull wieħed minnkom.

Imma nixtieq nirringrazzja b’mod speċjali lill-ħabsin, li bnew dan l-altar, fejn il-lum ġie Ġesù.  Grazzi li għamiltu dan għal Ġesù.

U lilkom ilkoll, grazzi ħafna.  U jekk jogħġobkom, nitlobkom titolbu għalija.

[Barka]

miġjuba mit-Taljan għall-Malti minn Francesco Pio Attard