QUDDIESA GĦALL-GĦELUQ TAS-SINODU
TAL-ISQFIJIET
KAPPELLA
PAPALI
OMELIJA
TAL-QDUSIJA TIEGĦU FRANĠISKU
Bażilika
tal-Vatikan
It-XXX Ħadd ta’
Matul is-Sena, 27 ta’ Ottubru 2019
Il-Kelma ta’ Alla
llum tgħinna nitolbu permezz ta’ tliet persunaġġi: fil-parabbola
ta’ Ġesù nsibu jitolbu l-Fariżew u l-pubblikan, waqt li l-Ewwel Qari
jitkellem fuq it-talba tal-fqajjar.
1. It-talba tal-Fariżew tiftaħ hekk: “O Alla, niżżik ħajr”. Bidu
mill-aqwa, għax l-aqwa talba hi dik tal-gratitudni, hi dik
tat-tifħir. Imma dritt naraw x’inhi r-raġuni li għaliha qed jirringrazzja:
“li m’iniex bħall-bqija tal-bnedmin” (Lq 18:11). U jispjega wkoll din
ir-raġuni: isum darbtejn fil-ġimgħa, meta dak iż-żmien
l-obbligu kien darba fis-sena; iħallas l-għexur ta’ kulma
jdaħħal, meta dan kien preskritt biss fuq l-iżjed prodotti importanti
(ara Dewt 14:22ss). Insomma, jiftaħar għax qed iwettaq bl-aħjar
mod xi preċetti partikolari. Imma jinsa l-ikbar wieħed fosthom: li jħobb lil Alla u lill-proxxmu
(ara Mt 22:36-40). Mimli biċ-ċertezza fih innifsu, bil-ħila
tiegħu li josserva l-Kmandamenti, bil-merti tiegħu u bil-virtujiet
tiegħu, kollox idur miegħu nnifsu. It-traġedja ta’ dan
il-bniedem hi li m’għandux imħabba. Imma mqar l-aqwa affarijiet,
mingħajr imħabba, ma jiswew għal xejn, kif jgħid San Pawl
(ara 1 Kor 13). U mingħajr imħabba, xi jkun ir-riżultat? Li
fl-aħħar, flok jitlob, jispiċċa jagħmel eloġju tiegħu
nnifsu. Fil-fatt lill-Mulej ma jitolbu xejn, għax ma jħossux
fil-bżonn jew midjun miegħu, anzi jħoss li Hu għandu x’jagħtih.
Qiegħed fit-Tempju tal-Mulej, imma jipprattika reliġjon oħra, ir-reliġjon tal-jien. U tant
gruppi “illustri”, “Insara Kattoliċi”, jimxu f’din it-triq.
U barra lil Alla,
jinsa wkoll il-proxxmu, anzi jistkerrhu: għalih m’għandux prezz,
m’għandux valur. Iħossu aqwa mill-oħrajn, li jsejħilhom,
litteralment, “il-fdalijiet, li baqa’” (“loipoi”, Lq 18:11). Jiġifieri
huma ż-“żejda”, huma skart li wieħed għandu jitbiegħed
minnu. Kemm drabi naraw din id-dinamika sseħħ fil-ħajja u
fl-istorja! Kemm drabi min qiegħed quddiem, bħall-Fariżew meta
mqabbel mal-pubblikan, itella’ ħitan biex ikabbar id-distanzi, u hekk
lill-oħrajn iġibhom iktar żibel. Jew iżommhom bħala
nies li għadhom lura jew ta’ ftit valur, jiskterrah it-tradizzjonijiet
tagħhom, irid jeqred l-istorja tagħhom, jeħdilhom it-territorji
tagħhom, jużurpalhom ġidhom. Meta pretensjonijiet ta’
superjorità jispiċċaw f’oppressjonijiet u sfruttamenti, anki llum –
dan rajnieh fis-Sinodu meta tkellimna dwar l-isfruttament tal-ħolqien,
tan-nies, ta’ dawk li jgħixu fl-Amażonja, dwar it-traffikar
tal-persuni, il-kummerċ tal-persuni! L-iżbalji tal-imgħoddi ma
kinux biżżejjed biex nieqfu nħarbtu lill-oħrajn u nikkawżaw
ġrieħi lil ħutna u lil oħtna l-art: rajniehom
fil-wiċċ sfreġjat tal-Amażonja. Ir-reliġjon tal-jien
għadha għaddejja, turi wiċċ b’ieħor bir-riti u
t-“talb” tagħha – ħafna huma Kattoliċi, jistqarru li huma
Kattoliċi, imma nsew li huma Nsara u umani –, tinsa l-vera qima ta’ Alla
x’inhi, dik li tgħaddi dejjem mill-imħabba tal-proxxmu. Anki l-Insara
li jitolbu u jmorru l-quddiesa l-Ħadd huma sudditi ta’ din
ir-reliġjon tal-jien. Nistgħu nħarsu ġo fina stess u naraw
jekk għalina wkoll hemmx min hu inferjuri, ta’ min jiskartah, imqar jekk
biss bil-kliem. Nitolbu l-grazzja li ma nħossux li aħna superjuri, li
ma naħsbux li għandna kollox f’postu, li ma nsirux ċiniċi u
niżżuffjettaw b’ħaddieħor. Nitolbu lil Ġesù jfejjaqna
mit-tqassis u t-tgergir fuq l-oħrajn, miż-żebliħ ta’ xi persuna
oħra: dawn ħwejjeġ li ma jogħġbuhx lil Alla. U
providenzjalment, illum f’din il-quddiesa għandna magħna mhux biss
l-indiġeni tal-Amażonja: anki lill-iktar foqra tas-soċjetajiet
żviluppati, ħutna l-morda tal-Komunità tal-Arche. Jinsabu hawn
magħna, fl-ewwel filliera.
2.
Ngħaddu għat-talba
l-oħra. It-talba tal-pubblikan min-naħa l-oħra
tgħinna nifhmu x’inhu li jogħġob lil Alla. Hu ma jitlaqx
mill-merti tiegħu, imma min-nuqqasijiet tiegħu; mhux mill-għana
tiegħu, imma mill-faqar tiegħu: mhux faqar ekonomiku – il-pubblikani
kienu għonja u kienu jdabbruha tajjeb anki b’mod ħażin, minn fuq
dahar in-nies ta’ pajjiżhom stess – imma jħoss il-faqar ta’ ħajtu,
għax fid-dnub qatt ma tista’ tħossok tgħix tajjeb. Dan
ir-raġel li jisfrutta lill-oħrajn jagħraf li hu fqir quddiem
Alla u l-Mulej jagħti widen għat-talba tiegħu, magħmula
minn seba’ kelmiet biss imma minn atteġġjamenti veri. Fil-fatt, waqt
li l-Fariżew jinsab quddiem bilwieqfa (ara v. 11), il-pubblikan jibqa’ ’l
bogħod u “anqas biss ried jerfa’ għajnejh lejn is-sema”, għax
jemmen li s-Sema jeżisti u huwa kbir, waqt li hu jħossu
żgħir. U “jħabbat fuq sidru” (ara v. 13), għax taħt sidru
hemm qalbu. It-talba tiegħu tinbet proprju mill-qalb, hi trasparenti:
iqiegħed quddiem Alla lil qalbu, u mhux l-apparenzi. Li titlob ifisser
tħalli lil Alla jara x’hemm ġo fik – hu Alla li jħares lejja
jiena u nitlob –, bla ma tippretendi mod ieħor, bla skużi, bla
ġustifikazzjonijiet. Tant drabi jdaħħkuna l-indimiet mimlija
ġustifikazzjonijiet. Iktar milli ndiema tidher qisha awtokanonizzazzjoni.
Għax mix-xitan jiġu n-nuqqas ta’ trasparenza u l-qerq – dawn huma
l-ġustifikazzjonijiet –, imma minn Alla d-dawl u l-verità, it-trasparenza
tal-qalb tiegħi. Kienet ħaġa sabiħa, u ta’ dan jien grat
ħafna, għeżież Padri u Aħwa Sinodali, li ddjalogajna
f’dawn il-ġimgħat bil-qalb, bis-sinċerità u b’mod skjett, waqt
li qegħidna quddiem Alla u ħutna t-taħbit u t-tamiet
tagħna.
Illum, meta
nħarsu lejn il-pubblikan, niskopru mill-ġdid mnejn
għandna nitilqu: milli nemmnu li aħna fil-bżonn tas-salvazzjoni,
ilkoll kemm aħna. Dan hu l-ewwel pass tar-reliġjon ta’ Alla,
li hi ħniena lejn min jagħraf il-faqar tiegħu. Imma l-għerq
ta’ kull żball spiritwali, kif kienu jgħallmu l-irħieb
tal-qedem, hu li naħsbu li aħna ġusti. Meta naħsbu li
aħna ġusti nkunu naqflu barra minn darna lil Alla, li waħdu hu
ġust. Hu tant importanti dan l-atteġġjament ta’ tluq li Alla
jurihulna b’konfront paradossali, billi jqiegħed flimkien fil-parabbola
l-persuna l-iżjed qaddisa u devota ta’ dak iż-żmien,
il-Fariżew, u l-midneb pubbliku per eċċellenza, il-pubblikan. U
l-ġudizzju jinqaleb ta’ taħt fuq: min hu bravu imma
prużuntuż ifalli; min hu diżastruż imma umli jiġi
mgħolli minn Alla. Jekk inħarsu ġewwa fina bis-sinċerità,
naraw li hemm it-tnejn li huma, il-pubblikan u l-Fariżew. Aħna
xi ftit pubblikani, għax midinbin, u xi ftit Fariżej, għax
prużuntużi, kapaċi niġġustifikaw lilna nfusna,
kampjuni f’li niġġustifikaw ruħna b’arti! Mal-oħrajn din
spiss taħdem, imma ma’ Alla le. B’Alla ma nidħkux. Nitolbu l-grazzja
li nħossuna fil-bżonn tal-ħniena, foqra minn ġewwa.
Għalhekk ukoll jagħmlilna tajjeb li niffrekwentaw il-foqra, biex
niftakru li aħna foqra, biex niftakru li fi klima ta’ faqar interjuri biss
taħdem is-salvazzjoni ta’ Alla.
3. U hekk naslu
għat-talba tal-fqajjar,
tal-Ewwel Qari. Din, jgħid Bin Sirak, “tinfed is-sħab” (35:17). Waqt
li t-talba ta’ min jippretendi li hu ġust tibqa’ l-art, mgħaffġa
mill-qawwa tal-gravità tal-egoiżmu, dik tal-fqajjar titla’ dritt
għand Alla. Is-sens tal-fidi tal-Poplu ta’ Alla lemaħ fil-foqra
“l-purtinara tas-Sema”: dak is-sensus
fidei li kien nieqes fid-dikjarazzjoni [tal-Fariżew]. Huma li se jiftħulna beraħ jew inqas
il-bibien tal-ħajja ta’ dejjem, huma li ma qisux ruħhom sidien f’din
il-ħajja, li ma poġġewx lilhom infushom qabel l-oħrajn, li
f’Alla biss kellhom kull ġid tagħhom. Huma ikoni ħajja
tal-profezija Nisranija.
F’dan is-Sinodu
kellna l-grazzja li nisimgħu l-ilħna tal-foqra u nirriflettu fuq
il-prekarjetà ta’ ħajjithom, mhedda minn mudelli ta’ żvilupp li
jdabbruha tajjeb minn fuq darhom. Imma, proprju f’din il-qagħda,
ħafna tawna xhieda li hu possibbli tħares lejn ir-realtà b’mod
differenti, u tilqagħha b’dirgħajk miftuħa bħala don,
tgħix fil-ħolqien mhux bħala mezz biex tisfruttah imma
bħala dar biex tħarisha, tafda f’Alla. Hu Missier li, kif jgħidilna
mill-ġdid Bin Sirak, “jagħti widen għat-talba tal-magħkus”
(v. 13). U kemm drabi, anki fil-Knisja, l-ilħna tal-foqra ma jiġux
mismugħa jew isibu min jiddieħak bihom jew irid isikkithom għax
huma skomdi. Nitolbu l-grazzja li nagħrfu nagħtu widen għall-karba
tal-foqra: hi l-karba tat-tama
tal-Knisja. Il-karba tal-foqra hi l-karba tat-tama tal-Knisja. Jekk
nagħmlu tagħna l-karba tagħhom, anki t-talba tagħna,
nistgħu nibqgħu ċerti, tinfed is-sħab.
miġjuba mit-Taljan għall-Malti minn
Francesco Pio Attard