QUDDIESA U KANONIZZAZZJONI TAL-BEATI:
- VINĊENZ GROSSI
- MARIJA TA’ L-IMMAKULATA KUNĊIZZJONI
- LUDOVIKU MARTIN U MARIJA AZELIA GUÉRIN
OMELIJA TAL-QDUSIJA TIEGĦU FRANĠISKU
Pjazza San Pietru
Id-XXIX Ħadd ta’ Matul is-Sena, 18 ta’ Ottubru 2015
Il-qari mill-Iskrittura l-lum jippreżentalna t-tema tal-qadi u jsejħilna nimxu wara Ġesù fit-triq ta’ l-umiltà u tas-salib.
Il-profeta Isaija jurina l-figura tal-Qaddej ta’ Jaħweh (53:10-11) u l-missjoni tiegħu ta’ salvazzjoni. Għandna hawn persunaġġ li ma jiftaħarx b’xi arblu tar-razza illustri, hu mżeblaħ, mistmerr minn kulħadd, espert fit-tbatija. Wieħed li ħadd ma jattribwilu xi kisbiet grandjużi, lanqas diskorsi ċelebri, imma li jwettaq il-pjan ta’ Alla permezz ta’ preżenza umli u siekta u permezz tat-tbatija tiegħu. Fil-fatt, il-missjoni tiegħu jwettaqha permezz tat-tbatija, u hekk jista’ jifhem lil min qed ibati, u billi jerfa’ l-madmad tal-ħtijiet ta’ l-oħrajn u jpatti għalihom. L-emarġinazzjoni u t-tbatija tal-Qaddej ta’ Alla, imtawla sa mewtu, iħallu l-frott, u hekk jaslu biex jeħilsu u jifdu l-kotra.
Ġesù hu l-Qaddej tal-Mulej: ħajtu u mewtu, kollha kemm huma fl-għamla ta’ qadi (ara Fil 2:7), kienu kawża tal-fidwa tagħna u tar-rikonċiljazzjoni tal-bnedmin ma’ Alla. Il-kerygma, qalba tal-Vanġelu, tixhdilna li fil-mewt u l-qawmien tiegħu seħħu l-profeziji tal-Qaddej tal-Mulej. Ir-rakkont ta’ San Mark jiddeskrivilna x-xena ta’ Ġesù jiddibatti mad-dixxipli Ġakbu u Ġwanni, li – imġiegħla minn ommhom – riedu joqogħdu fuq il-lemin u fuq ix-xellug tiegħu fis-saltna ta’ Alla (ara Mk 10:37), xtaqu postijiet ta’ ġieħ, skond viżjoni ġerarkika li kellhom huma ta’ din l-istess saltna. Il-perspettiva tagħhom hi iktar u iktar imtappna minn ħolm ta’ suċċessi fuq din l-art. Ġesù għalhekk jagħti l-ewwel “skoss” lil dawk il-konvinzjonijiet tad-dixxipli billi jfakkarhom x’inhi l-mixja tiegħu fuq din l-art: “Il-kalċi li se nixrob jien tixorbuh, iva, u titgħammdu wkoll bil-magħmudija li biha se nitgħammed jien; imma li wieħed joqgħod fuq il-lemin jew fuq ix-xellug tiegħi, din m’hijiex ħaġa tiegħi li nagħtiha jien, imma hi għal dawk li għalihom kienet imħejjija” (vv. 39-40). Bix-xbieha tal-kalċi, Hu jiżgura lil dawn it-tnejn il-possibbiltà li jitwaħħdu sa l-aħħar mad-destin tiegħu ta’ tbatija, imma mingħajr ma jiggarantilhom il-postijiet ta’ ġieħ li xtaqu. It-tweġiba tiegħu hi stedina biex jimxu warajh fit-triq ta’ l-imħabba u tal-qadi, u jwarrbu t-tentazzjoni mondana li jridu jispikkaw u jikkmandaw fuq l-oħrajn.
Quddiem nies li moħħha biex tikseb poter u suċċess, biex tidher, quddiem nies li trid min jagħraf il-merti tagħha, ix-xogħol tagħha, id-dixxipli huma msejħin jagħmlu l-kuntrarju. Għalhekk iwissihom: “Tafu intom, dawk in-nies, li l-bnedmin jgħodduhom bħala kapijiet tal-pagani, jaħkmu fuqhom, u l-kbarat tagħhom iħaddmu s-setgħa tagħhom fuqhom. Fostkom ma għandux ikun hekk, imma min irid ikun kbir fostkom, għandu jkun qaddej tagħkom” (vv. 42-44). B’dawn il-kelmiet juri li l-qadi hu l-istil ta’ awtorità li għandu jitħaddem fil-komunità Nisranija. Min jaqdi lill-oħrajn u hu tassew bla ebda ġieħ ta’ xejn ikun qed iħaddem il-vera awtorità fil-Knisja. Ġesù jistedinna nibdlu l-mentalità tagħna u ngħaddu mill-kilba tas-setgħa għall-ferħ ta’ min jinħeba minn għajnejn in-nies biex jaqdi; biex inqaċċtu l-istint tal-ħakma fuq l-oħrajn u nħaddmu l-virtù ta’ l-umiltà.
U wara li ppreżenta l-mudell li m’għandux jiġi imitat, joffri lilu nnifsu bħala ideal lejn xiex inħarsu. Fl-imġiba ta’ l-Imgħallem il-komunità tista’ ssib il-motivazzjoni għal perspettiva ġdida ta’ ħajja: “Għax hekk ukoll Bin il-bniedem, hu ma ġiex biex ikun moqdi, imma biex jaqdi u biex jagħti ħajtu b’fidwa għall-kotra” (v. 45). Fit-tradizzjoni Biblika, Bin il-bniedem hu dak li jirċievi minn għand Alla “ħakma, ġieħ u saltna” (Dan 7:14). Ġesù jimla b’sens ġdid din ix-xbieha u jippreċiża li Hu għandu l-ħakma għax hu qaddej, il-ġieħ għax kapaċi jitbaxxa, is-saltna għax hu miftuħ biex jagħti ħajtu sħiħa bħala don. Fil-fatt, hu bil-passjoni u l-mewt tiegħu li Hu jirbaħ l-aħħar post, jilħaq l-ikbar livell ta’ qadi, u jagħmel minn dan kollu don għall-Knisja tiegħu.
Ma jaqblu xejn ma’ xulxin il-mod kif nifhmu s-setgħa skond il-kriterji tad-dinja u l-qadi umli li għandu jikkaratterizza l-awtorità skond it-tagħlim u l-eżempju ta’ Ġesù. L-ambizzjoni u l-karreriżmu ma jaqblu xejn mal-mixja wara Kristu; l-unuri, is-suċċess, il-fama, it-trijonfi ta’ din l-art ma jaqblux mal-loġika ta’ Kristu msallab. Min-naħa l-oħra, Ġesù “espert fit-tbatija” jaqbel sew mat-tbatija tagħna. Dan tfakkarhulna l-Ittra lil-Lhud, li tippreżenta lil Kristu bħala l-qassis il-kbir li f’kollox jaqsam magħna fil-qagħda tagħna ta’ bnedmin, barra fid-dnub: “Għax aħna ma għandniex qassis il-kbir li ma jistax jagħder id-dgħufija tagħna, imma għandna wieħed li kien imġarrab bħalna f’kollox, minbarra d-dnub” (4:15). Essenzjalment Ġesù jħaddem saċerdozju ta’ ħniena u ta’ kompassjoni. Hu għamel l-esperjenza diretta tad-diffikultajiet tagħna, jaf minn ġewwa l-qagħda umana tagħna; billi ma ġarrabx id-dnub, dan ma jżommux milli jifhem lill-midinbin. Il-glorja tiegħu m’hix dik ta’ l-ambizzjoni jew tal-kilba għall-ħakma, imma l-glorja ta’ l-imħabba lejn il-bnedmin, billi jieħu fuqu u jaqsam magħhom fid-dgħufija tagħhom u joffrilhom il-grazzja li tfejjaq, iseħibhom bi ħlewwa bla tarf, iseħibhom fil-mixja mqallba ta’ ħajjithom.
Kull wieħed u waħda minna, bħala mgħammed, għandu sehem mis-saċerdozju ta’ Kristu; il-fidili lajċi għandhom sehem fis-saċerdozju komuni, is-saċerdoti fis-saċerdozju ministerjali. Għalhekk, ilkoll nistgħu nirċievu l-imħabba li tgelgel mill-Qalb miftuħa tiegħu, kemm għalina nfusna u kemm għall-oħrajn: insiru “kanali” ta’ mħabbtu, tal-ħniena tiegħu, speċjalment għal dawk kollha li qed ibatu, huma muġugħa, qalbhom maqtugħa jew iħossuhom waħidhom.
Dawk li l-lum ġew ipproklamati Qaddisin, il-ħin kollu qdew b’umiltà u mħabba straordinarja lil ħuthom, u hekk saru jixbhu lill-Imgħallem Divin. San Vinċenz Grossi kien kappillan żelanti, dejjem ħsiebu fil-ħtiġijiet tal-poplu tiegħu, speċjalment fid-dgħufijiet taż-żgħażagħ. Għal kulħadd qasam b’ħeġġa l-ħobż tal-Kelma u sar Samaritan it-tajjeb għal dawk l-iktar fil-bżonn.
Santa Marija ta’ l-Immakulata Kunċizzjoni xorbot mill-għejun tat-talb u tal-kontemplazzjoni, u hekk għexet hi qabel xejn b’umiltà kbira l-qadi ta’ l-iżjed ċkejknin, b’attenzjoni partikulari għal ulied il-foqra u għall-morda.
Il-koppja qaddisa Ludoviku Martin u Marija Azelia Guérin għexu l-qadi Nisrani fil-familja, billi jum wara jum bnew ambjent mimli fidi u mħabba; u f’din il-klima tnisslu u trawmu l-vokazzjonijiet ta’ wliedhom bniet, fosthom Santa Teresa tal-Bambin Ġesù.
Ix-xhieda kollha dawl ta’ dawn il-Qaddisin ġodda tixprunana biex nipperseveraw fit-triq tal-qadi hieni lil ħutna, u nafdaw fl-għajnuna ta’ Alla u fil-ħarsien matern ta’ Marija. Mis-Sema huma jħarsuna u jweżnuna bl-interċessjoni qawwija tagħhom.
miġjuba mit-Taljan għall-Malti minn Francesco Pio Attard