ŻJARA PASTORALI FIL-PARROĊĊA RUMANA TA’
“SAN GIUSEPPE ALL’AURELIO”
OMELIJA TAL-QDUSIJA TIEGĦU FRANĠISKU
It-III Ħadd ta’ l-Avvent, 14 ta’ Diċembru 2014
Dan il-Ħadd il-Knisja tantiċipa xi ftit il-ferħ tal-Milied, u għalhekk jissejjaħ “Ħadd il-ferħ”. F’dan iż-żmien ta’ tħejjija għall-Milied, għall-Quddiesa nilbsu l-vjola, imma l-lum għandna dan l-ilbies roża, għax beda jwarrad il-ferħ tal-Milied. U l-ferħ tal-Milied hu ferħ speċjali; imma hu ferħ li ma jtulx biss għal nhar il-Milied, għax hu għall-ħajja kollha tan-Nisrani. Hu ferħ seren, ħiemed, ferħ li dejjem isieħeb lin-Nisrani. Anki fil-waqtiet iebsin, fil-waqtiet ta’ diffikultà, dan il-ferħ ikun hemm u jissarraf f’paċi. In-Nisrani, jekk hu veru Nisrani, ma jitlef qatt il-paċi f’qalbu, lanqas fit-tbatija. Dik il-paċi hi don tal-Mulej. Il-ferħ Nisrani hu don tal-Mulej. “Eħħ, Dun, aħna nagħmlu pranzu tajjeb, u kulħadd ikun kuntent”. Din ħaġa sabiħa, pranzu tajjeb ma jagħmilx ħażin; imma m’hux dan il-ferħ Nisrani li dwaru qed nitkellmu l-lum, il-ferħ Nisrani hu ħaġa oħra. Iwassalna anki biex nagħmlu festa, veru, imma hu ħaġa oħra. U għalhekk il-Knisja trid turina liema hu dan il-ferħ Nisrani.
L-Appostlu San Pawl lit-Tessalonkin jgħidilhom: “Ħuti, ifirħu dejjem”. U kif nista’ nkun ferħan? Hu jgħid: “Itolbu bla heda, u f’kollox roddu ħajr lil Alla”. Il-ferħ Nisrani nsibuh fit-talb, jiġi mit-talb u anki mir-radd ta’ ħajr tagħna lil Alla: “Grazzi, Mulej, ta’ tant ħwejjeġ sbieħ!”. Imma hemm persuni li ma jafux jirringrazzjaw lil Alla: dejjem ifittxu fuq xiex igergru. Kont naf soru – ’il bogħod minn hawn! – u din is-soru kienet twajba, kienet tħabrek… imma ħajjitha kienet tgħaddiha tgerger, tgerger fuq kull ma jiġri… Fil-kunvent kienu jsejħulha “Swor Lamentela”, tifhem għaliex. Imma n-Nisrani ma jistax ikun li jgħix hekk, dejjem jara kif kif ħa jgerger: “Dak għandu xi ħaġa li jien m’għandix, dak… Rajt x’ġara?…”. Dan m’hux atteġġjament Nisrani! U ħażin li hemm Insara b’wiċċ l-askri, b’wiċċ imkemmex bid-dwejjaq, li ma jafx bi sliem. Qatt, qatt ma kien hemm qaddis jew qaddisa li kellhom wiċċ funebri, qatt! Il-qaddisin dejjem b’wiċċhom ferħan. Jew ta’ l-inqas, fit-tbatija, wiċċ sielem. L-ogħla tbatija, il-martirju ta’ Ġesù: Hu kellu dik il-paċi fuq wiċċu u ħsiebu kien fl-oħrajn: f’ommu, fi Ġwanni, fil-ħalliel… kien moħħu fl-oħrajn.
Biex ikollna dan il-ferħ Nisrani, l-ewwel irridu nitolbu; it-tieni, irroddu ħajr. U kif nagħmel biex irrodd ħajr? Ħares lura lejn ħajtek, u aħseb f’tant ħwejjeġ tajbin li tatek il-ħajja: tant. “Dun, veru li qed tgħid, imma jien ġarrabt ukoll tant azzjonijiet ħżiena!” – “Iva, veru, dan jiġri lil kulħadd. Imma int aħseb fil-ħwejjeġ tajba” – “Jien kbirt f’familja Nisranija, kelli ġenituri Nsara, għall-grazzja ta’ Alla għandi xogħol, il-familja tiegħi m’hix tbati ġuħ, kollha b’saħħitna…”. Ma nafx, imma hemm tant affarijiet, u rodd ħajr lil Alla tagħhom. U hekk nidraw nifirħu. Nitolbu, irroddu ħajr…
U mbagħad, l-Ewwel Qari jissuġġerilna dimensjoni oħra li tista’ tgħinna niksbu l-ferħ: li nwasslu lill-oħrajn l-aħbar it-tajba. Aħna Kristjani. “Kristjani” ġejja minn “Kristu”, u “Kristu” jfisser “il-midluk”. U aħna “midluka”: l-Ispirtu tal-Mulej fuqi, għax il-Mulej ikkonsagrani bid-dilka tiegħu. Aħna midlukin: Kristjani tfisser “midluka”. U għal xiex ġejna midlukin? Biex nagħmlu xiex? “Bagħatni nwassal il-bxara t-tajba” lil min? “Lill-fqajrin”, “indewwi l-ġrieħi lill-qlub miksura, inħabbar il-ħelsien lill-imjassrin, lill-ħabsin il-ħelsien mill-ħabs, biex inniedi s-sena tal-grazzja tal-Mulej” (ara Is 61:1-2). Din hi l-vokazzjoni ta’ Kristu u anki l-vokazzjoni ta’ l-Insara. Li mmorru għand l-oħrajn, għand dawk li għandhom bżonn, kemm ħtiġijiet materjali, kemm spiritwali… Tant nies li qed tbati minħabba fi problemi familjari… Inwasslu l-paċi hemm, inwasslu d-dilka ta’ Ġesù, dak iż-żejt ta’ Ġesù li jagħmel tant ġid u jfarraġ ir-ruħ.
Mela, biex ikollna dan il-ferħ fit-tħejjija tagħna għall-Milied, l-ewwel irridu nitolbu: “Mulej, agħmel li ngħix dan il-Milied bil-veru ferħ”. Mhux bil-ferħ tal-konsumiżmu li jwassalna sa l-24 ta’ Diċembru mimlijin tensjoni, għax “fadalli din, fadalli dik…”. Le, dan m’hux il-ferħ ta’ Alla. Nitolbu. It-tieni: irroddu ħajr lill-Mulej għall-ħwejjeġ tajba li tana. It-tielet, naħsbu kif nistgħu noħorġu niltaqgħu ma’ l-oħrajn, ma’ dawk li għandhom id-diffikultajiet, il-problemi – naħsbu fil-morda, f’tant problemi – biex inwasslulhom ftit tad-dilka, tal-paċi, tal-ferħ. Dan hu l-ferħ tan-Nisrani. Ftehimna? Bilkemm fadal ħmistax, ftit inqas: tlettax-il jum. F’dawn il-jiem, nitolbu. Imma tinsewx: nitolbu li jkollna l-ferħ tal-Milied. Irroddu ħajr lil Alla għal tant ħwejjeġ li tana, qabel xejn il-fidi. Din hi grazzja kbira. It-tielet, naħseb ftit fejn nista’ mmur biex inwassal ftit tas-serħan, ta’ paċi lil dawk li qed ibatu. Talb, radd il-ħajr u għajnuna lill-oħrajn. U hekk naslu għall-Milied tal-Midluk, ta’ Kristu, midluka bil-grazzja, bit-talb, bl-azzjoni ta’ grazzja u ta’ għajnuna lill-oħrajn.
Il-Madonna timxi magħna tul din it-triq li twassal għall-Milied. Imma ftakru: ifirħu, ifirħu!
miġjuba mit-Taljan għall-Malti minn Francesco Pio Attard