VJAĠĠ APPOSTOLIKU TAL-QDUSIJA TIEGĦU FRANĠISKU
FIS-SRI LANKA U L-FILIPPINI
(12-19 TA’ JANNAR 2015)
QUDDIESA U KANONIZZAZZJONI TAL-BEATU GIUSEPPE VAZ
OMELIJA TAL-QDUSIJA TIEGĦU
Galle Face Green, Colombo - L-Erbgħa 14 ta’ Jannar 2015
Din hi l-profezija mill-isbaħ li għadna kemm smajna fl-Ewwel Qari tal-lum. Isaija jħabbar sa minn qabel ix-xandir tal-Vanġelu ta’ Ġesù Kristu sa truf l-art. Din il-profezija għandha tifsira speċjali għalina li qed niċċelebraw il-kanonizzazzjoni tal-missjunarju kbir tal-Vanġelu San Ġużepp Vaz. Bħal għadd kbir ta’ missjunarji oħra fl-istorja tal-Knisja, hu wieġeb għall-kmand ta’ Kristu Rxoxt biex imorru jagħmlu dixxipli mill-ġnus kollha (ara Mt 28:19). Bi kliemu, imma fuq kollox bl-eżempju ta’ ħajtu, wassal lill-poplu ta’ dan il-pajjiż għall-fidi li tagħtina “sehem fost dawk li huma kkonsagrati lilu” (Atti 20:32).
F’San Ġużepp naraw sinjal elokwenti tat-tjieba u l-imħabba ta’ Alla għall-poplu tas-Sri Lanka. Imma fih nilmħu wkoll stimolu biex nipperseveraw fit-triq tal-Vanġelu, biex aħna stess nikbru fil-qdusija, u nagħtu xhieda tal-messaġġ evanġeliku ta’ rikonċiljazzjoni li għalih hu ddedika ħajtu.
Saċerdot Oratorjan, minn art twelidu Goa, San Ġużepp Vaz wasal f’dan il-pajjiż, imnebbaħ minn żelu missjunarju u minn imħabba kbira għal dawn in-nies. Minħabba fil-persekuzzjoni reliġjuża li kienet għaddejja, kien jilbes ta’ tallab, iwettaq id-dmirijiet saċerdotali tiegħu billi jiltaqa’ mal-fidili fis-sigriet, spiss bil-lejl. L-isforzi tiegħu taw qawwa spiritwali u morali lill-Kattoliċi assedjati. Hu kellu xewqa kbira li jaqdi lill-morda u l-batuti. Il-ministeru tiegħu ma’ dawk milquta mill-epidemija tal-ġidri f’Kandy kienet hekk apprezzata mir-Re, li ngħatatlu libertà akbar biex iħaddem l-istess ministeru. Minn Kandy seta’ jilħaq zoni oħra tal-gżira. Intefa’ b’ruħu u ġismu għall-ħidma missjunarja u miet, mifni bix-xogħol, fl-età ta’ disgħa u ħamsin sena, meqjum għal qdusitu.
San Ġużepp Vaz jibqa’ mudell u mgħallem għal ħafna raġunijiet, imma nixtieq nieqaf fuq tlieta minnhom.
Qabel xejn, hu kien saċerdot eżemplari. Hawn il-lum magħna hawn ħafna saċerdoti, reliġjużi rġiel u nisa, li, bħal San Ġużepp Vaz, huma kkonsagrati għas-servizz tal-Vanġelu ta’ Alla u għall-proxxmu. Inħeġġeġ lil kull wieħed u waħda minnkom biex tħarsu lejn San Ġużepp bħala gwida żgura. Hu jgħallimna noħorġu lejn il-periferiji, biex Ġesù Kristu jkun magħruf u maħbub kullimkien. Hu wkoll eżempju ta’ tbatija bis-sabar għall-kawża tal-Vanġelu, ta’ ubbidjenza għas-superjuri, ta’ għożża mimlija mħabba għall-Knisja ta’ Alla (ara Atti 20:28). Bħalna għex f’perjodu ta’ bidliet mgħaġġla u kbar; il-Kattoliċi kienu minoranza spiss maqsuma minn ġewwa; raw ostilità minn barra, saħansitra persekuzzjonijiet. Madankollu, magħqud kif kien il-ħin kollu fit-talb mal-Mulej mislub, kien kapaċi jsir għan-nies kollha ikona ħajja ta’ l-imħabba ħanina u rikonċiljanti ta’ Alla.
It-tieni nett, San Ġużepp uriena l-importanza li negħlbu l-firdiet reliġjużi fis-servizz għall-paċi. L-imħabba sħiħa tiegħu lejn Alla fetħitu għall-imħabba tal-proxxmu; hu ddedika l-ministeru tiegħu għal dawk fil-bżonn, kienu min kienu u kienu fejn kienu. L-eżempju tiegħu jissokta jnebbaħ il-lum ukoll lill-Knisja fis-Sri Lanka. Hi taqdi minn qalbha u b’mod ġeneruż lill-membri kollha tas-soċjetà. Ma tagħmilx distinzjoni bejn razza, twemmin, appartenenza tribali, qagħda soċjali jew reliġjon fis-servizz li tagħti permezz ta’ l-iskejjel, l-isptarijiet, il-kliniċi u bosta opri oħra ta’ karità. Hi ma titlob xejn iżjed ħlief il-libertà li tkompli miexja bil-missjoni tagħha. Il-libertà reliġjuża hi dritt uman fundamentali. Kull individwu għandu jkun liberu, waħdu jew flimkien ma’ oħrajn, li jfittex il-verità, li jesprimi b’mod miftuħ il-konvinzjonijiet reliġjużi tiegħu, ħieles minn intimidazzjonijiet u minn kostrizzjonijiet esterni. Kif tgħallimna l-ħajja ta’ San Ġużepp Vaz, il-qima awtentika ta’ Alla twassal mhux għad-diskriminazzjoni, għall-mibegħda u għall-vjolenza, imma għar-rispett tal-qdusija tal-ħajja, għar-rispett tad-dinjità u l-libertà ta’ l-oħrajn u għall-impenn mimli mħabba b’riżq il-ġid ta’ kulħadd.
Fl-aħħar nett, San Ġużepp joffrilna eżempju ta’ żelu missjunarju. Minkejja li kien ġie Ceylon biex jgħin u jwieżen il-komunità Kattolika, fil-karità evanġelika tiegħu hu wasal għand kulħadd. Ħalla warajh id-dar, il-familja, il-kumdità tal-postijiet familjari tiegħu, biex wieġeb għas-sejħa li jitlaq, li jitkellem dwar Kristu kull fejn imur. San Ġużepp kien jaf kif għandu joffri l-verità u l-ġmiel tal-Vanġelu f’kuntest multi-reliġjuż, b’rispett, dedikazzjoni, perseveranza u umiltà. Din hi t-triq anki għad-dixxipli ta’ Ġesù l-lum. Aħna msejħin “noħorġu” bl-istess żelu, bl-istess kuraġġ ta’ San Ġużepp, imma anki bis-sensibbiltà tiegħu, bir-rispett tiegħu għall-oħrajn, bix-xewqa li kellu li jaqsam magħhom dik il-kelma ta’ grazzja (ara Atti 20:32) li kapaċi tibnihom. Aħna msejħin biex inkunu dixxipli missjunarji.
Għeżież ħuti, nitlob li, fuq l-eżempju ta’ San Ġużepp Vaz, l-Insara ta’ dan il-pajjiż jistgħu jitwettqu fil-fidi u jagħtu kontribut ikbar għall-paċi, għall-ġustizzja u għar-rikonċiljazzjoni fis-soċjetà tas-Sri Lanka. Dan hu li jistenna Kristu minnkom. Dan hu li jgħallimkom San Ġużepp. Dan hu li l-Knisja qed titlob minnkom. Nafdakom ilkoll fit-talb tal-Qaddis ġdid tagħna, biex, f’għaqda mal-Knisja kollha mxerrda mad-dinja, intom tistgħu tgħannu għanja ġdida lill-Mulej u xxandru l-glorja tiegħu sa truf l-art. Għax kbir hu l-Mulej u jixraqlu kull tifħir (ara Salm 96:1-4)! Amen.
miġjub mit-Taljan għall-Malti minn Francesco Pio Attard