FESTA TAL-MAGĦMUDIJA TAL-MULEJ
ĊELEBRAZZJONI TAL-QUDDIESA
U MAGĦMUDIJA TA’ XI TRABI
OMELIJA TAL-QDUSIJA TIEGĦU FRANĠISKU
Kappella Sistina
Il-Ħadd 10 ta’ Jannar 2016
Erbgħin jum wara t-twelid tiegħu, lil Ġesù jeħduh it-Tempju. Marija u Ġużeppi ħaduh biex jippreżentawh lil Alla. Il-lum, fil-festa tal-Magħmudija tal-Mulej, intom il-ġenituri ġibtu lil uliedkom biex jirċievu l-Magħmudija, biex jirċievu dak li tlabtu fil-bidu, meta jien għamiltilkom l-ewwel mistoqsija: “Il-fidi. Għal ibni jien irrid il-fidi”. U hekk il-fidi tgħaddi minn ġenerazzjoni għall-oħra, bħala katina, mal-medda taż-żmien.
Dawn it-trabi, la jgħaddu s-snin, għad jieħdu postkom b’xi tarbija oħra f’idejhom – in-neputijiet tagħkom – u jitolbu l-istess ħaġa: il-fidi. Il-fidi li l-Magħmudija tagħtina. Il-fidi li l-Ispirtu s-Santu l-lum qed iġib fil-qalb, fir-ruħ, fil-ħajja ta’ dawn uliedkom.
Intom tlabtu l-fidi. Il-Knisja, meta tagħtikom ix-xemgħa mixgħula, se tgħidilkom biex tieħdu ħsieb tal-fidi ta’ dawn it-trabi. U, fl-aħħar, tinsewx li l-akbar wirt li intom tistgħu tħallu lil uliedkom hi l-fidi. Araw li ma tintilifx, li tkabbruha u tħalluha b’wirt.
Il-lum dan nawguralkom, f’dan il-jiem ta’ ferħ għalikom: nawguralkom li tkunu kapaċi trabbu lil dawn it-tfal fil-fidi u li l-ikbar wirt li huma jirċievu minn għandkom tkun sewwa sew il-fidi.
U parir wieħed biss: meta xi tarbija tibki għax bil-ġuħ, lill-ommijiet ngħidilkom: jekk it-tarbija tiegħek bil-ġuħ, agħtiha x’tiekol, bil-libertà kollha.
miġjuba mit-Taljan għall-Malti minn Francesco Pio Attard