Omelija tal-Papa Franġisku
Quddiesa ta' Għid il-Kbir
Pjazza San Pietru - 31 ta' Marzu 2013
Għeżież ħuti,
Il-bieraħ ġa kelli l-ferħ li niltaqa’ magħkom, u llum il-festa tagħna hija bil-wisq akbar għaliex qegħdin miġburin għall-Ewkaristija, f’Jum il-Mulej. Intom seminarisiti u novizzi, żgħażagħ fil-mixja vokazzjonali, li ġejjin minn kull parti tad-dinja: tirrapreżentaw iż-żgħożija tal-Knisja! Jekk il-Knisja hija l-Għarusa ta’ Kristu, f’ċertu sens intom tirrapreżentaw il-muement tal-għerusija tagħha, ir-rebbiegħa tal-vokazzjoni, l-istaġun tal-iskoperta, tal-verifika, tal-formazzjoni. U huwa staġun sabiħ wisq, li fih wieħed iqiegħed il-pedamenti tal-futur. Grazzi li ġejtu!
Illum, il-Kelma t’Alla tkellimna fuq il-missjoni. Minn fejn titwieled il-missjoni? It-tweġiba hija sempliċi: titwieled minn sejħa, dik tal-Mulej u min huwa msejjaħ minnu huwa biex ikun mibgħut. Liema huwa l-istil ta’ min ikun mibgħut? Liema huma l-punti ta’ riferenza tal-missjoni nisranija? Il-Qari li għadna kemm smajna jissuġġerulna tlieta: il-ferħ tal-faraġ, is-salib u t-talb.
1. L-ewwel element: il-ferħ tal-faraġ. Il-profeta Iżaija jitkellem ma’ poplu li kien għadu kif għadda il-perijodu skur tal-eżilju, kien rebaħ prova iebsa ħafna; imma issa għal Ġerusalemm wasal iż-żmien tal-faraġ’; is-swied il-qalb u l-biża’ iridu jagħmlu l-wisa’ għall-ferħ: “Ifirħu... thennew... aqbżu bil-ferħ” – jgħid il-Profeta (66,10). Hija stedina kbira għall-ferħ. Għaliex? Liema huwa l-motiv ta’ din is-sejħa għall-ferħ? Għaliex il-Mulej isawwab fuq il-Belt qaddisa u dawk li jgħammru fiha “xmara tfur” ta’ faraġ, xmara tfur ta’ faraġ – hekk mimlijin bil-faraġ – xmara tfur ta’ tenerezza materna: “Intom tintrefgħu fuq id-dirgħajn u jżiegħlu bikom fuq l-irkupptejn” (v 12). Meta l-omm tieħu t-tarbija fuq irkupptejha u żżiegħel biha, hekk il-Mulej jagħmel magħna u jagħmel issa magħna. Din hija x-xmara tfur tat-tenerezza li tagħtina daqshekk faraġ. “Bħal omm li tfarraġ lil binha, hekk jien infarraġkom” (v 13). Kull nisrani u fuq kollox aħna, aħna msejħin biex inwasslu dan il-messaġġ ta’ tama li jagħti serenita’ u ferħ: il-faraġ ta’ Alla, it-tenerezza tiegħu lejn kulħadd. Imma nistgħu nkunu dawk li jġibu dan il-faraġ jekk aħna l-ewwel nesperimentaw il-ferħ li aħna mfarrġa minnu, li aħna maħbubin minnu. Dan hu importanti sabiex il-missjoni tagħna tista’ tagħti l-frott: inħossu l-faraġ t’Alla u nittrassmettuh! Jiena xi drabi sibt persuni kkonsagrati li jibżgħu mill-faraġ t’Alla, u fqar huma, ikunu tturmentati għaliex jibżgħu minn din it-tenerezza ta’ Alla. Imma intom la tibżgħux, Intom tibżgħux, il-Mulej hu l-Mulej tal-faraġ, il-Mulej, tat-tenerezza. Il-Mulej hu missier u Hu qal li jagħmel magħna bħ#alma omm tagħmel mat-tarbija tagħha, bit-tenerezza tagħha. La tibżgħux mill-konmsolazzjoni tal-Mulej. L-istedina ta’ Iżaija għandha tinħass mill-ġdid fi qlubna: “Farrġu, farrġu l-poplu tiegħi” (40, 1) u dan isir missjoni. Aħna li nsibu l-Mulej li jfarraġna u mmorru biex infarrġu lill-poplu t’Alla. Din hija l-missjoni. In-nies illum għandha bżonn bla dubju ta’ kliem, imma fuq kollox għandha ħtieġa li aħna nagħtu xhieda tal-ġniena, tat-tenerezza tal-Mulej, li jsaħħan il-qalb, li jqajjem it-tama, li jiġbed lejn it-tajjeb. Il-ferħ li ġġib il-faraġ t’Alla!
2. It-tieni punt ta’ riferenza tal-missjoni huwa is-Salib ta’ Kristu. San Pawl waqt li jikteb lill-Galatin, jistqarr: “Ngħid għalija ma jkun qatt li niftaħar jekk mhux bis-salib ta’ Sidna Ġesu’ Kristu” (6, 14). U jitkellem dwar “stigmati”, jiġifieri tal-pjagi ta’ Ġesu’ Msallab, bħala s-sinjali, tal-marki distintivi tal-eżistenza tiegħu ta’ Appostlu tal-Evanġelju. Fil-ministeru tiegħu, Pawlu sperimenta it-tbatija, in-nuqqas ta’ ħila, kien mirbuħ, imma wkoll il-ferħ u l-faraġ. Dan hu l-misteru tal-għid ta’ Ġesu’: misteru ta’ mewt u ta’ qawmien. U huwa proprju l-fatt li ħalla lilu nnifsu jsir jixbah il-mewt ta’ Ġesu’ li għamel li San Pawl ikollu sehem mill-qawmien tiegħu, mir-rebħa tiegħu. Fis-siegħa tad-dlam, fis-siegħa tal-prova hemm preżenti u jaħdem diġa’ ż-żernieq tad-dawl u tas-salvazzjoni. Il-misteru tal-għid huwa l-qalb tħabbat tal-missjoni tal-Knisja! U jekk nibqgħu ġewwa f’dan il-misteru aħna jkollna lqugħ kemm ta’ dehra mondana u trijonfalistika tal-missjoni, kemm min-nuqqas ta’ kuraġġ li jista’ jiġi quddiem il-provi u quddiem il-fallimenti. Il-ħidma pastorali li tagħti l-frott, il-fekondita’ tat-tħabbir tal-Evanġelju ma ssirx la mis-suċċessi, l-anqas mill-fallimenti skont kriterji ta’ valuri umani, imma milli nkunu xebh tal-loġika tas-Salib ta’ Ġesu’, li hija l-loġika li toħroġ minnek innifsek u tingħata, il-loġika tal-imħabba. Huwa s-Salib – dejjem is-Salib bi Kristu, għaliex xi drabi joffrulna s-salib mingħajr Kristu: dan mhux sewwa! – Huwa s-Salib, dejjem is-Salib bi Kristu, li jiggarantixxi li l-missjoni tagħna tagħti frott. U huwa mis-Salib, att l-aktar għoli tal-ħniena u tal-imħabba, li nitwieldu bħala “ħolqien ġdid” (Gal 6, 15).
3. Fl-aħħar, it-tielet element: it-talb. Fl-Evanġelju smajna: “Itolbu mela lil Sid il-ħsad biex jibgħat ħaddiema għall-ħsad tiegħu” (Lq 10,2). Il-ħaddiema għall-ħsad ma jintgħażlux b’kampanji pubbliċitarji jew appelli għal servizz ta’ ġenerożita’, imma huma “magħżulin” u “mibgħutin” minn Alla. Huwa Hu li jagħżel, huwa Hu li jibgħat, huwa Hu li jagħti l-missjoni. Għalhekk huwa important t-talb. Il-Knisja, irrepetielna Benmedittu XVI, mhix tagħna, imma hija t’Alla; u kemm drabi aħna, l-ikkonsagrati, naħsbu li hija tagħna! Nagħmlu minnha ... xi ħaġa li tiġina f’moħħna. Imma mhix tagħna, hija ta’ Alla. Il-għalqa li rridu nieħdu ħsieb hija tiegħu. Il-missjoni għalhekk hija fuq kollox grazzja. U jekk l-appostlu huwa frott tat-talb, fiha jsib id-dawl u l-qawwa ta’ ħidmietu. Il-missjoni tagħna, infatti, ma tagħtix frott, anzi tmut fl-istess mument li jiġi maqtugħ il-kollegament mal-għajn, mal-Mulej.
Għeżież seminaristi, għeżież novizzi, għeżie fil-mixja vokazzjonali ż żgħażagħ. Wieħed minnkom, wieħed mill-formaturi tagħkom, il-bieraħ qalli: évangéliser on le fait à genoux, l-evanġeliżazzjoni issir fuq l-irkupptejn. Isimgħu sewwa: “l-evanġeliżazzjoni ssir fuq l-irkupptejn”. Kunu dejjem rġiel u nisa ta’ talb. Mingħajr ir-relazzjoni bla ma taqta’ m’Alla, il-missjoni ssir xogħol. Imma inti x’tagħmel? Ħajjat, koka, qassis, naħdem ta’ qassis, naħdem ta’ soru? Le. Mhux xogħol; huwa xi ħaġa oħra. Ir-riskju tal-attiviżmu, li nafdaw iż-żejjed fuq l-istrutturi, huwa dejjem perikoluż. Jekk inħarsu lejn Ġesu’, naraw li lejlet kull deċiżjoni jew cirkustanza importanti kien jinġabar fit-talb intens u fit-tul. Nikkultivaw id-dimensjoni kontemplattiva anke meta nkunu maħnuqin bl-impenji l-iktar urġenti u ta’ piż. U aktar, il-missjoni titlob minnkom li tmorru lejn il-periferiji eżistenzjali aktar ma qlubkom ikunu mgħaqudin mal-qalb ta’ Kristu, li hija mimlija ħniena u mħabba. Hawn hu s-sigriet tal-fekondita’ pastorali, tal-fekondita tad-dixxiplu tal-Mulej!
Ġesu’ jibgħat lil tiegħu mingħajr “but, la ħorġa u anqas qrieq” (Lq 10,4). It-tixrid tal-Evanġelju mhux assigurat la min-numru tal-persuni, l-anqas mill-prestiġju tal-istituzzjoni u l-anqas mill-kwanita’ tar-riżorsi li jkollna. Dak li jgħodd huwa li nkunu mimlijin bl-imħabba ta’ Kristu, inħallu lilna nfusna niġu mmexxija mill_Ispirtu s-Santu u nlaqqmu ħajjitna fis-siġra li hija s-Salib tal-Mulej.
Għeżież ħbieb, b’fiduċja kbira nafdakom fl-interċessjoni ta’ Marija Santissma. Hija hi l-Omm li tgħinna biex nieħdu d-deċiżjonijiet definittivi bil-liberta’, mingħajr biża’. Hija tgħinkom biex tagħtu xhieda tal-faraġ t’Alla, mingħajr ma jkollkom biża’ tal-ferħ; Hija tgħinkom biex tkunu konformi għal-loġika tal-imħabba tas-Salib u biex tikbru f’għaqda dejjem aktar intensa mal-Mulej fit-talb. Hekk il-ħajja tagħkom tkun għanja u tagħti l-frott!
Miġjub għall-Malti minn Patri Silvestru Bonavia OFM Cap