Padre Lombardi
Santità, merħba fostna, bħal dejjem, fil-bidu ta’ dawn il-vjaġġi sbieħ interkontinentali. Dan il-vjaġġ jemozzjonana ħafna. Nafu li hu vjaġġ li int xtaqtu ħafna, kemm minħabba fil-laqgħa mal-Patrijarka, u kemm imbagħad għal-laqgħa mal-poplu Messikan. Mela qed nistennew emozzjonijiet kbar u mumenti storiċi. Nawgurawlek ħafna għal dawn il-ġranet u ninsabu miegħek biex inwettqu sew is-servizz tagħna li nxerrdu l-Kelma tal-Mulej u l-kelmiet tiegħek.
Kif tista’ tara, qegħdin grupp kbir, xi 76, il-grupp internazzjonali. Ħallejna spazju importanti għall-Messikani. Hawn xi għaxra Messikani preżenti, imma jirrappreżentaw xi ftit jew wisq in-nazzjonijiet u l-pajjiżi kollha. Issa ngħaddu l-kelma lilek, għal dak li int tixtieq tgħidilna fil-bidu ta’ dan il-vjaġġ. Grazzi tassew li tinsab hawn.
Il-Papa Franġisku
L-għodwa t-tajba! Grazzi tal-preżenza tagħkom, tal-ħidma li sa twettqu. Hu vjaġġ impenjattiv, marsus ħafna, imma tant mixtieq: wisq mixtieq minn ħija Ċirillu, minni u anki mill-Messikani. L-aħħar darba, fil-bidu ta’ l-udjenza ta’ nhar ta’ Erbgħa, id-dekana Messikana tagħkom kienet qed tistennieni biex bħal donnha tgħaddini mill-mina taż-żmien bil-films kollha ta’ Cantinflas. U hekk dħalt il-Messiku mill-bieb ta’ Cantinflas, li jdaħħak ħafna. L-ikbar xewqa tiegħi hi li nieqaf nitlob quddiem il-Madonna ta’ Guadalupe, dak il-misteru li, jiġi kemm jiġi studjat, ma hemmx spjegazzjonijiet umani għalih. Anki l-iżjed studju xjentifiku jgħid: “Imma din hi ħaġa ta’ Alla”. U dak hu li jġagħal lill-Messikani jgħidu: “Jien ateu, imma jien Guadalupen”. Xi Messikani: mhux kollha huma atej!
Hemm ħaġa oħra li rrid ngħidilkom: li dan hu l-aħħar vjaġġ tiegħi li fih għandna magħna lil Dr Gasbarri. Ilu 47 sena jaħdem il-Vatikan. U ilu għal dawn l-aħħar 37 sena jieħu ħsieb tal-vjaġġi. Qed ngħid dan għax nistgħu, matul dawn il-jiem, nesprimulu l-gratitudni tagħna u anki naħsbu għal daqsxejn ta’ festa hawn, aħna u deħlin lura… U mbagħad Mons. Mauricio Rueda sa jkun inkarigat mill-vjaġġi. Merħba!
U issa, jekk tippermettuli, nixtieq insellmilkom personalment.
Padre Lombardi
Qabel ma l-Papa jsellem lil kull wieħed u waħda, nistiednu lid-dekana tagħna li, barra li għaddiet xi films lill-Papa, issa sa tagħtih xi ħaġa biex jipproteġi ruħu mix-xemx tal-Messiku. Dan hu t-tielet Papa li lilu Valentina qed toffri sombrero!
Valentina Alazraki
Biex tħossok Messikan! L-ewwel wieħed tajtu 37 sena ilu lil Ġwanni Pawlu II. Imbagħad hu għamel kollezzjoni sħiħa għax ġie ħames darbiet. Il-Papa Benedittu libsu fi Guanajuato u qal li ħassu Messikan. Mela issa jmiss lilek. Barra minn hekk, dan is-sombrero ġej minn Kuba. Familja Messikana ħaditu magħha Kuba, imma ma rnexxilhiex tgħaddihulek u ħallietu lili. Jien wegħidthom li kemm-il darba int iżżomm il-wegħda tiegħek li tmur il-Messiku, ngħaddihulek. Dak li ma kontx immaġinajt kien li s-sombrero kellu jerġa’ lura Kuba. Din kienet is-sorpriża! Grazzi u l-vjaġġ it-tajjeb!
Il-Papa Franġisku
Nirringrazzjak. Grazzi, Valentina, lilek, lill-Messikani kollha, u lill-ġurnalisti kollha. Grazzi ħafna!
miġjuba mit-Taljan għall-Malti minn Francesco Pio Attard