Sinjura Prima Dama,
Sinjura
Ministru tas-Saħħa,
Sur Direttur,
Membri
tal-Patrunat,
Familji hawn preżenti,
Ħbieb,
għeżież tfal,
Il-lejla t-tajba!
Niżżi ħajr ‘l Alla għall-opportunità li qiegħed itini li nista’ niġi nżurkom, li niltaqa’ magħkom u mal-familji tagħkom f’dan l-isptar. Nista’ naqsam magħkom mument ċkejken mill-ħajja tagħkom, mill-ħajja tal-persuni kollha li jaħdmu bħala tobba, nersis, ħaddiema u volontarji li jgħinuhom, tant nies li qed jaħdmu għalikom.
Hemm pass fl-Evanġelju li jirrakkuntalna dwar Ġesù meta kien għadu tifel. Kien żgħir ħafna, bħal xi wħud minnkom. Ġurnata waħda, il-ġenituri tiegħu Ġużeppi u Marija, ħaduh fit-Tempju biex jippreżentawh lil Alla. U hemmhekk jiltaqgħu ma’ xwejjaħ li kien jismu Xmun, li, malli rah, bid-deċiżjoni u b’ferħ kbir u gratitudni, jieħdu f’dirgħajh u jibda’ jfaħħar ‘l Alla. Id-dehra ta’ Ġesù tarbija qanqlet fih żewġ affarijiet: sens ta’ gratitudni u x-xewqa li jbierek. Jiġifieri lil dan l-anzjan ġietu x-xewqa li jiżżi ħajr ‘l Alla u li jbierek.
Xmun hu “n-nannu” li jgħallimna dawn iż-żewġ atteġġjamenti fundamentali tal-ħajja: dak li nirringrazzjaw u dak li nbierku.
Hawnhekk jien qiegħed imbierek lilkom; it-tobba jberkukom kull darba li jikkurawkom, in-nersis, il-ħaddiema kollha, kull min jaħdem hawn iberikkom, lilkom tfal, imma intom ukoll għandkom titgħallmu tbierku lilhom u titolbu li Ġesù jħarishom għax huma jieħdu kura tagħkom. Jien hawnhekk (u mhux biss minħabba l-età) inħossni qrib dawn iż-żewġ tagħlimiet ta’ Xmun. Min-naħa, meta għaddejt minn dak il-bieb u rajt għajnejkom, it-tbissima tagħkom – ta’ wħud imqarba! – wiċċkom, tnisslet fija x-xewqa li rrod ħajr. Ħajr għall-imħabba li wrejtu biex ilqajtuni; ħajr għax qed nara b’liema għożża intom ikkurati hawnhekk, l-għożża li biha intom akkumpanjati. Ħajr għall-isforz ta’ bosta li qed jagħmlu l-aħjar tagħhom biex intom tfiqu kemm jista’ jkun malajr. Hu tant importanti li wieħed iħossu kkurat u akkumpanjat, li jħossu maħbub u jkun jaf li qed tagħmlu kull ma’ tistgħu u l-aħjar tagħkom biex tikkurawna; f’isem dawn il-persuni kollha ngħid: grazzi, grazzi.
U fl-istess waqt, nixtieq inberikkom. Irrid nitlob lil Alla jberikkom, jakkumpanja lilkom, lill-familjari tagħkom, lill-persuni kollha li jaħdmu f’din id-dar u jagħmlu ħilithom biex dak it-tbissim ikompli jikber kull jum li jgħaddi. Lill-persuni kollha li mhux biss bil-mediċini imma wkoll “bl-affettoterapia” jagħtu sehemhom biex dan iż-żmien intom tgħixuh b’ferħ akbar. L-“affettoterapia’ hi importanti ħafna! Importanti ħafna. Kultant żegħila tgħin ħafna biex wieħed iħossu aħjar.
Intom tafuh lill-Indjo Juan Diego, mhux hekk? (“Iva”): Ħa naraw: min jafu jgħolli idu.... Meta z-ziju taċ-ċkejken Juan kien marid, dan Juan kien imħasseb ħafna u mdejjaq. F’dak il-ħin tidher il-Verġni ta’ Guadalupe u tgħidlu: “Iddejjaqx qalbek u tinkwieta xejn. M’hawnx jien li jien Ommok?” Għandna ‘l Ommna: nitolbuha toffrina lil Binha Ġeszù.
U issa tfal nitlobkom ħaġa: nagħlqu għajnejna, nagħlqu għajnejna u nistaqsu fis-skiet dak li llum tixtieq qalbna. Waqt ta’ skiet bl-għajnejn magħluqa u fina nfusna nitolbu dak li nixtiequ......... U issa ngħidu flimkien lil Ommna: Sliem għalik Marija.....
Jalla l-Mulej u l-Verġni ta’ Guadalupe jkunu dejjem magħkom. Grazzi ħafna! U, jekk jogħġobkom, tinsewx titolbu għalija. Tinsewx! Il-Mulej iberikkom.
Miġjub għall-Malti mit-Tajan minn Joe Huber