Il-glorja ta’ Alla hi l-ħajja tal-bniedem: hekk kien jgħid Sant’Irinew fit-tieni seklu, espressjoni li għadha tidwi fil-qalb tal-Knisja. Il-glorja tal-Missier hi l-ħajja ta’ wliedu. M’hemmx glorja ikbar għal missier minn dik li jara lil uliedu jirrealizzaw ruħhom; m’hemmx sodisfazzjon ikbar milli jarahom mexjin ’il quddiem, jarahom jikbru u jiżviluppaw. Dan jurihulna l-Ewwel Qari li smajna. Ninwè: belt kbira li kienet qed teqred lilha nfisha, frott ta’ l-oppressjoni u tad-dnub, tal-vjolenza u ta’ l-inġustizzja. Il-kapitali kbira kellha jiemha magħduda, għax il-vjolenza ġġenerata fiha ma kinitx għadha sostenibbli. U hawn jidħol fix-xena l-Mulej li jqanqal il-qalb ta’ Ġona, jidħol fix-xena l-Missier li jistieden u jibgħat il-ħabbâr tiegħu. Ġona jiġi msejjaħ għal missjoni. Mur, jgħidlu, għax “erbgħin jum oħra u Ninwè ssir ħerba” (Ġon 3:4). Mur, għinhom jifhmu li b’dan il-mod ta’ mġibithom, ta’ kif jirregolaw u jorganizzaw ruħhom, qed joħolqu biss mewt u qerda, tbatija u oppressjoni. Urihom li hekk m’hemm ħajja għal ħadd, la għas-sultan u lanqas għas-sudditu, la għall-għelieqi u lanqas għall-bhejjem. Mur u ħabbrilhom li tant draw il-ħajja ħażina, li tilfu s-sensibbiltà quddiem it-tbatija. Mur u għidilhom li l-inġustizzja ħadet pussess tal-viżjoni tagħhom. Għalhekk Ġona jitlaq! Alla jibagħtu jixħet dawl fuq dak li kien qed jiġri, jibagħtu jqajjem mir-raqda tiegħu poplu li kien xurban bih innifsu.
U f’dan it-test, insibu ruħna quddiem il-misteru tal-Ħniena divina. Il-Ħniena divina dejjem tkeċċi l-ħażen, u tieħu b’ħafna serjetà lill-bniedem. Dejjem tfittex it-tjieba f’kull persuna, anki jekk din tkun raqdet, tkun illoppjata. Flok teqred, kif ħafna drabi nippretendu jew inkunu rridu nagħmlu aħna, il-ħniena tersaq qrib ta’ kull sitwazzjoni biex tibdilha minn ġewwa. Dan hu sewwa sew il-misteru tal-Ħniena divina. Joqrob lejna u jistedinna għall-konverżjoni, jistieden għall-indiema; jistedinna naraw il-ħsara li qed tiġi kkawżata fuq kull livell. Il-ħniena tidħol dejjem iżjed fil-ħażen biex tibdlu. Miteru ta’ Alla Missierna: jibgħat lil Ibnu, li jidħol fil-ħażen, isir dnub biex jittrasforma l-ħażen. Din hi l-ħniena tiegħu.
Is-sultan sema’, in-nies tal-belt irreaġixxew u ħareġ digriet biex kulħadd jindem. Il-ħniena ta’ Alla daħlet fil-qalb biex tirrivela u turi dik li hi ċ-ċertezza u t-tama tagħna: dejjem hemm possibbiltà li ninbidlu, għadna fil-ħin biex nirreaġixxu u nittrasformaw, nimmodifikaw u nibdlu dak li qed jeqridna bħala poplu, li qed ibaxxina bħala umanità. Il-ħniena tagħmlilna l-qalb biex inħarsu lejn il-preżent u jkollna fiduċja f’dak li hu sân u tajjeb moħbi f’kull qalb. Il-ħniena ta’ Alla hi t-tarka u l-qawwa tagħna.
Ġona għen lill-poplu jiftaħ għajnejh, messlu l-kuxjenza. Dritt wara, is-sejħa tiegħu ssib irġiel u nisa li kapaċi jindmu, kapaċi jibku. Tibki minħabba fl-inġustizzja, tibki minħabba fil-ħażen, tibki minħabba fl-oppressjoni. Dan hu d-dmugħ li jista’ jiftaħ it-triq għat-trasformazzjoni; hu d-dmugħ li jista’ jrattab il-qalb, hu d-dmugħ li jista’ jsaffi l-ħarsa u jara kif sibna ruħna fiċ-ċirku vizzjuż tad-dnub. Hu d-dmugħ li jirnexxielu jissensibilizza l-ħarsa u l-imġiba ta’ qalb li bbieset u speċjalment dik li raqdet quddiem it-tbatija ta’ l-oħrajn. Hu d-dmugħ li jista’ jġib waqfa u kapaċi jiftħilna qalbna għall-konverżjoni. Hekk jiġrilu Pietru wara li ċaħad lil Ġesù: beka, u d-dmugħ fetaħlu qalbu.
Din il-kelma tidwi bil-qawwa fostna l-lum; din il-kelma hi l-leħen ta’ min qed jgħajjat fid-deżert u jistedinna għall-konverżjoni. F’din is-Sena tal-Ħniena, nixtieq flimkien magħkom, f’dan il-post nitlob lill-Ħniena divina, nixtieq nitlobha magħkom id-don tad-dmugħ, id-don tal-konverżjoni.
Hawn fi Ciudad Juárez, bħal f’zoni oħra tal-fruntiera, hawn imgeddsa eluf ta’ immigranti mill-Amerika Ċentrali u minn pajjiżi oħra, bla ma ninsew tant Messikani li anki huma qed ifittxu li jaqsmu “għan-naħa l-oħra”. Passaġġ, mixja mimlija b’inġustizzji terribbli: imjassra, misruqa, mitluba jagħtu flushom lil min m’għandu ebda jedd għalihom, ħafna minn ħutna huma oġġett tal-kummerċ tat-traffikar uman, tat-traffikar tal-persuni.
Ma nistgħux niċħdu li teżisti kriżi umanitarja li fl-aħħar snin issarrfet fl-immigrazzjoni ta’ eluf ta’ persuni, kemm bit-tren, kemm fit-toroq, sew ukoll bil-mixi għal mijiet ta’ kilometri mill-muntanji, deżerti, toroq perikulużi. Din it-traġedja umana li l-immigrazzjoni sfurzata tirrappreżenta, il-lum il-ġurnata hi fenomenu globali. Din il-kriżi, li nistgħu nkejluha b’ċifri, aħna rridu nkejluha b’ismijiet, stejjer, familji. Huma ħutna li jkollhom iħallu darhom għax imġiegħla mill-faqar u mill-vjolenza, mit-traffikar tad-droga u mill-kriminalità organizzata. Quddiem tant lakuni legali, tinfetaħ xibka li taqbad fiha u teqred dejjem iżjed lill-iżjed fqar. Mhux biss ibatu l-faqar, imma jkollhom iġarrbu wkoll dawn il-forom ta’ vjolenza. Inġustizzja li fejn hemm iż-żgħażagħ tiqliel: huma, bħal laħam tal-biċċerija, jisfaw ippersegwitati u mhedda meta jippruvaw joħorġu minn dan iċ-ċirku vizzjuż tal-vjolenza u mill-infern tad-droga. U xi ngħidu għal tant nisa li serqulhom ħajjithom tant inġustament?
Nitolbu lil Alla tagħna d-don tal-konverżjoni, id-don tad-dmugħ; nitolbuh li jista’ jkollna qalbna miftuħa bħan-nies ta’ Ninwè għas-sejħa tiegħu fil-wiċċ batut ta’ tant irġiel u nisa. Qatt iżjed mewt u abbużi! Dejjem għad hemm ċans li ninbidlu, dejjem hemm triq biex wieħed joħroġ u dejjem hemm opportunità, dejjem hemm żmien biex nittallbu l-ħniena tal-Missier.
Kif seħħ fi żmien Ġona, anki l-lum għandna bżonn tal-konverżjoni; hemm sinjali li jsiru dawl fil-mixja u bxara ta’ salvazzjoni. Naf bil-ħidma ta’ tant organizzazzjonijiet tas-soċjetà ċivili b’riżq id-drittijiet ta’ l-immigranti. Naf ukoll bil-ħidma ħabrieka ta’ tant sorijiet reliġjużi, ta’ patrijiet u saċerdoti, ta’ lajċi li jqattgħu ħajjithom isieħbu u jħarsu l-ħajja. Jagħtu l-ewwel għajnuna u ħafna drabi jirriskjaw ħajjithom stess. B’ħajjithom huma profeti tal-ħniena, huma l-qalb li kapaċi tifhem u r-riġlejn li kapaċi jsieħbu tal-Knisja li tiftaħ dirgħajha u twieżen.
Hu żmien il-konverżjoni, hu żmien is-salvazzjoni, hu żmien il-ħniena. Mela ejjew ngħidu, flimkien mat-tbatija fuq tant uċuħ: “għall-kobor tal-ħniena tiegħek, Mulej, ħassar ħtijietna… saffina minn dnubietna u oħloq fina qalb safja, ruħ ġdida” (ara Salm 50/51:3,4,12).
U f’dan il-waqt nixtieq anki nsellem minn hawn lill-għeżież ħutna li f’dan l-istess ħin jinsabu magħqudin magħna min-naħa l-oħra tal-fruntiera. Speċjalment dawk li nġabru fl-istadju ta’ l-Università ta’ El Paso, magħruf bħala s-“Sun Bowl”, immexxija mill-Isqof tagħhom, Mons. Mark Seitz. Grazzi għall-għajnuna tat-teknoloġija, nistgħu nitolbu, inkantaw u niċċelebraw flimkien l-imħabba ħanina li juri magħna l-Mulej, u li l-ebda fruntiera ma tista’ żżommna milli naqsmu flimkien. Grazzi, ħutna ta’ El Paso, li qed tgħinuna nħossuna familja waħda u komunità Nisranija waħda.
miġjuba mit-Taljan għall-Malti minn Francesco Pio Attard