Għeżież ħbieb,
Jiena grat li intom tinsabu hawn illum u li nista’ naqsam magħkom dawn il-mumenti ta’ riflessjoni. Irrid nirringrazzja b’mod partikulari lill- Mons. Kairo, lill-Arċisqof Wabukala u lill-Professur El-Busaidy għall-kliem tagħhom ta’ merħba f’isimkom u f’isem il-komunitajiet rispettivi tagħkom. Għalija, dejjem hu importanti li meta mmur nżur il-Kattoliċi ta’ Knisja lokali, ikolli l-opportunita’ li niltaqa’ mal-mexxejja ta’ komunitajiet insara oħra u ta’ tradizzjonijiet reliġjużi oħra. It-tama tiegħi hi li dan il-ħin tagħna flimkien ikun sinjal tal-istima li l-Knisja għandha għas-segwaċi tar-reliġjonijiet l-oħra kollha, u li jkomplu jsaħħu r-rabtiet ta’ ħbiberija li ġa jeżistu bejnietna.
Biex ngħid il-verita’, ir-rabta ta’ bejnietna tpoġġi quddiemna sfidi u titlob minna wkoll. Id-djalogu ekumeniku u interreliġjuż mhuwiex lussu. Mhuwiex xi ħaġa miżjuda jew inkelli xi għażla, imma hu xi ħaġa essenzjali li d-dinja tagħna miġruħa b’tant konflitti u firdiet, teħtieġha dejjem aktar.
Fil-fatt, it-twemmin reliġjuż u l-mod kif ngħixuh iħalli effett fuqna u fuq il-mod kif nifhmu d-dinja ta’ madwarna. Hu għalina għajn ta’ dawl, ta’ dehen u ta’ solidarjeta’ u b’hekk jagħni s-soċjetajiet li ngħixu fihom. Meta nkunu qed nieħdu ħsieb it-tisħiħ spiritwali tal-komunitajiet tagħna billi niffurmaw l-imħuħ u l-qlub bil-verita’ u bil-valuri li jgħallmu t-tradizzjonijiet reliġjużi tagħna, aħna nsiru barka għall-komunitajiet li fihom jgħixu n-nies tagħna. F’soċjeta’ demokratika u pluralistika bħalma hi din, il-koperazzjoni bejn il-mexxejja reliġjużi u l-komunitajiet tagħhom issir servizz importanti għall-ġid komuni.
F’dan id-dawl, u f’dinja li qed issir dejjem aktar interdipendenti, nindunaw dejjem aktar kemm hemm bżonn tal-għarfien interreliġjuż, tal-ħbiberija u tal-kollaborazzjoni biex niddefendu d-dinjita’ li Alla ta lil kull individwu u lil kull poplu, u d-dritt tagħhom li jgħixu ħielsa u kuntenti. Filwaqt li jippromwovu rispett lejn din id-dinjita’ u lejn dawn id-drittijiet, ir-reliġjonijiet ikunu qed iwettqu rwol essenzjali billi jiffurmaw il-kuxjenzi, isawbu fiż-żgħażagħ il-valuri spiritwali profondi tat-tradizzjonijiet rispettivi tagħhom u jħejju ċittadini tajbin li kapaċi jnaqqxu fis-soċjetajiet tagħhom onesta’, integrita’ u viżjoni ta’ dinja li tagħti valur lill-persuna umana fejn jidħol il-poter u l-qligħ materjali.
Hawnhekk tiġi quddiem għajnejja l-importanza tal-konvinzjoni komuni tagħna dwar Alla li aħna lkoll nfittxu li naqdu: hu Alla tal-paċi. L-Isem qaddis tiegħu qatt m’għandu jintuża biex ikunu ġġustifikati l-mibegħda u l-vjolenza. Naf kemm għadha ħajja fikom it-tifkira tal-attakki barbari f’Westgate Mall, fil-Kulleġġ Universitarju ta’ Garissa u f’Mandera. Spiss jiġri li żgħażagħ jitrawmu biex ikunu estremisti f’isem ir-reliġjon ħalli jiżirgħu nuqqas ta’ qbil u biża’ u jnisslu ġrieħi fis-soċjeta’. Kemm hu importanti li nkunu magħrufa bħala profeti tal-paċi, bħala bennejja tal-paċi, tal-armonija u tar-rispett reċiproku! Jalla Dak li jista’ kollox imiss il-qlub ta’ dawk mgħaddsa fit-twettiq ta’din il-vjolenza u jagħti l-paċi lill-familji u lill-komunitajiet tagħna.
Għeżież ħbieb, din is-sena jaħbat il-50 anniversarju mill-għeluq tal-Konċilju Vatikan II, li fih il-Knisja Kattolika ħadet l-impenn tad-djalogu ekumeniku u interreliġjuż bħala servizz għall-komprensjoni u għall-ħbiberija. Nixtieq nisħaq fuq dan l-impenn li jitwieled mill-konvinzjoni li Alla jħobb lil kulħadd u li Hu joffri l-fidwa lil kulħadd. Id-dinja tassew tistenna li dawk li jemmnu jaħdmu flimkien ma’ nies ta’ rieda tajba, biex jaffrontaw il-ħafna problemi li qed ikiddu l-familja umana. Filwaqt li nħarsu lejn il-ġejjieni, ejjew nitolbu li l-bnedmin jagħrfu li huma lkoll aħwa ta’ xulxin u jgħixu magħqudin flimkien fil-paċi anki permezz tad-differenzi ta’ bejniethom. Ejjew nitolbu għall-paċi!
Nirringrazzjakom tal-attenzjoni tagħkom u nitlob lil Alla li jista’ kollox li jagħti lilkom u lill-komunitajiet tagħkom il-barkiet abbundanti tiegħu.
Miġjub għall-Malti minn Vivienne Attard.