Mulej Ġesù,
inqimu s-salib tiegħek,
li jeħlisna mid-dnub, għerq ta’ kull firda u ta’ kull ħażen;
inħabbru l-qawmien tiegħek,
li jifdi lill-bniedem mill-jasar tal-waqgħa u tal-mewt;
nistennew il-miġja tiegħek fil-glorja,
li twassal fil-milja tagħha s-saltna tiegħek ta’ ġustizzja, ta’ ferħ u ta’ sliem.
Mulej Ġesù,
minħabba fil-passjoni glorjuża tiegħek,
irbaħ fuq l-ebusija tal-qlub, ilsiera tal-mibegħda u tal-egoiżmu;
minħabba fil-qawwa tal-qawmien tiegħek,
eħles mill-qagħda li jinsabu fiha lill-vittmi tal-inġustizzja u tal-moħqrija;
minħabba fil-fedeltà tal-miġja tiegħek,
ifxel il-kultura tal-mewt ħa jiddi t-trijonf tal-ħajja.
Mulej Ġesù,
waħħad mas-salib tiegħek it-tbatija ta’ tant vittmi innoċenti:
it-tfal, l-anzjani, l-Insara ppersegwitati;
geżwer bid-dawl tal-Għid tiegħek lil min hu miġruħ f’qalbu:
il-persuni abbużati, imċaħħda mil-libertà u mid-dinjità;
dewwaq l-istabbiltà tas-saltna tiegħek lil min qed jgħix fl-inċertezza:
l-eżiljati, ir-refuġjati, min tilef il-gost tal-ħajja.
Mulej Ġesù,
ifrex id-dawl tas-salib tiegħek fuq il-ġnus miġġeldin bejniethom:
ħa jitgħallmu t-triq tar-rikonċiljazzjoni, tad-djalogu u tal-maħfra;
agħmel li l-popli mifnija mill-bombi jduqu l-ferħ tal-qawmien tiegħek:
erfa’ mill-qerda lill-Iraq u lis-Sirja;
iġbor taħt it-tmexxija ħelwa tiegħek lil uliedek imxerrda:
wieżen lill-Insara maħruba u agħtihom l-għaqda fil-fidi u fl-imħabba.
Verġni Marija, Sultana tal-paċi,
int li kont f’riġlejn is-salib,
iksbilna mingħand Ibnek il-maħfra ta’ dnubietna;
int li qatt ma ġiek dubju mir-rebħa tal-qawmien,
wieżen il-fidi tagħna u t-tama tagħna;
int li ssaltan fil-glorja,
għallimna r-regalità tal-qadi u l-glorja tal-imħabba.
Amen.
miġjub mit-Taljan għall-Malti minn Francesco Pio Attard