Il-Papa:
Sliem għalik, Sultana,
Verġni Mqaddsa ta’ Fatima,
Sinjura tal-Qalb bla Tebgħa,
kenn u triq li twassal għand Alla!
Pellegrin tad-Dawl li jasal għandna minn idejk,
irrodd ħajr lil Alla l-Missier li, f’kull żmien u post, jaħdem fl-istorja tal-bnedmin;
pellegrin tal-Paċi li, f’dan il-post, inti tħabbar,
nagħti ġieħ lil Kristu, il-paċi tagħna, u għad-dinja nitlob li ssaltan l-għaqda bejn il-ġnus kollha;
pellegrin tat-Tama li jkebbes l-Ispirtu,
ġejt bħala profeta u ħabbar biex naħsel riġlejn kulħadd, madwar il-mejda waħda li tgħaqqadna.
Ritornell kantat mill-ġemgħa:
Ave o clemens, ave o pia!
Salve Regina Rosarii Fatimæ.
Ave o clemens, ave o pia!
Ave o dulcis Virgo Maria.
Il-Papa:
Sliem għalik, Omm tal-Ħniena,
Sinjura ta’ lbiesek bajdani!
F’dan il-post, mnejn mitt sena ilu
wrejt lil kulħadd il-pjan tal-ħniena ta’ Alla,
inħares lejn il-libsa tiegħek kollha dawl
u, bħala isqof liebes l-abjad,
niftakar f’dawk kollha li,
lebsin is-safa tal-magħmudija,
jixtiequ jgħixu f’Alla
u jitolbu bil-misteri ta’ Kristu biex jaqilgħu l-paċi.
Ritornell…
Il-Papa:
Sliem għalik, ħajja u ħlewwa,
is-sliem, tama tagħna,
o Verġni Pellegrina, o Sultana tal-Univers!
Fil-ġewwieni nett tiegħek,
fil-Qalb bla Tebgħa tiegħek,
ħares il-ferħ tal-bnedmin
mexjin lejn is-Sema Pajjiżhom.
Fil-ġewwieni nett tiegħek,
fil-Qalb bla Tebgħa tiegħek,
ħares l-uġigħ tal-familja umana
li tibki u tolfoq f’dan il-wied tad-dmugħ.
Fil-ġewwieni nett tiegħek,
fil-Qalb bla Tebgħa tiegħek,
żejjinna bil-ġmiel tal-ġawhar tal-kuruna tiegħek
u agħmilna pellegrini kif int kont pellegrina.
Bit-tbissima verġinali tiegħek
kebbes mill-ġdid il-ferħ fil-Knisja ta’ Kristu.
Bil-ħarsa tiegħek kollha ħlewwa
qawwi t-tama ta’ wlied Alla.
Bid-dirgħajn tiegħek miġbura fit-talb li int tgħolli quddiem il-Mulej,
xierek lil kulħadd f’familja waħda ta’ bnedmin.
Ritornell…
Il-Papa:
O ħanina, o pija,
o ħelwa Verġni Marija,
Sultana tar-Rużarju ta’ Fatima!
Agħmel li nimxu fuq l-eżempju tal-Beati Franġisku u Ġjaċinta,
u ta’ dawk kollha li jikkonsagraw ruħhom għax-xandir tal-Vanġelu.
Hekk nimxu f’kull rotta,
interrqu pellegrini fit-toroq kollha,
inġarrfu l-ħitan kollha
u negħlbu kull fruntiera,
noħorġu lejn il-periferiji kollha
biex nuru l-ġustizzja u l-paċi ta’ Alla.
Fil-ferħ tal-Vanġelu, insiru l-Knisja mlibbsa bil-bjuda,
bis-safa maħsul bid-demm tal-Ħaruf
imxerred illum ukoll fil-gwerer li jeqirdu d-dinja li fiha ngħixu.
U hekk, bħalek, insiru xbieha tal-kolonna tad-dawl
li ddawwal it-toroq tad-dinja,
nuru lil kulħadd li Alla jeżisti,
li Alla qiegħed hemm,
li Alla jgħammar qalb il-poplu tiegħu,
ilbieraħ, illum u dejjem.
Ritornell…
Il-Papa flimkien mal-fidili:
Sliem għalik, Omm il-Mulej,
Verġni Marija, Sultana tar-Rużarju ta’ Fatima!
Imbierka inti fost in-nisa,
int ix-xbieha tal-Knisja mlibbsa bid-dawl tal-Għid,
int il-ġieħ tal-poplu tagħna,
int it-trijonf fuq il-ħbit tal-ħażin.
Profezija tal-Imħabba ħanina tal-Missier,
Mgħallma tat-Tħabbira tal-Bxara t-Tajba tal-Iben,
Sinjal tan-Nar iħeġġeġ tal-Ispirtu s-Santu,
għallimna, f’dan il-wied ta’ ferħ u niket,
il-verità eterna li l-Missier jgħarraf liċ-ċkejknin.
Urina l-qawwa tal-mant ħarries tiegħek.
Fil-Qalb tiegħek bla Tebgħa,
kun il-kenn tal-midinbin
u t-triq li twassal għand Alla.
Imsieħeb ma’ ħuti,
fil-Fidi, fit-Tama u fl-Imħabba,
f’idejk nintelaq.
Imsieħeb ma’ ħuti, permezz tiegħek, nikkonsagra ruħi lil Alla,
o Verġni tar-Rużarju ta’ Fatima.
U fl-aħħar, imgeżwer fid-dawl li jiġina minn idejk,
nagħti glorja lil Alla għal dejjem ta’ dejjem.
Amen.
Ritornell…
miġjub mit-Taljan għall-Malti minn Francesco Pio Attard