Sinjuri distinti,
Kuntent li qed niltaqa magħkom fit-tmiem tal-International Drug Enforcement Conference. Nirringrazzjakom taż-żjara tagħkom u nixtieq ngħidilkom kemm napprezza l-ħidma li qed twettqu biex taffrontaw problema ta żmenijietna li hi daqshekk gravi u kumplessa. Nawguralkom li dawn il-ġranet tal-laqgħa tagħkom fRuma jħallu marka siewja fl-impenn tagħkom. U bmod partikulari, nixtieq nawguralkom li tilħqu l-miri li wasaltu għalihom: li tkun koordinata l-politika kontra d-droga, li jsir sharing tal-informazzjoni miksuba u li tkun żviluppata strateġija operattiva sfiqa kontra l-kummerċ tad-droga. Forsi fil-kummerċ tad-droga, l-azzjonijiet huma dawk li l-aktar jirrendu flus fis-suq. U din hi xi ħaġa traġika.
Il-flaġell tad-droga qed ikompli jinxtered fforom u fdimensjonijiet li jimpressjonawk; hu sostnut minn suq moqżież li ma jafx bi frunitieri nazzjonali u kontinentali. U bhekk qed ikompli jikber il-periklu għaż-żgħażagħ u għall-adolexxenti. Quddiem fenomenu bħal dan, inħoss il-ħtieġa li nuri n-niket u l-preokkupazzjoni tiegħi.
Irrid ngħid bmod ċar ħafna li d-droga ma tintrebaħx bid-droga! Id-droga hi xi ħaġa ħażina, u fejn hemm dak li hu ħażin la tista ċċedi u lanqas tagħmel kompromessi. Żgur li l-problema ma ssolvix ruħha billi wieħed jaħseb li ser inaqqas il-ħsara jekk jagħti permess li jintużaw psikofarmaċi minn dawk il-persuni li jkomplu jagħmlu użu mid-droga. Il-legalizzazzjoni ta dawk li jissejħu drogi ħfief, anki jekk din tkun parżjali, mhux biss hi xi ħaġa diskutibbli fuq livell leġiżlattiv, iżda lanqas ma twassal għall-effetti maħsuba. Imbagħad, id-drogi sostituttivi mhumiex terapija suffiċjenti, imma huma mod mistur kif wieħed iċedi għal dan il-fenomenu. Nerġa nisħaq fuq dak li ġa għidt fokkażjoni oħra: le għal kull tip ta droga. Sempliċiment. Le għal kull tip ta droga. ( ara Udjenza ġenerali, 7 ta Mejju 2014). Iżda biex ngħidu din il-le, jeħtieġ li ngħidu iva għall-ħajja, iva għall-imħabba, iva għall-oħrajn, iva għall-edukazzjoni, iva għall-isport, iva għax-xogħol, iva għal aktar opportunitajiet ta xogħol. Naħsbu ftit fdak iż-żagħżugħ li hu bla xogħol. Ikolli ngħid li dawk bla xogħol fl-Ewropa jgħoddu mal-75 miljun; hekk minn għalija, imma miniex ċert u ma rridx ngħid xi ħaġa li ma tkunx. Imma ejjew naħsbu ftit fdak iż-żagħżugħ li la jagħmel ħaġa u lanqas oħra; la jistudja u lanqas jaħdem. Isib ruħu fejn mhemmx xefaq, fejn mhemmx tama, u l-ewwel ħaġa offruta jkunu d-dipendenzi, u fost dawn id-droga. Jekk iseħħu dawn l-iva, ma jkunx hemm post għad-droga, ma jkunx hemm post għall-abbuż mill-alkohol jew għall-dipendenzi oħra.
Il-Knisja, fidila lejn il-mandat ta Ġesω biex tmur kulfejn hemm xi ħadd li qed ibati, xi ħadd bil-għatx, xi ħadd bil-ġuħ, xi ħadd fil-ħabs (ara Mt 25,31-46), mabbandunatx lil dawk li waqgħu fin-nassa tad-droga, imma marret tiltaqa magħhom bl-imħabba kreattiva tagħha. Qabdithom minn idejhom, permezz tal-ħidma ta tant operaturi u volontarji, biex huma jiskopru mill-ġdid id-dinjita tagħhom u għenithom biex jerġgħu jagħtu l-ħajja lil dawk ir-riżorsi, lil dawk it-talenti personali li d-droga difnet imma ma setgħetx teqred la darba kull bniedem hu maħluq fuq is-sura u x-xbieha tAlla (ara Gen 1,26). Iżda din il-ħidma ta rkupru hi limitata ħafna, mhijiex biżżejjed. Hemm bżonn issir ħidma ta prevenzjoni. Din tagħmel ħafna ġid.
L-eżempju ta tant żgħażagħ li xewqana biex jinħelsu mid-dipendenza għad-droga jimpejaw ruħhom biex jerġgħu jibnu ħajjithom mill-ġdid, hu stimolu biex wieħed iħares l quddiem bfiduċja.
Sinjuri distinti, inħeġġiġkom tkomplu l-ħidma tagħkom btama dejjem akbar. Nawguralkom ħafna ġid u nagħtikom minn qalbi l-barka tiegħi. Grazzi.
Miġjub għall-Malti minn Vivienne Attard