Sinjuri, Eminenzi, Eċċellenzi,
Għeżież ħuti,
Matul dan il-pellegrinaġġ tiegħi xtaqt li niltaqa’ magħkom li kontu mġiegħla titilqu minn djarkom u minn art twelidkom minħabba fi ġlied imdemmi u sibtu kenn fl-art tal-Ġordanja li laqatkom, u fl-istess ħin, niltaqa’ magħkom ukoll, għeżież żgħażagħ, li qed iġorru l-piż ta’ limitu fiżiku.
Il-post li ninsabu fih ifakkarna fil-Magħmudija ta’ Ġesu’. Hu, li ġie hawn fil-Ġordan biex jitgħammed minn Ġwanni, jurina l-umilta’ tiegħu u li hu qasam magħna l-kundizzjoni tagħna l-bnedmin: Hu jitbaxxa u jsir bħalna u b’imħabbtu jerġa’ jagħtina mill-ġdid id-dinjita’ u jsalvana. L-umilta’ ta’ Ġesu’ li jitbaxxa biex ifejjaq il-ġrieħi tagħna l-bnedmin dejjem tolqotna. Ġesu’ jitbaxxa u jsir ħaġa waħda magħna biex ifejjaq il-ġrieħi tagħna!
U min-naħa tagħna, aħna nħossu b’mod profond il-ġrajjiet drammatiċi u l-ġrieħi ta’ żmienna, l-aktar dawk il-ġrieħi miftuħa kawża tal-ġlied fil-Lvant Nofsani. L-ewwel ma tiġi quddiem għajnejja hi l-art maħbuba tas-Sirja mifnija minn gwerra ċivili li issa ilha sejra tlett snin u li ħalliet numru li ma jingħadx ta’ vittmi u wasslet ħafna oħrajn biex jaħarbu u jfittxu l-kenn f’pajjiżi oħra. Ilkoll irridu l-paċi! Imma meta nħares lejn din il-ġrajja drammatika tal-gwerra, lejn dawn il-ġrieħi, lejn tant nies li telqu arthom, li kellhom jitilqu art twelidhom, nistaqsi lili nnifsi: min qed ibigħ l-armi lil dawn in-nies biex jiġġieldu? Hawn jinsab l-għerq tal-ħażen kollu! Il-mibegħda u l-kilba għall-flus ta’ dawk li jipproduċu u jbigħu l-armi. Dan għandu jwassalna biex naħsbu f’min hemm wara dan kollu, f’min qed jagħti l-armi lil dawk li qed jiġġieldu biex ikompli jsir il-ġlied! Naħsbu, u minn qalbna ngħidu kelma lil dawn l-imsejkna nies kriminali biex jikkonvertu.
Nirringrazzja lill-Awtorita’ u lill-poplu tal-Ġordanja li b’tant ġenerożita’ qed jilqgħu numru hekk għoli ta’ refuġjati li qed jiġu mis-Sirja u mill-Iraq, u ngħid grazzi wkoll lil dawk kollha li bil-ħidma tagħhom qed jagħtu għajnuna u solidarjeta’ lir-rifuġjati. Ma nistax ma naħsibx ukoll fil-ħidma ta’ karita’ li qed issir mill-istituzzjonijiet tal-Knisja, bħall-Caritas tal-Ġordanja u oħrajn, li filwaqt li jagħtu l-għajnuna tagħhom lil dawk fil-bżonn mingħajr ebda distinzjoni ta’ twemmin reliġjuż, appartenenza etnika jew ideoloġika, juru d-dija tal-wiċċ karitattiv ta’ Ġesu’, li hu ħanin. Alla li jista’ kollox u li hu ta’ mħabba bla qies ibierek lilkom u kull sforz li tagħmlu biex ittaffu t-tbatija li ġġib magħha l-gwerra!
Indur lejn il-komunita’ internazzjonali biex ma tħallix waħidha lill-Ġordanja, hekk akkoljenti u kuraġġuża, imma biex tkompli tgħinha u żżid is-sostenn u l-għajnuna ħalli tiffaċċa din l-emerġenza umanitarja minħabba li numru daqshekk għoli ta’ refuġjati qed jaslu fit-territorju tagħha. Inġedded minn qalbi l-appell għall-paċi fis-Sirja. Ħa tieqaf il-vjolenza u jkunu rispettati d-drittijiet umani filwaqt li tingħata garanzija tal-għajnuna meħtieġa lill-poplu li qed ibati! Jalla kulħadd iwarrab il-ħsieb li l-armi għandhom ikunu s-soluzzjoni għall-problemi u jerġa’ jimxi fit-triq tan-negozjati. Fil-fatt, is-soluzzjoni tista’ tiġi biss mid-djalogu u mill-moderazzjoni, mill-kumpassjoni lejn min qed ibati, mit-tiftix għal soluzzjoni politika u mis-sens ta’ responsabbilta’ lejn ħutna l-bnedmin.
U lilkom, żgħażagħ, nitlobkom tingħaqdu miegħi fit-talb għall-paċi. Tistgħu tagħmlu dan anki billi toffru t-tbatija tagħkom ta’ kuljum lil Alla, u hekk it-talba tagħkom issir partikolarment prezzjuża u effikaċi. Inħeġġiġkom tikkollaboraw bl-impenn u bis-sensittivita’ tagħkom biex tinbena soċjeta’ li tirrispetta lil dawk l-aktar dgħajfa, lill-morda, lit-tfal, lill-anzjani. Minkejja d-diffikultajiet tal-ħajja, kunu sinjal ta’ tama. Intom fil-qalb ta’ Alla, intom fit-talb tiegħi u nirringrazzjakom li ġejtu hawn daqshekk numerużi u mimlija ħeġġa u ferħ. Grazzi!
Fit-tmiem ta’ din il-laqgħa nġedded l-awgurju tiegħi li r-raġuni u l-moderazzjoni jirbħu fuq kull ħaġa oħra, u li bl-għajununa tal-komunita’ internazzjonali, is-Sirja ssib mill-ġdid it-triq tal-paċi. Nitolbu li Alla jikkonverti lil dawk li huma vjolenti! Nitolbu li Alla jikkonverti lil dawk li għandhom proġetti ta’ gwerra! Nitolbu li Alla jikkonverti lil dawk li jipproduċu l-armi u jbigħuhom, u li jsaħħaħ il-qlub u l-imħuħ ta’ dawk li jaħdmu għall-paċi u jħallashom b’kull barka tiegħu. Il-Mulej ibierek lilkom ilkoll!
Miġjub għall-Malti minn Vivienne Attard.