Għeżież ħuti,
Meta dħalt, ħsibt li kont bdilt il-bieb, li kont dħalt f’Kindergarten… Skużawni!
Nilqa’ minn qalbi lil kull wieħed u waħda minnkom. Insellem lill-Onorevoli Carlo Casini u nirringrazzjah għall-kelmiet tiegħu, imma fuq kollox nesprimi r-rikonoxxenza tiegħi għall-ħidma kollha li hu wettaq għal tant snin fil-Moviment favur il-Ħajja. Nawguralu li meta l-Mulej isejjaħlu għandu, ikunu t-tfal li jiftħulu l-bieb hemm fuq! Insellem lill-Presidenti taċ-Ċentri ta’ Għajnuna lill-Ħajja u dawk responsabbli mid-diversi servizzi, b’mod partikulari mill-“Programm Ġemma”, li f’dawn l-aħħar għoxrin sena, permezz ta’ għamla partikulari ta’ solidarjetà konkreta, ippermetta t-twelid ta’ tant trabi li kieku ma kienu jaraw qatt id-dawl. Grazzi għax-xhieda li qed tagħtu billi tippromovu u tħarsu l-ħajja umana sa mit-tnissil tagħha! Aħna dan nafuh, il-ħajja umana hi qaddisa u invjolabbli. Kull dritt ċivili jissejjes fuq l-għarfien ta’ l-ewwel dritt fundamentali, dak tal-ħajja, li ma joqgħod għall-ebda kundizzjoni, la kwalitattiva, la ekonomika u wisq inqas ideoloġika. “L-istess kif il-kmandament ‘la toqtolx’ iqiegħed quddiemna limitu ċar biex jiżgura l-valur tal-ħajja umana, il-lum jeħtieġ ngħidu ‘le għal ekonomija ta’ l-esklużjoni u n-nuqqas ta’ ugwaljanza’. Din it-tip ta’ ekonomija toqtol… Il-bniedem fih innifsu qed jitqies bħala prodott ta’ konsum, li tista’ tużah u mbagħad tarmih. Ħloqna kultura ta’ l-‘iskart’ u qegħdin saħansitra nippromovuha” (Eżort. App. Evangelii gaudium, 53). U hekk il-ħajja tisfa mormija.
Wieħed mir-riskji l-aktar gravi li għalihom aħna esposti fi żmienna hu l-qasma bejn ekonomija u morali, bejn il-possibbiltajiet offruti minn suq mogħni b’kull teknoloġija ġdida u n-normi etiċi elementari tan-natura umana, li qed tiġi dejjem iżjed imwarrba għall-ġenb. Għalhekk jeħtieġ neħduha qatta’ bla ħabel kontra kull attentat dirett fuq il-ħajja, speċjalment dik innoċenti u li m’għandhiex min jiddefendiha, u t-tarbija fil-ġuf ta’ l-omm hi l-innoċenti per eċċellenza. Niftakru kliem il-Konċilju Vatikan II: “Il-ħajja, darba mnissla, għandha titħares; l-abort u l-qtil tat-trabi huma delitti l-aktar koroh” (Kost. Gaudium et spes, 51). Niftakar darba ilu kelli konferenza għat-tobba. Wara l-konferenza sellimt lit-tobba – dan kien ħafna żmien ilu. Kont qed insellem lit-tobba, nitkellem magħhom, u wieħed ġibidni għall-ġenb biex ikellimni. Kellu pakkett f’idejh u qalli: “Dun, irrid inħallilek dan. Dawn huma l-għodda li jien użajt biex nopera l-abort. Iltqajt mal-Mulej, indimt milli għamilt, u issa qed nissielet favur il-ħajja”. Tani dawn l-għodda kollha. Itolbu għal dan ir-raġel qalbieni!
Min hu Nisrani dejjem għandu d-dmir li jagħti din ix-xhieda evanġelika: li bil-kuraġġ u l-imħabba jħares il-ħajja fil-fażijiet kollha tagħha. Inħeġġiġkom tagħmluh dejjem fi stil li bih in-nies iħossukom qrib tagħhom: biex kull mara tħossha meqjusa bħala persuna, mismugħa, imsieħba.
Tkellimna dwar it-tfal: għandna ħafna! Imma jien irrid nitkellem ukoll dwar in-nanniet, fuq in-naħa l-oħra tal-ħajja! Għax aħna għandna nieħdu ħsieb ukoll tan-nanniet, għax it-tfal u n-nanniet huma t-tama ta’ poplu. It-tfal, iż-żgħażagħ għax ikomplu jmexxuh ’il quddiem, ikomplu jmexxu ’l quddiem lil dan il-poplu; u n-nanniet għax għandhom l-għerf ta’ l-istorja, huma l-memorja ta’ poplu. Inħarsu l-ħajja fi żmien fejn it-tfal u n-nanniet jidħlu f’din il-kultura ta’ l-iskart u jħarsu lejhom bħala materjal għar-rimi. Le! It-tfal u n-nanniet huma t-tama ta’ poplu!
Għeżież ħuti, il-Mulej iwieżen il-ħidma li qed twettqu bħala Ċentri ta’ Għajnuna għall-Ħajja u bħala Movimenti favur il-Ħajja, b’mod partikulari “Wieħed minna”. Nafdakom f’idejn l-interċessjoni smewwija ta’ Ommna l-Verġni Marija u minn qalbi nbierek lilkom u lill-familji tagħkom, lil uliedkom, lin-nanniet tagħkom, u itolbu għalija għax għandi bżonn!
Meta nitkellmu fuq il-ħajja niftakru minnufih fl-omm. Induru lejn l-Omm tagħna biex tħarisna lkoll. Ave Maria.
Barka
Ħaġa ta’ l-aħħar. Għalija meta t-trabi jibku, meta jokorbu, meta jgħajtu, din hi mużika sabiħa ħafna. Imma xi trabi jibku għax bil-ġuħ. Allura nitlobkom, toqogħdux tinkwetaw, reddgħuhom hawn bla nkwiet ta’ xejn!
miġjuba mit-Taljan għall-Malti minn Francesco Pio Attard