Għeżież ħuti, merħba.
Grazzi tal-laqgħa tagħkom u minn qalbi nsellem lil kulħadd. Naf li l-Catholic Fraternity ġa żammet il-laqgħa ma’ l-eżekuttiv u l-kunsill u li l-lejla sa tiftħu s-XVI-il Konferenza Internazzjonali flimkien ma’ l-għażiż Patri Raniero.
Kontu ġentili biżżejjed li għaddejtuli l-programm minn qabel u qed nara li kull laqgħa tiftaħ bid-diskors li għamilt lit-Tiġdid Kariżmatiku fl-okkażjoni tal-laqgħa fl-Istadju Olimpiku f’Ġunju li għadda.
Nixtieq qabel xejn nifirħilkom għax tajtu bidu għal dak li dak in-nhar kien għadu biss xewqa. Diġà sa minn xi xahrejn ilu l-Catholic Fraternity u l-ICCRS bdew jaħdmu mill-istess uffiċċju fil-Palazz ta’ San Kallistu, fl-“Arka ta’ Noè”. Nista’ nimmaġina li ma kienx faċli tieħdu din id-deċiżjoni u nirringrazzjakom minn qalbi għal din ix-xhieda ta’ għaqda, tal-kurrent tal-Grazzja, li qegħdin tagħtu quddiem id-dinja kollha.
Nixtieq ninżel fil-fond ta’ xi temi li nħosshom importanti.
L-għaqda fid-diversità. L-uniformità m’hix ħaġa Kattolika, m’hix Kristjana. L-għaqda fid-diversità. L-għaqda Kattolika hi diversa, imma hi waħda. Ħaġa kurjuża din! L-istess ħaġa li toħloq id-diversità hi dik li mbagħad iġġib l-għaqda: l-Ispirtu s-Santu. Dan jagħmel it-tnejn li huma: l-għaqda fid-diversità. L-għaqda m’hix uniformità, ma tfissirx li tagħmel kollox flimkien bilfors, u la li taħsibha bl-istess mod, u lanqas li titlef l-identità tiegħek. L-għaqda fid-diversità hi preċiżament il-kuntrarju, tfisser li nagħrfu u naċċettaw bil-ferħ id-diversi doni li l-Ispirtu s-Santu jagħti lil kull wieħed u waħda minna u npoġġuhom għas-servizz ta’ kulħadd fil-Knisja.
Il-lum fis-silta tal-Vanġelu li għadna kemm qrajna fil-Quddiesa, kien hemm din l-uniformità ta’ dawk il-persuni li qalbhom marbuta wisq ma’ l-ittra: “M’għandux isir hekk…”, sal-punt li l-Mulej kellu jistaqsi: “Imma, għidli, tista’ tagħmel ftit ġid nhar ta’ Sibt jew le?”. Dan hu l-periklu ta’ l-uniformità. L-għaqda tfisser li tagħraf tisma’, taċċetta d-differenzi, ikollok il-libertà li taħsiba differenti u turiha din il-fehma tiegħek! Bir-rispett kollu lejn l-ieħor li hu ħija. Tibżgħux mid-differenzi! Kif għidt fl-Eżortazzjoni Evangelii gaudium: “Il-mudell m’hux il-globu – li m’hux aqwa mill-partijiet – fejn kull punt hu mbiegħed indaqs miċ-ċentru u m’hemmx differenzi bejn punt u l-ieħor. Il-mudell hu l-priżma, li tirrifletti l-għaqda flimkien tal-partijiet kollha li fiha jżommu xorta l-oriġinalità tagħhom (236), imma jagħmlu l-għaqda.
Qrajt fil-fuljett, fejn hemm l-ismijiet tal-Komunitajiet, li l-frażi li għażiltu li tqiegħdu fil-bidu tgħid hekk: “…naqsmu ma’ kulħadd fil-Knisja l-Magħmudija fl-Ispirtu s-Santu”. Il-Knisja għandha bżonn ta’ l-Ispirtu s-Santu, bla dubju! Kull Nisrani, f’ħajtu, għandu bżonn jiftaħ qalbu għall-ħidma li tqaddes ta’ l-Ispirtu s-Santu. L-Ispirtu, imwiegħed mill-Missier, hu Dak li jurina lil Ġesù Kristu, li jagħtina l-possibbiltà li llissnu: Ġesù! Mingħajr l-Ispirtu s-Santu ma nistgħux illissnuh. Hu jurina lil Ġesù Kristu, iwassalna għal-laqgħa personali tagħna miegħU u hekk jibdlilna ħajjitna. Mistoqsija: Qed tgħixuha din l-esperjenza? Aqsmuha! U biex taqsmuha, jeħtieġ tgħixuha, tkunu xhieda ta’ dan!
It-tema li għażiltu għall-Kungress hi “Ġieħ u Qima għal evanġelizzazzjoni ġdida”. Fuq dan għandu jitkellem Patri Raniero, mgħallem tat-talb. It-tifħir lil Alla hu n-nifs ’il ġew li jagħtina l-ħajja, għax hu l-intimità ma’ Alla, li tikber mal-ġieħ li nagħtuh ta’ kuljum. Xi żmien ilu smajt dan l-eżempju li jidhirli li jixraq ħafna: in-nifs għall-bniedem. In-nifs hu magħmul minn żewġ fażijiet: tieħu n-nifs ’il ġewwa, jiġifieri tieħu l-arja ġo fik, u tieħu n-nifs ’il barra, jiġifieri tħalliha toħroġ. Il-ħajja spiritwali tikber, titmantna bit-talb u tidher fil-missjoni: nifs ’il ġewwa – it-talb – u nifs ’il barra. Meta nieħdu n-nifs ’il ġewwa, fit-talb, nirċievu l-arja ġdida ta’ l-Ispirtu, u meta neħduh ’il barra, inkunu nħabbru lil Ġesù Kristu mqajjem mill-Ispirtu nnifsu.
Ħadd ma jista’ jgħix mingħajr ma jieħu n-nifs. L-istess għan-Nisrani: mingħajr tifħir u mingħajr missjoni ma jkunx jgħix ta’ Nisrani. U bit-tifħir lil Alla, l-adorazzjoni. Ftit li xejn nitkellmu dwar adorazzjoni. “X’tagħmel meta titlob?” – “Nitlob dak li jkolli bżonn lil Alla, nirringrazzjah, irressaqlu persuni oħra…”. L-adorazzjoni, tqim lil Alla. Din hi parti min-nifs li rridu nieħdu: il-ġieħ u l-qima.
Kien it-Tiġdid Kariżmatiku li lill-Knisja fakkarha fil-ħtieġa u l-importanza tat-talb ta’ tifħir. Meta nitkellmu fuq it-talb ta’ tifħir fil-Knisja jiġuna f’moħħna l-Kariżmatiċi. Meta tkellimt dwar it-talb ta’ tifħir waqt Quddiesa li kelli f’Santa Marta, jien għidt li dan m’hux biss it-talb tal-Kariżmatiċi imma tal-Knisja kollha! Hu l-għarfien li Alla hu l-Mulej u s-Sid tagħna u tal-ħolqien kollu, u dan nesprimuh biż-żfin, bil-mużika u l-kant.
Issa nixtieq naqbad xi siltiet minn dik l-omelija: “It-talb ta’ tifħir hu talb Nisrani għalina lkoll. Fil-Quddiesa, kuljum, meta nkantaw u ntennu ‘Qaddis, Qaddis, Qaddis…’, din hi talba ta’ tifħir, infaħħru lil Alla għall-kobor tiegħu għax hu kbir. U ngħidulu ħwejjeġ sbieħ, għax jogħġobna li hu hekk… It-talb ta’ tifħir jagħmilna għammiela. Sara żifnet fil-waqt kbir ta’ meta nisslet fi ħdanha ta’ disgħin sena! Min jagħmel il-frott, ifaħħar lil Alla. Ir-raġel jew il-mara li jfaħħru lill-Mulej, li jitolbu billi jweġġħu lill-Mulej – u meta jagħmlu dan, jagħmluh bil-ferħ – u jithennew meta jkantaw is-Sanctus fil-Quddiesa, huma raġel jew mara għammiela. Ejjew naħsbu f’kemm hi ħaġa sabiħa li titlob billi tfaħħar lil Alla. Din għandha tkun it-talba tagħna ta’ tifħir u, meta ngħolluha quddiem il-Mulej, għandna ngħidu lill-qalb tagħna: ‘Intrefa’, ruħ tiegħi, għax int qiegħda quddiem is-Sultan tal-glorja’” (Quddiesa f’Santa Marta, 28 ta’ Jannar 2014).
Flimkien mat-talba ta’ tifħir, it-talba ta’ interċessjoni l-lum hi karba lill-Missier għal ħutna Nsara ppersegwitati u maqtula u għall-paċi fid-dinja mħabbta tagħna.
Faħħru dejjem lill-Mulej, tieqfu qatt tfaħħruh, faħħruh dejjem iżjed, bla waqfien. Qaluli bi gruppi ta’ talb tat-Tiġdid Kariżmatiku fejn flimkien jgħidu r-Rużarju. It-talb lill-Madonna m’għandu qatt jonqos, qatt! Imma meta intom tinġabru flimkien, faħħru lill-Mulej!
Qed nilmaħ fostkom ħabib għażiż, il-Pastor Giovanni Traettino, li m’ilux wisq mort inżuru. Catholic Fraternity, tinsa qatt l-għeruq tiegħek, tinsiex li t-Tiġdid Kariżmatiku hu mill-istess natura tiegħu ekumeniku. Fuq dan is-suġġett, il-Beatu Pawlu VI, fl-Eżortazzjoni mill-isbaħ u attwalissma tiegħu fuq l-Evanġelizzazzjoni, jgħid: “Il-forza ta’ l-evanġelizzazzjoni tonqos sewwa kemm-il darba dawk li jxandru l-Vanġelu jkunu mifrudin bejniethom b’xi mod jew ieħor. M’hux din forsi waħda mill-markiet kbar ta’ l-evanġelizzazzjoni l-lum? It-testment spiritwali tal-Mulej jgħidilna li l-għaqda bejn id-dixxipli tiegħU m’hix biss il-prova li aħna tiegħu, iżda wkoll il-prova li Hu mibgħut mill-Missier. Din hi l-qofol tal-kredibbiltà ta’ l-Insara u ta’ Kristu nnifsu. Iva, il-futur ta’ l-evanġelizzazzjoni hu ċertament marbut max-xhieda ta’ l-għaqda li l-Knisja tagħti. Din hija għajn ta’ responsabbiltà u anki ta’ faraġ” (Evangelii nuntiandi, 77). Sa hawn, il-Beatu Pawlu VI.
Ekumeniżmu spiritwali, nitolbu flimkien u nxandru flimkien li Ġesù hu l-Mulej u nindaħlu flimkien biex ngħinu lill-foqra, fil-faqar kollu tagħhom. Dan għandna nagħmlu u ma ninsewx li l-lum id-demm ta’ Ġesù, imxerred mill-għadd ta’ martri Nsara tiegħu fid-diversi partijiet tad-dinja, qed isejħilna u jimbuttana għall-għaqda. Għall-persekuturi, aħna m’aħniex mifruda, m’aħniex Luterani, Ortodossi, Evanġeliċi, Kattoliċi… Le! Aħna ħaġa waħda! Għall-persekuturi aħna Nsara! Ma jinteressahomx iżjed minn hekk. Dan hu l-Ekumeniżmu tad-demm li qed ngħixu l-lum.
Ftakru: fittxu l-għaqda li hi opra ta’ l-Ispirtu s-Santu u tibżgħux mid-diversità. In-nifs tan-Nisrani li jħalli tidħol l-arja dejjem ġdida ta’ l-Ispirtu s-Santu u jerġa’ jitfgħu fid-dinja. Talb ta’ tifħir u missjoni. Aqsmu l-Magħmudija fl-Ispirtu s-Santu ma’ kulħadd fil-Knisja. Ekumeniżmu spiritwali u ekumeniżmu tad-demm. L-għaqda tal-Ġisem ta’ Kristu. It-tħejjija ta’ l-Għarusa għall-Għarus li ġej! Għarusa waħda! Ilkoll. (Apok 22:17).
U fl-aħħar nett, barra li rrid nirringrazzjahom, irrid insemmi b’mod speċjali lil dawn iż-żgħażagħ mużiċisti li ġejjin mit-tramuntana tal-Brażil u li daqqew fil-bidu, u nittama li sa jkomplu jdoqqu xi ftit. Laqgħuni b’tant imħabba bil-kant “Sidi Ġesù huwa ħaj”. Naf li ħejjew xi ħaġa iżjed u nistedinkom ilkoll tisimgħuhom qabel insellmu lil xulxin. Grazzi.
miġjub mit-Taljan għall-Malti minn Francesco Pio Attard