Għeżież ħuti,
Il-Milied jinsab qrib u joffrilna okkażjoni sabiħa biex niltaqgħu u nawguraw lil xulxin.
Qabel kollox nixtieq nirringrazzjakom għall-ħidma tagħkom, għall-impenn li għandkom biex tagħmlu l-affarijiet sewwa u dejjem anki meta mhemm ebda rikonoxximent: ħafna drabi bniedem jagħmel l-affarijiet sew u ma jkunux apprezzati. Irrid niringrazzja b’mod partikolari lil dawk fostkom li ilhom jagħmlu l-istess xogħol għal snin sħaħ, xogħol spiss moħbi, u jagħmlu l-affarijiet sewwa. Nafu li dan hu “normali” hu sempliċiment li wieħed jaqdi dmiru; imma nafu wkoll li għall-bnedmin dan mhux ħafif, aħna maħniex magni .... għall-grazzja t’Alla! – u ximindaqqiet għandna bżonn xi ftit tal-inċentiv jew li nibdlu xi ftit.... Nifirħilkom talli b’mod meqjus tħossukom kburin li tagħmlu mill-aħjar li tistgħu l-affarijiet normali ta’ kuljum. Grazzi! Nibqgħu mexjin, kulħadd fil-qasam tax-xogħol li għandu, bil-kollaborazzjoni bejnietkom, bil-paċenzja u bl-għajnuna li tagħtu lil xulxin.
U fil-waqt li nirringrazzjakom irrid ukoll nitlobkom maħfra għall-iskandli li ġraw fil-Vatikan. Imma rrid li l-atteġġjament tiegħi u tagħkom, speċjalment f’dawn il-jiem, ikun fuq kollox dak tat-talb, itolbu għall-persuni mdaħħlin f’dawn l-iskandli sabiex min żbalja jindem u jkun jista’ jsib mill-ġdid it-triq it-tajba.
Hemm ħaġ’oħra li nixtieq ngħidilkom u forsi hi l-aktar importanti: inħeġġieġkom biex tieħdu ħsieb taż-żwieġ tagħkom u ta’ uliedkom. Ħudu ħsiebhom, tittraskurawx: ilagħbu mat-tfal, ma’ uliedkom. Iż-żwieġ hu bħal pjanta. Mhux aramrju li titilqu hemm, fil-kamra u jkun biżżejjed ittih tfarfira kultant. Pjanta hi ħaġa ħajja, hemm bżonn tieħu ħsiebha kuljum: tara kif inhi, ittiha l-ilma, eċċetra. Iż-żwieġ hu realtà ħajja: f’ebda fażi tal-mixja tal-familja l-ħajja tal-koppja m’għandna nagħmluha fatta. Niftakru li l-akbar rigal lill-ulied mhux l-oġġetti, imma l-imħabba tal-ġenituri. U mhux qed nifhem biss l-imħabba tal-ġenituri lejn l-ulied imma porpju l-imħabba tal-ġenituri bejniethom, jiġifieri r-relazzjoni konjugali. Dan jagħmel tajjeb ħafna lilkom u lil uliedkom ukoll! Tittraskurawx ‘il-familja!
Għalhekk, qabel kollox, ikkultivaw “il-pjanta” taż-żwieġ li hi intom il-miżżewġin, u fl-istess waqt ħudu ħsieb ir-relazzjoni ma’ wliedkom, anki hawn, billi tibbażaw kollox fuq ir-relazzjoni umana aktar milli fuq dik tal-oġġetti. Tkellmu ma’ wliedkom, isimugħhom, staqsuhom kif jaħsbuha. Dan id-dajlogu bejn il-ġenituri u l-ulied jagħmel tant tajjeb! Iseddaq il-maturità tal-ulied. Nibbażaw kollox fuq il-ħniena, fuq ir-relazzjonijiet ta’ kuljum, bejn il-mara u r-raġel, bejn il-ġenituri u l-ulied, bejn l-aħwa; u nieħdu ħsieb in-nanniet: in-nanniet huma importanti ħafna fil-familja. In-nanniet għandhom il-fakra, għandhom id-dehen. Tagħtux il-ġenb lin-nanniet! Huma importanti ħafna. Mara żgħażugħa qaltli li għandha binha ta’ seba’ snin u magħhom tgħix in-nanna li għandha disgħin sena: din mhix għal kollox f’sikkitha u tawhom parir biex jeħduha f’xi dar tal-anzjani. U din il-mara għaqlija, li ma marritx l-università, wieġbet lil min kien qed itiha l-parir biex lin-nanna jeħduha fid-dar tal-anzjani: “Le! Jien irrid li ibni jikber ħdejn in-nanna!” Kienet taf kemm ġid jagħmu n-nanniet lin-neputijiet. Ħudu ħsieb il-paċi fil-familja: fil-familja nillitikaw, dan nafuh ilkoll. Fil-fatt jidher mhux normali jekk fiż-żwieġ ma tinqalax xi kwistjoni. L-importanti hu li l-ġurnata ma tintemmx mingħajr ma nkunu għamilna paċi. Aħwa li ma jitlewwmux? Imma dejjem! Imma mbagħad jagħmlu paċi. U intom ġenituri, meta uliedkom ikunu tlewmu, qabel ma tmorru torqdu għidulhom: “Agħmlu paċi, ħudu b’idejn xulxin, agħtu bewsa lil xulxin. Jeħtieġ li nitgħallmu dan l-għaqal li nagħmlu paċi. Qamet gwerra matul il-ġurnata? Għadha sħuna din il-gwerra? Tħallux li ssir gwerra bierda: għax il-gwerra bierda tal-jum ta’ wara hija aktar perikoluża mill-gwerra “sħuna”. Fhimtu? Filgħaxija dejjem agħmlu paċi!
Il-Ġublew għandu jingħex anki fi ħdan il-familja domestika, mhux biss fl-avvenimenti l-kbar. Anzi, il-Mulej iħobb lil min ikollu l-ħniena fiċ-ċirkustanzi ordinarji tal-ħajja. Dan irrid nawguralkom: li tħossu l-ferħ tal-ħniena ibda minn ħdan il-familja tagħkom.
Grazzi tax-xogħol tagħkom, maħfra għall-iskandli u ibqgħu mexjin ‘il quddiem. Ibqgħu mexjin ‘il quddiem f’dil-komunità u wasslu l-awguri tiegħi lill-għeżież tagħkom, lill-anzjani, lill-morda. U komplu, jekk jogħġobkom, itolbu għalija. Grazzi mill-ġdid u l-Milied it-tajjeb.
Miġjub għall-Malti mit-Taljan minn Joe Huber