Il-jum it-tajjeb!
Qabel kollox, ftit ringrazzjamenti. Irrid nirringrazzja lil kulħadd għax-xogħol li tagħmlu hawn ġew. Kulħadd għandu x-xogħol tiegħu, jaf jagħmlu.... Fil-Vatikan ukoll hawn il-gruppi tax-xogħol.... Dax-xogħol hu l-magna ta’ dan “it-trejn”, il-Vatikan, is-Santa Sede, xogħol li jidher tant tqil, tant kbir, b’tant problemi, tant affarijiet oħra... U kull wieħed u waħda minnkom tagħtu l-aħjar tagħkom biex tagħmlu dax-xogħol. Jien konxju li mingħajr il-ħidma tagħkom – wieħed minnkom kien qed jgħidli li ilu 43 sena jaħdem hawn, kemm tifkiriet! - mingħajr ix-xogħol li tagħmlu intom, l-affarijiet ma jmorrux sew, u dan ifisser li l-ħidma tal-Knisja ma tmurx tajjeb, ma tkunx tista’ tagħmel tant ħidma biex tipprietka l-Evanġelju, biex tgħin lil tant nies, lill-morda, l-iskejjel, tant affarijiet.... Intom tiffurmaw parti minn dil-”katina” li tmexxi ‘l quddiem il-ħidma tagħna fil-Knisja.
L-ewwel kelma li rrid ngħid hi xogħol. Imma mhux biex ngħidilkom ħalli taħdmu aktar, fittxu ħaffu! Le, le, biex ngħidilkom grazzi. Grazzi. Imma meta fil-Vatikan nitkellmu dwar ix-xogħol, hemm problema wkoll. Sinjura minn fostkom x’ħin daħlet hi u tipponta lejn żagħażugħ, qalet: “Għinu lill-ħaddiema prekarji”. Xi jiem ilu kelli laqgħa mal-Kardinal Marx, li hu l-President tal-Kunsill tal-Ekonomija, u ma’ Monsinjur Ferme, is-segretarju, u għidt: “Marridx xogħol moħbi fil-Vatikan”. Nitlobkom skuża jekk dan għadu jeżisiti. Il-famuż artiklu 11, hu artiklu validu bħala prova, imma prova ta’ sena jew sentejn, mhux aktar. L-istess bħalma għidt li ħadd m’għandu jibqa’ mingħajr xogħol, jiġifieri li jitkeċċa, sakemm ma jkunx xogħol ieħor barra, li jagħmlu għall-konvenjenza tiegħu, jew ikun hemm ftehim li (x-xogħol) ikun konvenjenti għall-persuna, ngħid dan: “hawnhekk għandna naħdmu biex ma jkunx hawn xogħol jew ħaddiema prekarji. Għalija hija wkoll problema ta’ kuxjenza, għaliex ma nistgħux ngħallmu d-duttrina soċjali tal-Knisja u mbagħad nagħmlu dawn l-affarijiet li mhumiex sew. Wieħed jifhem li għal xi żmien il-persuna trid tgħaddi minn żmien ta’ prova, iva, prova ta’ sena, forsi tnejn, imma nieqfu hemm. Bil-moħbi, xejn. Din hi l-intenzjoni tiegħi. Intom għinuni, għinu lis-superjuri tagħkom, dawk li huma dipendenti mill-Governatorat, il-Kardinal, is-Segretarju, għinu biex insolvu dawn il-problemi tas-Santa Sede: il-ħaddiema prekarji li għad hawn.
Għalhekk l-ewwel kelma hi “xogħol”, biex irrodd ħajr, nitkellem dwar ix-xogħol, dwar ix-xogħol prekarju u wkoll, l-aħħar ħaġa: ix-xogħol u t-triq tagħkom lejn il-qdusija, lejn l-hena, lejn it-tkabbir. Illum, is-saħta l-aktar kerja li hawn hi li tkun qiegħed. U tant nies – intom żgur tafu ħafna minnhom – m’għandhomx xogħol. Għax ix-xogħol itina d-dinjità, u x-xogħol żgur itina d-dinjità. Marridx insemmi ismijiet, imma dan issibuh fil-ġurnali. Illum fil-gażżetta rajt dawn iż-żewġ problemi: żewġ ditti importanti, hawn fl-Italja, li jinsabu f’riskju, u biex isalvaw iridu “jirrazzjonaliżżaw” - dik hi l-kelma – ix-xogħol, u jkeċċu tlieta, erbgħat elef ruħ. Ikrah, ikrah ħafna. Għax b’hekk tintilef id-dinjità. U din hi problema mhux biss ta’ hawn, tal-Vatikan, jew tal-Italja jew tal-Ewropa: hi problema dinjija. Hi problema li ġejja minn tant fatturi fid-dinja. Inħarsu x-xogħol u jkollna d-dinjità, nieħdu l-ħobż id-dar: “Nieħdu jien, għax naqla’ jien. Mhux għax ngħaddi għand il-Caritas biex ituni xi ħaġa, le, naqla’ ħobżi jien” Din hi d-dinjità. Hekk hu x-xogħol. Grazzi. Għinu lis-superjuri tagħkom biex itemmu dis-sitwazzjoni tax-xogħol mhux regolari u ħarsu x-xogħol għax dak hu d-dinjità tagħkom. Ikolli ngħid: ħarsu x-xogħol imma għamluh sew! Dan hu importanti!
It-tieni kelma li tiġini f’moħħi li ngħidilkom hi: il-familja. Nixtieq ngħidilkom bis-sinċerità: meta jien insir naf li xi familja minn tagħkom tinsab fi kriżi, li hemm it-tfal li qed isofru għax jaraw li l-familja hija....... problema, jien insofri. Imma ħallu lil min jgħinkom. Jien ridt li s-Segretarju Ġenerali tal-Governatorat ikun isqof biex ikollu din id-dimensjoni pastorali. Jekk jogħġobkom, salvaw il-familji. Jiena naf li mhux faċli, li hemm problemi ta’ personalità, problemi psikoloġiċi, problemi.... tant problemi fiż-żwieġ. Imma ppruvaw fittxu l-għajnuna mill-ewwel, biex tħarsu l-familji. Jien naf li fostkom hemm nin hu separat; naf dan u jnikkitni, inbati magħkom... hekk hi l-ħajja. Imma nixtieq ngħinkom f’dan; ħallu lil min jgħinkom. Jekk saret il-fatta, għallanqas tħallux lit-tfal ibatu; għax meta l-ġenituri jillitikaw, it-tfal isofru, isofru. U ntikom parir: qatt tiġġieldu quddiem it-tfal. Qatt. Għax huma ma jifhmux. Ħarsu l-familja. U għal dan hawnhekk għandkom lill-Monsinjur Verges u l-kappillani wkoll; jgħidulkom huma fejn għandkom tmorru biex tfittxu l-għajnuna. Il-familja: din hi l-ġawhra l-kbira, għax Alla ħalaqna familja. Ix-xbieha t’Alla hu ż-żwieġ, raġel u mara, fekondi: “tkattru”, għamlu l-ulied, ibqgħu mexjin ‘il quddiem. Illum jien kuntent xħin qed nara tant u tant tfal hawnhekk. Hija familja. Ħarsu l-familji hi t-tieni kelma li tiġini f’moħħi.
It-tielet kelma li tiġini f’moħħi – forsi xi ħadd minnkom ikollu aptit jgħidili: “Biżżejjed!” - hi kelma li tgħodd dejjem: it-tqassis. Forsi qed niżbalja..... fil-Vatikan m’hawnx tqassis... forsi.. ma nafx.. Wieħed minnkom kien qed jgħidli, ħaddiem minnkom – ġurnata minnhom meta jien għamilt prietka dwar it-tqassis, u hu kien ġie għall-quddiesa flimkien ma’ martu, kien qalli: “Padre, jekk fil-Vatikan ma tqassasx, tibqa’ iżolat”. Aħsbu, aħsbu! Intom tafu x’ngħid dwar it-tqassis: min iqassas hu terrorista, għax jagħmel bħat-terroristi; jitfa’ bomba, jitlaq, il-bomba tisplodi u tagħmel ħsara lil ħaddieħor, bl-ilsien, dik il-bomba. Tagħmlux terroiżmu! Tagħmlux it-terroriżmu tal-paroli, tat-tqassis, jekk jogħġobkom. Din hi t-tielet kelma li qed tiġini f’moħħi. Forsi xi ħadd jista’ jgħidli: “Padre, tina parir: kif nistgħu nagħmlu biex ma nqassux dwar l-oħrajn!” Igdem ilsienek! Żgur li jintefaħlek, imma tkun għamilt ħaġa tajba għax ma qassastx. It-tqassis, anki minn persuni li suppost jagħtu eżempju, u ma jagħtuhx.
U hawn, ir-raba’ kelma li nixtieq ngħidilkom: maħfra. “Maħfra” u “skużani”. Għax aħna mhux dejjem nagħtu eżempju tajjeb: aħna – qed nitkellem dwar “il-fawna klerikali” - aħna (jitbissem) mhux dejjem nagħtu eżempju tajjeb. Fil-ħajja hemm żbalji li nagħmlu aħna l-kjeriċi, dnubiet, inġustizzji, u kultant lin-nies ma nittrattawhomx tajjeb, inkunu nervużi, nagħmlu l-inġustizzji.... Maħfra għal dawn l-eżempji mhux tajbin kollha. Aħna għandna nitolbu maħfra. Jien ukoll nitlob maħfra għax “kultant jitilgħuli” (jidħak), nitlef sabri.........
Għeżież kollaboraturi, ħuti. Dawn huma l-kliem li ġew minn qalbi: xogħol, familja, tqassis, maħfra.
U l-aħħar kelma hi l-awguri tal-Milied: Il-Milied it-tajjeb: Imma Milied tajjeb fil-qalb, u fil-kuxjenza wkoll. Intom ukoll, la tibżgħux titolbu maħfra jekk il-kuxjenza ċċanfarkom dwar xi ħaġa; fittxu konfessur tajjeb u għamlu tindifa sewwa! Jgħidu li l-aħjar konfessur hu s-saċerdot trux (jitbissem): ma jġiegħlekx tistħi! Imma anki jekk ma jkunx trux, hemm ħafna mżejnin bil-ħniena, ħafna, li jisimgħuk u jaħfrulek: “Ibqa’ miexi!”. Il-Milied huwa opportunità tajba biex nagħmlu paċi magħna nfusna. Ilkoll kemm aħna midinbin, ilkoll. Ilbieraħ jien għamilt il-qrara tal-Milied: ġie l-konfessur... u għamlitli tajjeb. Ilkoll għandna nqerru.
Nawguralkom il-Milied it-tajjeb, ta’ ferħ, imma dak il-ferħ li jiġi minn ġewwa. U marridx ninsa lill-morda, li forsi għandkom fil-familja tagħkom, li qed ibatu, lilhom ukoll irrid nibgħat il-barka tiegħi. Grazzi ħafna. Inħarsu x-xogħol, jalla jkun ġust; inħarsu l-famillja, inħarsu lsienna; u, jekk jogħġobkom, aħfrulna tal-eżempji ħżiena li ntukom; u f’dal-Milied lil qalbna ntuha tindifa tajba, biex ikollna l-paċi u nkunu hienja.
U qabel nitlaq, nixtieq intikom il-barka, lilkom u lill-familji tagħkom, lil kulħadd. Grazzi ħafna tal-għajnuna tagħkom. Ngħidu Ave Marija lill-Madonna: “Sliem għalik, Marija.....”
(Barka)
U itolbu għalija, tinsewx!
Miġjub għall-Malti mill-Ingliż minn Joe Huber