LAQGĦA TAL-QDUSIJA TIEGĦU FRANĠISKU
MAL-EDITURI U L-KOLLABORATURI TAR-RIVISTA
"AGGIORNAMENTI SOCIALI"
Sala tal-Konċistorju
Il-Ġimgħa, 6 ta' Diċembru, 2019
Diskors impromptu tal-Qdusija Tiegħu
Kelli mħejji diskors ta' tmien paġni... Wara t-tielet paġna ftit se jkunu dawk li jkunu jisimgħu! Se ntihulkom u rrid nitkellem minn moħħi dwar xi affarijiet li nħoss.
Grazzi taż-żjara u grazzi Patri Bartolomeo (Sorge S.J.) talli ġejt. Ma' Patri Bartolomeo konna għamilna t-32 kongregazzjoni ġenerali (tal-Ġiżwiti) fl-1974, tiftakar? Dak it-taqbid intern, dawk il-problemi...... Kien pijunier f'dan u rroddlu ħajr. U (rrod ħajr) lilkom ukoll, li ġġorru fuqkom l-għeruq, il-memorja, l-iżvilupp tal-ħidma soċjali, li hija importanti. Titilfux il-kuraġġ, għax ftit taż-żmien ilu qrajt xi ħaġa tant ċara, li triegħed,mhux qed ngħidl lill-politika Taljana, imma tal-anqas lill-Knisja Taljana! Grazzi, grazzi lilkom ilkoll.
Ħaġa li qal Patri Costa (Direttur tar-rivista): isma'. Qatt ma nistgħu nagħtu orjentament, triq, suġġeriment mingħajr is-smigħ. Is-smigħ huwa propju l-atteġġjament fundamentali ta' kull persuna li trid tagħmel xi ħaġa għal ħaddieħor. Nisimgħu is-sitwazzjonijiet, nisimgħu il-problemi, bil-miftuħ, mingħajr preġudizzji. "Int għidt hekk u hekk....". Le, bla preġudizzji. Għax hemm mod kif tisma' li hu "Iva, iva, fhimt, iva, iva....", u kollox jispiċċa xejn, kollox inġib jaqbel mal-kategorija tiegħi. U dan mhux sew.
Nisimgħu u nħallu r-realtà tolqotna. U xi drabi l-kategoriji jaqgħu jew jirranġaw ruħhom. Is-smigħ għandu jkun l-ewwel pass, imma jeħtieġ li jsir b'moħħ u qalb miftuha, mingħajr preġudizzji. id-dinja tal-preġudizzji, tal-"iskejjel tal-ħsieb", ta' pożizzjonijiet riġidi, jagħmlu l-ħsara... Per eżempju, illum fl-Ewropa qed ngħixu l-preġudizzju tal-populiżmi, il-pajjiżi qed jingħalqu fihom infushom u jduru lejn l-ideoloġiji. Imma mhux biss ideoloġiji ġodda - xi ħaġa minn dan hemm - imma qed iduru għall-qodma, għall-ideoloġiji antiki li kienu l-kawża tat-tieni gwerra dinjia. Għaliex? Għax ir-realtà ma jisimgħuhiex kif inhi. Hemm perspettiva ta' dak li rrid li jsir, dak li rrid li għandu jkun il-ħsieb, hekk għandu jsir..... Huwa kumpless li jġagħalna nieħdu post Alla l-ħallieq: aħna nieħdu s-sitwazzjoni f'idejna u naħdmu: ir-realtà hi dak li jien irrid li jsir. Nagħmlu ftit 'filters'. Imma r-realtà hi ħaġa oħra. Ir-realtà hi sovrana. Jogħġobna jew ma jogħġobniex, imma hija sovrana. U jien jeħtieġli niddjaloga mar-realtà.
It-tieni pass. Isma' u ddjaloga, m'għandekx timponi t-toroq tal-iżvilupp, jew is-soluzzjoni tal-problemi. Jekk jien għandi nisma', għandi naċċetta r-realtà kif inhi, ħalli nixtarr liema għandha tkun it-tweġiba tiegħi. U hawn naslu għall-qofol tal-problema. Liema hi t-tweġiba tan-nisrani? Nagħmlu djalogu ma' dik ir-realtà u nibdew mill-valuri tal-Vanġelu, ta' dak li għallimna Ġesù, mingħajr ma nimponuh dommatikament, imma bid-djalogu u bid-dixxerniment.
Wieħed Ġiżwita fit-Tajlandja, li jaħdem mar-rifuġajti, meta kont hemmhekk kien għamilli dil-mistoqsija: "Illum liema hi t-triq tal-ħidma tagħna mar-rifuġjati?" U t-tweġiba hi: m'hemmx triq, hemm mogħdijiet żgħar li kull wieħed minna għandu jfittex huwa u jħares lejn ir-realtà, billi jdur lejn it-talb u jagħmel id-dixxerniment. Realtà, talb u dixxerniment. U hekk nibqgħu mexjin 'il quddiem fil-ħajja, anki bil-problemi soċjali, kulturali.... Imma jekk intom titilqu mill-preġudizzju jew minn pożizzjonijiet stabbiliti, minn deċiżjonijiet dommatiċi, qatt u qatt m'intom se taslu twasslu messaġġ. Il-messaġġ għandu jasal mingħand il-Mulej permezz tagħna. Aħna nsara u l-Mulej ikellimna bir-realtà, waqt it-talb u bid-dixxerniment.
Dan nixtieq ngħidilkom għar-rivista tagħkom. Qatt u qatt taħbu r-realtà. Għidu dejjen: "Hekk huma l-affarijiet". Qatt taħbuha b'dik ir-rassenjazzjoni li tiġi minn "issa naraw......, forsi l-affarijiet jinbidlu....". Qatt taħbuha: ir-realtà hi waħda, kif tidher. Imbagħad ippruvaw ifhmuha fil-qafas tal-awtonomija interpretattiva tagħha, għax ir-realtá wkoll għandha l-mod kif tinterpreta lilha nfisha. Trid tkun mifhuma. Imbagħad id-djalogu mal-Vanġelu, mal-messaġġ nisrani; it-talb, id-dixxerniment u b'hekk inkunu qed nibnu mogħdijiet żgħar ġodda biex nibqgħu mexjin 'il quddiem. Illum m'hemmx "highways" għall-evanġeliżżazzjoni, m'hemmx. Hemm biss mogħdijiet umli, umli, li jmexxuna 'l quddiem.
Jien nixtieq ninkoraġġikom għal dan, u forsi xi ħadd minnkom jgħid: "Imma padre, il-problemi huma ħafna u nibżgħu li niżolqu u niżbaljaw". Imma, bil-grazzja t'Alla! Jekk taqa' iżżi ħajr 'l Alla għax ikollok iċ-ċans li terġa' tqum u tibqa' miexi 'l quddiem..... Imma xi ħadd li jibqa' wieqaf ċass minħabba l-biża' li jaqa' jew li jiżbalja, qatt u qatt ma jista' jkun għammiel fil-ħajja. Nimxu 'l quddiem, bil-kuraġġ. U jekk il-kritika tkun tajba tqawwikom, issaħħaħkom.
Turikom fejn kienu l-iżbalji. U jekk il-kritika tiġi minn xi qalb ħażina, jaqbakom xi ftit tal-mejt bl-akkaniment li soltu jiġri f'dawn il-każi........ Imma żommu dejjem dik il-libertà ġewwinija, u huwa biss min jitlob, min joqgħod quddiem Alla, min jaqbad il-Vanġelu f'idejh, li għandu l-libertà, din hi l-libertà interjuri. Dan mhux pjetiżmu, le, huwa awtentiċità. Bl-idejn il-ħidma u bil-qalb inħossu, nisimgħu, dak li qed jiġri fin-nies. Is-smigħ. Il-kelma tiegħek (fl-introduzzjoni ta' Patri Costa) qanqlet dan kollu fija. Qed noffrih spontanjament, u mbagħad "akkademikament" hemm id-diskors li kelli nagħmel, twil tmien paġni!
Itolbu għalija, jien nitlob għalikom, u ibqgħu mexjin 'il quddiem, dejjem 'il quddiem!
Miġjub għall-Malti mit-Taljan minn Joe Huber