Immiraw fl-għoli, afdaw f'Ġesù, miegħu kollox jinbidel: l-istedina li għamel il-Papa liż-żgħażagħ ta' Sardinja
L-aħħar laqgħa ta' festa li kellu l-Papa Franġisku waqt iż-żjara pastorali li għamel f'Cagliari kienet miż-żgħażagħ fi Pjazza Carlo Felice. Franġisku intlaqa' b'entużjżamu kbir u beda biex qalilhom li meta jħares lejhom jiġih f'moħħu l-Jum Dinji ta' Rio de Janeiro. “Forsi xi wħud minnkom kienu hemm, imma żgur li ħafna segwew l-avveniment bit-televixin jew l-internet. Dik kienet esperjenza sabiħa ħafna, festa ta' fidi u ta' fraternità, li timlik bil-ferħ. L-istess ferħ li qed inħossu llum. Inroddu ħajr lill-Mulej u lill-Verġni Marija, Sidtna ta' Bonaria; kienet hi li laqqgħetna hawn. Itolbuha spiss, hija omm tajba, niżgurakom!”. Il-Papa beda r-riflessjoni b'riferiment għall-Vanġelu tal-ġurnata, li kienet saret meditazzjoni dwaru miż-żgħażagħ u li jirrakkonta l-prodiġju li seħħ fuq ix-xtajta tal-Għadira tal-Galilea fejn kienu jgħixu u jaħdmu Xmun (li wara, Kristu tah l-isem ta' Pietru) u ħuh Indrì, flimkien ma' Ġakbu u Ġwanni, anki dawn aħwa, li lkoll kienu sajjieda. Franġisku qal li Ġesù x'ħin ra lil dawk is-sajjieda ħdejn id-dgħajjes tagħhom mehdijin inaddfu x-xbieki, kien imdawwar mill-folla li riedet tisma' kelmtu. Jitla' fuq id-dagħjsa ta' Xmun u jitolbu jaqdef ftit 'il barra mix-xatt. Hekk, bilqegħda fuq id-dagħjsa kellem lill-folla. Ġesù minn fuq idagħajsa jitkellem mal-folla. Meta jispiċċa, jgħid lil Xmun biex jitbiegħed aktar mix-xatt u jkala x-xbiek. Din hi prova għal-Xmun: isimgħuni tajjeb – prova, għax hu flimkien ma' sħabu kienu għadhom kif daħlu mil-lejl li fih is-sajda marret ħażin. Xmun hu bniedem prattiku u sinċier u mill-ewwel jgħid lil Ġesù: Mgħallem, tħabatna lejl sħiħ u ma qbadna xejn.
Dan hu l-ewwel punt,
afferma Franġisku: l-esperjenza tal-falliment. Fil-mistoqsijiet
tagħkom, kien hemm din l-esperjenza: is-Sagrament tal-Ġriżma – kif
insejħulu dan is-Sagrament? Il-Griżma? ....Le!... inbidel
l-isem!...... Sagrament tal-addio, eh? Jagħmlu dan is-Sagrament u
jgħibu mill-Knisja, minnu jew mhux minnu? Dik hi esperjenza ta'
falliment. L-esperjenza ta' falliment l-oħra hi ż-żgħażagħ li huma
neqsin mill-parroċċa: tkellimtu dwar dan intom. Din l-esperjenza
ta' falliment, xi ħaġa li sejra ħażin, delużjoni.... Tul iż-żgħożija
aħna nkunu nħarsu dejjem 'il quddiem imma xi drabi jkollna
l-falliment, frustrazzjoni: hija prova u hi importanti!. Dan qaluh anki dawk li tkellmu f'isimkom fl-ewwel żewġ mistoqsijiet. Huma kienu qed jirreferu għall-komunitajiet fejn il-fidi tidher għajjiena, fejn ftit fidili jieħdu sehem attiv fil-ħajja tal-Knisja, fejn l-Insara xi minn daqqiet jidhru għajjenin u qalbhom sewda u fejn ħafna żgħażagħ, wara li jirċievu l-Griżma, jitilqu: is-Sagrament tat-tislima, tal-addio, kif għedt qabel jiena.
Hija esperejnza ta'
falliment, esperejnza li tħallilna vojt fina, taqtgħalna qalbna.
Minnu jew le? (Iż-żgħażagħ għajtu: Iva). Minnu jew mhux minnu?
(Mill-ġdid iż-żgħażagħ tennew: Iva). Il-Papa mbagħad reġa' qabad jitkellem dwar il-Vanġelu: Pietru, f'dak il-mument jilgħab lilu nnifsu. X'seta' jagħmel? Seta' ċeda quddiem l-għejja u l-isfiduċja u jaħseb li jkun aħjar jirtira u jmur lura d-dar. X'jagħmel minflok? Bil-kuraġġ joħroġ minnu nnifsu u jagħżel li jafda f'Ġesù. Jgħid: tajjeb, fuq il-kelma tiegħek jien se nerġa' nkala x-xbiek. Attenzjoni! Ma jgħidx: bis-saħħa tiegħi, kif qed nikkalkola jien, mill-esperjenza li għandi ta' sajjied espert, imma “Fuq il-kelma tiegħek”, fuq il-kelma ta' Ġesù! U r-riżultat kien sajda inkredibbli, ix-xbiek imtlew tant li kienu se jinqasmu.
Dan hu t-tieni punt:
il-fiduċja f'Ġesù. Il-fiduċja f'Ġesù. U meta qed ngħid dan, irrid
inkun sinċier u ngħidilkom: jien ma ġejtx hawn biex inbiegħelkom
l-illużjoni. Jien ġejt hawn biex ngħidilkom: hemm Persuna li tista'
tmexxikom 'il quddiem: afdaw fiha! Dan hu Ġesù! Afdaw f'Ġesù! U
Ġesù mhux illużjoni! Afdaw fih!
Meta l-isforzi biex
terġgħu tqajjmu l-fidi fost sħabkom jidhru inutli, bħalma kienet
it-tbatija tas-sajjieda tul il-lejl, ftakru li ma' Ġesù kollox
jinbidel. Il-Kelma tal-Mulej imliet ix-xbiek, u l-Kelma tal-Mulej
tagħmel il-ħidma missjunarja tad-dixxipli, effikaċi. Ġesù qed jgħid dan lil kull wieħed u waħda minnkom. Huwa hu li jagħti l-qawwa! Hemm it-theddida tat-tgergir, tal-ilment, tar-rassenjazzjoni. Dawn inħalluhom għal dawk li jimxu wara l-”alla tat-tgergir”! Eh? U intom timxu wara l-”alla tat-tgergir”? Tilmentaw il-ħin kollu qieskom f'xi velja funebri? Le: iż-żgħażagħ ma jistgħux jagħmlu dan! L-”alla tat-tgemgim” huwa ingann: iġegħelek taqbad it-triq il-ħażina. Meta kollox jidher wieqaf u staġnat – kompla l-Papa Franġisku – meta nkunu mtaqqlin bil-problemi personali, meta l-uġigħ soċjali ma jsibx it-tweġibiet meħtieġa, mhux sew li nċedu l-armi. It-triq hi Ġesù: inrikkbuh fuq id-dagħjsa tagħna u naqdfu 'l barra miegħu! Hu l-Mulej! Hu jibdel il-perspettiva tal-ħajja. Il-fidi f'Ġesù twassal għal tama li tmur ' hinn, twassal għal ċertezza li ma tkun mibnija biss fuq il-ħiliet u l-kwaliatjiet tagħna, imma fuq il-Kelma t'Alla, fuq l-istedina li tiġi minnu. Mingħajr ħafna kalkoli u mingħajr taħbil il-moħħ biex tivverifikaw jekk ir-realtà ta' madwarkom taqbilx maċ-ċertezzi tagħkom. Oħorġu 'l barra. Noħorġu minna nfusna, mid-dinja żgħira personali u ninfetħu għal Alla, biex b'hekk ninfetħu wkoll għal ħutna. Meta ninfetħu għal Alla ninfetħu wkoll għall-oħrajn! Ninfetħu għal Alla jfisser li ninfetħu għall-proxxmu! Nagħmlu pass aktar il-bogħod: passi żgħar imma nagħmluhom. Passi żgħar li joħorġukom minnkom infuskom u jressqukom lejn Alla u lejn l-oħrajn, jiftħulkom qlubkom għall-fraternità, għall-ħbiberija, għas-solidarjetà. Fl-aħħar il-Papa tkellem dwar it-tielet punt: Itfgħu x-xbieki għas-sajda (vers 4). Għeżież żgħażagħ ta' Sardinja, it-tielet ħaġa li nixtieq ngħidilkom, u b'hekk inwieġeb għaż-żewġ mistoqsijiet l-oħra hi, li anki intom imsejħin biex issiru sajjieda tal-bnedmin. Toqgħdux taħsbuha biex ħajjitkom tgħixuha bħala xhieda ferħanin tal-Evanġelju, speċjalment fost dawk ta' mparkom. Il-Papa hawnhekk irrakkonta esperjenza personali u qal: ilbieraħ għalaqt 60 sena mill-jum li fih smajt il-leħen ta' Ġesù f'qalbi. Imma dan, osserva l-Papa bi tbissima waqt li kien qed jirċievi applaws, qed ngħidu mhux biex tagħmluli kejk hawnhekk, le: mhux qed ngħidu għalhekk. Imma hija tifkira: 60 sena minn dak il-jum. Ma ninsieh qatt. Il-Mulej kien gagħalni nħoss bil-qawwa li riedni ngħaddi minn dit-triq. Kelli 17-il sena. Għaddew ftit tas-snin qabel ma din id-deċiżjoni, din l-istedina saret definittiva u konkreta. Wara għaddew snin oħra b'xi suċċessi, bil-ferħ imma wkoll tant snin ta' fallimenti, fraġilità, dnubiet... 60 sena fit-triq tal-Mulej, warajh, ħdejh, dejjem miegħu! Ngħidilkom dan biss: ma ddispjaċinix! Ma ddispjaċinix! Imma għaliex? Għax jien inħossni bħal Tarzan u għandi l-forza biex nimxi 'l quddiem? Le.. ma ddispjaċinix għax dejjem, anki fil-waqtiet l-aktar mudlama, fil-mumenti tad-dnub, fil-mumenti tal-fraġiltà, fil-mumenti tal-falliment, ħarist lejn Ġesù u fdajt fih, u hu ma ħallinix waħdi.
Afdaw f'Ġesù: hu dejjem
pass qabilna, jimxi magħna! Imma isimgħu: Hu qatt ma jqarraq. Hu
fidil, kumpanija fidila. Aħsbu ftit. Din hi t-testimonjanza
tiegħi. Jien kuntent b'das-60 sena mal-Mulej. Imma ħaġ'oħra: imxu
'l quddiem. Artkom tat ħafna xhieda ta' dan, anki riċenti: il-Beati Antonia Messina, Gabriella Sagheddu, Giusppina Nicoli, is-Servi t'Alla Edvige Carboni, Simonetta Tronci u Don Antonio Loi. Dawn huma bnedmin komuni, li minflok qagħdu jilmentaw, tefgħu x-xbiek għas-sajda. Imitaw l-eżempju tagħhom, afdaw fl-interċessjoni tagħhom, u kunu dejjem irġiel u nisa ta' tama! Mingħajr tgemgim! Mingħajr qtigħ il-qalb! La ddendlux gdiedem, la tixtrux il-faraġ bil-mewt, xejn minn dan! Imxu 'l quddiema ma' Ġesù! Hu qatt ma jiżbalja, hu fidil! Itolbu għalija. Il-Madonna tkun dejjem magħkom.
Rapport miġjub għall-Malti minn Joe Huber. |