Għeżież ħuti,
Ma stajtx nitlaq mill-Bolivja mingħajr ma niġi nżurkom, mingħajr ma naqsam magħkom il-fidi u t-tama li jitnisslu mill-imħabba offruta fuq is-salib. Grazzi li laqjtuni. Naf li tħejjejtu u tlabtu għalija. Nirringrazzjakom ħafna.
Fil-kliem ta’ Mons. Jesús Juárez u fix-xhieda tal-aħwa li tkellmu, stajt nifhem kif it-tbatija m’għandhiex ħila titfi t-tama li jkollha għeruqha fil-fond tal-qalb, u li l-ħajja tkompli tixxettel bil-qawwa anki f’ċirkustanzi kuntrarji.
Min hawn quddiemkom? Nistħajjilkom tistaqsu. Irrid inwieġeb għal din il-mistoqsija biċ-ċertezza ta’ ħajti, b’ċertezza li lili mmarkatni għal dejjem. Dak li hawn quddiemkom hu bniedem maħfur. Bniedem li kien u li hu salvat mill-ħafna dnubiet tiegħu. Hekk qed nippreżenta ruħi lilkom. Ftit għandi x’nagħtikom u noffrilkom, imma dak li għandi hu dak li jien inħobb, iva, irrid intihulkom, irid naqsmu magħkom: huwa Ġesù, Ġesù Kristu, il-ħniena tal-Missier.
Hu ġie biex jurina, biex juri bil-fatti l-imħabba li Alla għandu għalina. Għalik, għalik, għalik, għalija. Imħabba attiva, reali. Imħabba li turi li r-realtà ta’ niesu ħadha bis-serjetà. Imħabba li tfejjaq, taħfer, tqajjem mill-ġdid, tikkura. Imħabba li tersaq lejna u ttina lura d-dinjità. Dinjità li nistgħu nitilfuha għal ħafna raġunijiet. Imma Ġesù, f’dan hu rasu iebsa: ta ħajtu għal dan, biex itina lura l-identità mitlufa. Biex ilibbisna mill-ġdid bil-qawwa tad-dinjità tiegħu.
Qed tiġini f’moħħi esperjenza li tista’ tgħinna: Pietru u Pawlu, dixxipli ta’ Ġesù kienu huma wkoll priġunieri. Anki lilhom kienet itteħditilhom il-libertà. F’dik iċ-ċikostanza, kien hemm xi ħaġa li għenithom, xi ħaġa li ma ħallithomx jaqgħu fid-disperazzjoni, ma ħallithomx jaqgħu fid-dlam li jista’ jiġi minn xi ħaġa li ma tagħmilx sens. Kien it-talb. Kien il-fatt li jitolbu. Talb personali u komunitarju. Huma kienu jitolbu u kienu jitolbu għalihom l-oħrajn. Żewġ movimenti, żewġ azzjonijiet li flimkien jiffurmaw xibka li tirfed il-ħajja u t-tama. Iżżommna bogħod mid-disperazzjoni u timbuttana biex nibqgħu mexjin. Xibka li ssostni l-ħajja, tagħkom u tal-familjari tagħkom. (Filwaqt li ħares lejn wieħed li kien ta x-xhieda tiegħu) Int tkellimt dwar ommok. It-talb tal-ommijiet, it-talb tal-mara, it-talb tal-ulied, u tagħkom: din hi xibka li tmexxi l-ħajja ‘l quddiem.
Għax meta Ġesù jidħol fil-ħajja tal-bniedem, dan ma jistax jibqa’ priġunier tal-passat tiegħu, imma jibda’ jħares lejn il-preżent b’mod ieħor, b’tama ġdida. Bniedem jibda’ jħares lejh innifsu, lejn ir-realtà personali, b’għajnejn differenti. Ma jibqax ankrat ma dak li ġara, imma jkollu ħila jibki u jsib il-forza biex jibda mill-ġdid. U jekk f’xi waqtiet inħossu d-djieqa tal-qalb, inħossuna mhux f’sikkitna, mgħattnin, nistedinkom tħarsu lejn wiċċ Ġesù Kurċifiss. Fil-ħarsa tiegħu ilkoll kemm aħna nistgħu nsibu postna. Ilkoll nistgħu inħallu f’idejh il-ġrieħi tagħna, id-dwejjaq tagħna, anki l-iżbalji tagħna, dnubietna, tant affarijiet li aħna stajna żbaljajna fihom.
Fil-pjagi ta’ Ġesù, jsibu posthom il-pjagi tagħna. Għax aħna lkoll miġrugħin b’mod jew ieħor. U għaliex noffru l-ġrieħi tagħna lill-pjagi ta’ Ġesù? Biex jitfejqu, jinħaslu, jinbdilu, iqumu mill-ġdid. Hu miet għalikom, għalija, biex jagħtina idu u jerfgħana. Tkellmu, tkellmu mas-saċerdoti li jiġi jarawkom, tkellmu…… Tkellmu mal-aħwa li jiġu, tkellmu…. Tkellmu ma kull min jiġi biex ikellimkom dwar Ġesù. Ġesù jrid iqajjimna, dejjem.
U din iċ-ċertezza timbuttana biex naħdmu għad-dinjità tagħna. L-għeluq mhux l-istess bħall-esklużjoni – ħa tkun ċara – għax l-għeluq hu parti minn proċess biex nerġgħu nidħlu lura fis-soċjetà. Hemm ħafna elementi li jaħdmu kontrikom f’dal-post – jien nafu tajjeb dan, u int semmejt xi wħud b’mod ċar ħafna (b’riferiment għal testimonjanza oħra)- : l-iffullar żejjed, il-ġustizzja li timxi bil-mod, in-nuqqas ta’ taħriġ okkupazzjonali u ta’ programmi ta’ riabilitazzjoni, il-vjolenza, in-nuqqas ta’ faċilitajiet għall-istudenti tal-università….. dan jitlob li jkun hemm alleanza, malajr kemm jista’ jkun, bejn l-istituzzjonijiet, biex jingħataw it-tweġibiet.
Madankollu, filwaqt li qed issir il-ġlieda għal dan, ma nistgħux ngħidu li kollox hu mitluf. Hemm affarijiet li nistgħu nagħmluhom minn issa.
Hawn, fiċ-ċentru tar-riabilitazzjoni, il-konvivenza tiddependi xi ftit minnkom ukoll. It-tbatija u n-nuqqasijiet jistgħu jagħmlulkom qalbkom egoista u b’hekk jibdew il-kunflitti, imma aħna għandna wkoll il-ħila li nibdluhom f’okkażjonijiet ta’ fraternità awtentika. Għinu lil xulxin. Tibżgħux tgħinu lil xulxin. Ix-xitan ifittex il-ġlieda, ifittex ir-rivalità, il-firda, il-klikek. Taqgħux għal-logħba tiegħu! Tqagħabdu biex timxu ‘l quddiem, magħqudin.
Nixtieq ukoll nitlobkom biex twasslu t-tislijiet tiegħi lill-familjari tagħkom – uħud minnhom qiegħdin hawn. Il-preżenza u l-għajnuna tal-familja hija importanti ħafna! In-nanniet, il-missier, l-omm, l-aħwa, il-mara, l-ulied. Ifakkruna li ta’ min jgħix u jitqabad biex id-dinja tkun aħjar.
Fl-aħħar, kelma ta’ inkoraġġiment għal kull min jaħdem f’dan iċ-ċentru: lid-diriġenti, l-aġenti tal-puluzija penitenzjarja, lil kulħadd. Intom tagħtu servizz pubbliku fundamentali. Għandkom biċċa xogħol importanti f’dal proċess tad-dħul mill-ġdid fis-soċjetà. Dmirkom hu li tgħollu mhux li tumiljaw; li tinkoraġġixxu mhux li tgħakksu. Proċess li jitlob li titwarrab il-loġika tat-tajbin u l-ħżiena biex minflokha tidħol il-loġika mmirata biex tgħin lill-persuna. U din il-loġika ta’ għajnuna teħliskom minn kull tip ta’ korruzzjoni u ttejjeb il-kundizzjonijiet għal kulħadd. Għax meta ngħixu l-proċess b’dal-mod, jinnoblitana, jinkuraġġina u jerfgħana ‘l fuq ilkoll.
Qabel ma ntikom il-barka nixtieq li nitolbu fis-skiet għal ftit ħin, fis-skiet u kulħadd f’qalbu. Kulħadd jaf x’għandu jagħmel……
Jekk jogħġobkom, nitlobkom biex tibqgħu titolbu għalija għax anki jien nagħmel l-iżbalji u jeħtieġli nagħmel il-penitenza. Grazzi.
U Alla Missierna jħarsilna qlubna. U Alla Missierna li jħobbna, jtina l-qawwa tiegħu, il-paċenzja tiegħu, it-tenerezza ta’ Missier, iberikna.
Fl-isem tal-Missier, u tal-Iben u tal-Ispirtu s-Santu.
U tinsewx titolbu għalija. Grazzi!
Miġjub għall-Malti mit-Taljan minn Joe Huber