Għeżież ħuti, il-jum it-tajjeb!
L-Evanġelju tal-lum jippreżentalna r-rakkont tal-qawmien mill-mewt ta’ tfajla ta’ 12-il sena, bint wieħed mill-kapijiet tas-sinagoga, li jinxteħet f’riġlejn Ġesù u jitolbu bil-ħniena: «Binti waslet fl-aħħar; ejja qiegħed idejk fuqha ħalli tfiq u tgħix» (Mark 5, 23). F’din it-talba nħossu l-preokkupazzjoni ta’ kull missier dwar il-ħajja u l-ġid ta’ uliedu. Imma naraw fiha wkoll il-fidi kbira li dak ir-raġel kellu f’Ġesù. U meta tasal l-aħbar li t-tfajla mietet, Ġesù jgħidlu: «Tibżax, biss inti emmen!» Meta jidħol id-dar, il-Mulej ikeċċi ‘l barra lil kull min kien qed jibki u jgħajjat u jdur lejn it-tfajla mejta u jgħidilha: «Tfajla, qed ngħidlek: qum!» (vers 41). U mill-ewwel it-tfajla qamet u bdiet timxi. Hawnhekk naraw is-setgħa assoluta ta’ Ġesù fuq il-mewt, li għalih hi qiesha raqda li minnha tista’ tqum.
F’dan ir-rakkont, l-evanġelista jżid ukoll epsiodju ieħor: il-fejqan ta’ mara li kienet ilha 12-il sena tbati bit-tnixxija tad-demm. Minħabba din il-marda, li skont il-kultura ta’ żmienha kienet tagħmilha “impura”, hi kellha tevita kull kuntatt uman: miskina, kienet ikkundannata għal mewt ċivili. Din il-mara mingħajr isem, qalb il-folla li kienet miexja wara Ġesù, tgħid bejna u bejn ruħha: «Jekk jirnexxili biss immiss it-tarf tal-mantar tiegħu, infieq» (vers 28). U hekk ġara: il-ħtieġa li tkun meħlusa timbuttaha biex tażżarda u bil-fidi tagħha rnexxilha tikseb ill-fejqan mill-Mulej, kważi, biex ngħidu hekk, bil-forza. Min jemmen “imiss” lil Ġesù u minnu jikseb il-grazzja li jsalva. Hu jsalvana, islavalna l-ħajja spiritwali, isalvana minn tant problemi. Ġesù jinduna u, minn qalb il-folla, ifittex il-wiċċ ta’ dik il-mara. Hi tersaq qrib u Hu jgħidilha: «Binti, il-fidi tiegħek salvatek» (vers 34). Hu leħen il-Missier Ċelesti li jitkellem permezz ta’ Ġesù: «Binti, int m’intix misħuta, m’itnix imwarrba, int binti!» U kull darba li Ġesù jersaq lejna, meta aħna nersqu lejH bil-fidi, nisimgħu lill-Misssier jgħidilna: «Ibni, int iben tiegħi, inti binti! Int imfejjaq, int imfejqa. Jiena naħfer kollox lil kulħadd. Jien infejjaq kollox lil kulħadd”
Il-qofol ta’ dawn iż-żewġ episodji – fejqan u qawmien mill-mewt – hu wieħed: il-fidi. Il-messaġġ hu ċar u jista’ jinġabar f’mistoqsija: nemmnu li Ġesù jista’ jfejjaqna u jista’ jqajjimna mill-mewt? L-Evanġelju kollu hu miktub fid-dawl ta’ din il-fidi: Ġesù qam, rebaħ il-mewt, u minħabba dir-rebħa tiegħu anki aħna għad inqumu. Din il-fidi, li kienet ħaġa ċerta għall-ewwel Insara, tista’ tittappan u ssir inċerta sal-punt li xi wħud jitfixklu l-qawmien mar-riinkarnazzjoni. Il-Kelma t’Alla għal dan il-Ħadd tistedinna ngħixu biċ-ċertezza tal-qawmien: Ġesù hu l-Mulej, Ġesù għandu s-setgħa fuq il-ħażen u fuq il-mewt u jrid jeħodna fid-dar tal-Missier fejn issaltan il-ħajja. U hemmhekk niltaqgħu lkoll, aħna lkoll li qiegħdin fil-pjazza llum, għad niltaqgħu fid-dar tal-Missier, fil-ħajja li għad itina Ġesù.
Il-qawmien ta’ Ġesù jaħdem fl-istorja bħala prinċipju ta’ tiġdid u tama. Min hu ddisprat u għajjien għall-mewt, jekk jafda f’Ġesù u f’imħabbtu, jista’ jerġa jibda’ jgħix. Jista’ jibda ħajja ġdida, li nibdlu ħajjitna hu mod ieħor kif inqumu u nerġgħu nibdew ngħixu. Il-fidi hi l-qawwa tal-ħajja, tagħti l-milja lill-umanità tagħna; u min jemmen fi Kristu jagħraf lilu nnifsu għax inissel il-ħajja f’kull sitwazzjoni, u jġiegħel lil kulħadd, speċjalment lill-aktar dgħajfa, iħoss l-imħabba t’Alla li teħles u ssalva.
Nitolbu lill-Mulej biex bl-interċessjoni tal-Verġni Marija, jtina d-don ta’ fidi qawwija u kuraġġuża li timbuttana biex inxerrdu t-tama u l-ħajja fost ħutna.
Wara l-Angelus:
Għeżież ħuti,
Insellem lilkom ilkoll Rumani u pellegrini!
Insellem partikolarment lill-parteċipanti tal-mixja “Art waħda, familja umana waħda”. Ninkoraġġixxi l-kollaborazzjoni bejn il-persuni u l-assoċjazzjonijiet tar-reliġjonijiet differenti li jippromwovu l-ekoloġija integrali. Nirringrazzja lill-FOCSIV, Our Voices u l-organiżżazzjonijiet l-oħra u nawgura l-ħidma t-tajba liż-żgħażagħ minn pajjiżi differenti li f’dawn il-ġranet qed jiddiskutu dwar il-kura tad-dar komuni.
Qed nara ħafna bnadar tal-Bolivja! Insellem minn qalbi ‘l-grupp ta’ Bolivjani li jgħixu fl-Italja, li ġabu magħhom hawnhekk xi xbiehat tal-Madonna fost l-aktar rappreżentattivi ta’ pajjiżhom, il-Verġni ta’ Urcupiña, il-Verġni ta’ Copacabana u tant oħrajn. Il-ġimgħa li ġejja se nkun f’pajjiżkom! Jalla Ommna tas-Sema tħariskom. Insellem ukoll lill-grupp ta’ żgħażagħ minn Ibiża li qed jitħejjew biex jirċievu l-Konfermazzjoni. Nitlobkom titolbu għalija.
Insellem lill-“Guides”, jiġifieri l-“iscouts nisa”. Huma tant bravi dawn in-nisa, tant bravi u jagħmlu tant ġid! Huma “l-iscouts nisa” li jagħmlu parti mill-Konferenza Internazzjonali Kattolika. Lilhom inġeddilhom l-inkoraġġiment tiegħi. Grazzi ħafna!
Insellem lill-fidili minn Novoli, il-kor polifoniku minn Augusta, iż-żgħażagħ minn xi parroċċi tad-djoċesi ta’ Padova li rċevew is-Sagrament tal-Griżma; “in-nanniet minn Sydney”, l-assoċjazzjoni tal-anzjani emigrati fl-Awstralja li nġabru hawn flimkien man-neputijiet tagħhom; lit-tfal ta’ Chernobyl u l-familji minn Este u Ospedaletto li qed jospitawhom; liċ-ċiklisti u tal-muturi li ġew minn Cardito u d-dilettanti tal-karrozzi storiċi.
Nawgura lil kulħadd il-Ħadd it-tajjeb u l-ikla t-tajba. Jekk joħġobkom, tinsewx titolbu għalija. Arrivederci!
Miġjub għall-Malti mit-Taljan minn Joe Huber