Għżież ħuti, il-jum it-tajjeb!
Sfortunatament, ta’ kuljum, l-aħbarijiet iwasslulna ġrajjiet koroħ: omiċidji, inċidenti, katastrofi...... Fis-silta tal-Evanġelju tal-lum Ġesù jitkellem dwar żewġ fatti traġiċi li fi żmienu kienu qanqlu għaa kbir: trażżin krudili mwettaq mis-suldati Rumani ġewwa t-tempju; u t-tiġrif tat-torri ta’ Silwam, f’Ġerusalemm, li kien ħalla 18 mejta (cfr Luqa 13, 1-5).
Ġesù huwa konxju mill-mentalità superstizzjuża ta’ dawk li kienu qed jisimugħ u jaf li huma jinterpretaw dawk l-avvenimenti b’mod żbaljat. Infatti huma jemmnu li la dawk in-nies mietu b’mewta daqstant krudili, hu sinjal li Alla kkastigahom minħabba xi ħtija li kienu għamlu; qieshom qed jgħidu: “kien ħaqqhom”. U minflok, il-fatt li kienu nħelsu mid-diżgrazzja kien ifisser li huma jħossuhom “f’posthom”. “Dawk kien ħaqqhom”; jien “qiegħed tajjeb”.
Ġesù jirrifjuta għal kollox din l-interpretazzjoni, għax Alla ma jippermettix it-traġedji biex jikkastiga l-ħtijiet, u jafferma li dawk l-imsejkna vittmi ma kienu xejn anqas ħżiena minn ħaddieħor. Infatti, Ġesù jagħmel stedina biex minn dawk il-fatti ta’ niket tinstilet twissija li tolqot lil kulħadd, għax ilkoll aħna midinbin; infatti jgħid lil dawk li kellmuh: «Jekk intom ma tikkonvertux, tintilfu lkoll bl-istess mod» (v.3).
Illum ukoll, quddiem ċerti diżgrazzji u sitwazzjonijiet ta’ luttu, jista’ jkollna t-tentazzjoni li nitfgħu ir-responsabbiltà fuq il-vittmi, jew saħansitra fuq Alla stess. Imma l-Evanġelju jistedinna nirriflettu: x’idea għandna ta’ Alla? Aħna verament konvinti li Alla hu hekk, jew inkella dik hija impressjoni tagħna ta’ kif naraw ‘l Alla, xbieha tagħna? Bil-maqlub, Ġesù pjuttost isejħilna biex nibdlu qlubna, biex indawwru radikalment il-mixja ta’ ħajjitna, nabbandunaw il-kompromessi mal-ħażen – u dan nagħmluh ilkoll, il-kompromessi mal-ħażen – l-ipokrisiji – jien nemmen li lkoll kemm aħna għandna xi nitfa’ ipokrisija – biex nibdew it-triq tal-Evanġelju b’rieda soda. Imma mill-ġdid tifaċċa t-tentazzjoni li niġġustifikaw ruħna: “Imma minn xiex irridu nikkonvertu? Kollox ma’ kollox, aħna m’aħniex nies tajbin?” Kemm-il darba ħsibna hekk” “Imma kollox ma’ kollox jien tajjeb, jiena tajba – mhux hekk? – aħna ma nemmnux, u bejn wieħed u ieħor nipprattikaw (it-twemmin tagħna)” U b’hekk naħsbu li aħna ġustifikati.
Sfortunatament kull wieħed u waħda minna nixbħu ħafna lis-siġra li, għal għadd ta’ snin tat prova ta’ kemm hi sterili. Imma, b’xorti tajba għalina, Ġesù jixbaħ lil dak il-bidwi li, bil-paċenzja mingħajr limiti jirbaħ ftit aktar żmien għal dik it-tina li ma tagħtix frott: «Ħalliha sena oħra – jgħid lis-sid – (......) Naraw jekk tagħmilx frott aktar ‘il quddiem» (v.9). Sena żejda: iż-żmien tal-ministeru ta’ Kristu, iż-żmien tal-Knisja qabel ma tirritorna glorjuża, iż-żmien ta’ ħajjitna li fih hemm ċertu numru ta’ Randanijiet, li jkunu offruti lilna bħala okkażjoni biex insewwu triqtna, biex insalvaw, iż-żmien tas-Sena tal-Ġublew tal-Ħniena. Il-paċenzja ta’ Ġesù li xejn ma jegħlibha! Intom ħsibtu dwar il-paċenzja ta’ Alla? Ħsibtu wkoll dwar it-tħassib ma jaqta’ xejn tiegħu għall-midinbin, kif dawn għandhom jipprovokawna biex qatt ma nkunu sodisfatti bina nfusna? Qatt mhu tard biex nikkonvertu! Sal-aħħar mument: il-paċenzja ta’ Alla tibqa’ tistenniena. Tiftakruha dik l-istorja żgħira dwar Santa Tereża tal-Bambin Ġesù, meta kienet tkun qed titlob għal dak ir-raġel ikkundannat għall-mewt, kriminal li ma riedx jirċievi l-faraġ tal-Knisja, irrifjuta s-saċerdot. U hi titlob fil-kunvent. U meta dak ir-raġel wasal il-ħin li jkun maqtul, idur lejn is-saċerdot, jaqbad il-Kiurċifiss u jbusu. Il-paċenzja ta’ Alla! U l-istess jagħmel magħna, magħna lkoll! Kemm-il darba – aħna dan ma nafuhx, inkunu nafuh fis-sema -, kemm-il darba aħna nkunu hemm... (fil punt li naqgħu) u l-Mulej isalvana: isalvana għaliex għandu paċenzja kbira magħna. U din hi l-ħniena tiegħu. Qatt mhu tard biex nikkonvertu, imma hu urġenti, issa! Nibdew mil-lum.
Il-Verġni Marija ssostnina biex inkunu nistgħu niftħu qlubna għall-grazzja t’Alla, għall-ħniena tiegħu; u tgħinna biex qatt ma niġġudikaw lil-oħrajn, imma nħallu li d-diżgrazzji li jsiru kuljum jipprovokawna biex nagħmlu eżami tal-kuxjenza serju u nibdlu triqtna.
Wara l-Angelus:
Għeżież ħuti,
It-talb tiegħi, u tagħkom ukoll, għandu dejjem quddiemu d-dramm tar-refuġjati li jaħarbu minn gwerrer u sitwazzjonijiet inumani oħra. Il-Greċja, b’mod partikolari, u pajjiżi oħra li jinsabu fuq il-fruntieri qed ituhom għajnuna ġeneruża li teħtieġ ukoll il-kollaborazzjoni tan-nazzjonijiet kollha. Tweġiba korali tista’ tkun effikaċi biex il-piżijiet jinqasmu bil-fier. Għaldaaqstant hemm bżonn li b’deċiżjoni kbira u mingħajr ebda riżervi, nimmiraw li jkun hemm negozjati. Fl-istess ħin, ilqajt bit-tama l-aħbar li fis-Sirja waqaf il-ġlied, u nistieden lil kulħadd jitlob biex dan ix-xaqq dawl ikun ta’ serħan għall-popolazzjoni li qed tbati, u taslilhom l-għajununa umanitarja, minbarra li tiftaħ it-triq tad-djalogu u l-paċi tant mixtieqa.
Irrid naċċerta lill-poplu tal-gżejjer Fiji, li ntlaqtu miċ-ċiklun qerriedi, li jien qribhom. Nitlob għall-vittmi u għal kull min hu impenjat biex jagħti l-għajnuna.
Insellem minn qalbi lilkom pellegrini minn Ruma, mill-Italja u minn pajjiżi oħra.
Insellem lill-fidili li ġejjin minn Danzika, l-indiġeni mill-Bijafra, l-istudenti minn Zaragozza, Huelva, Córdoba u Zafra, iż-żgħażagħ minn Formentera u lill-fidili minn Jaén.
Insellem lill gruppi tal-Pollakki li joqgħodu l-Italja; lill-fidili minn Cascia, Desenzano del Garda, Vicenza, Castiglione d’Adda u Rocca di Neto; kif ukoll lil għadd kbir ta’ żgħażagħ tal-kamp ta’ San Gabriele dell’Addolorata mmexxijin mill-patrijiet Passjonisti; lill-adoloxxenti tal-Oratorji ta’ Rho, Cornaredo u Pero, u lil dawk li ġejjin minn Buccinasco; u lill-iskola tas-Sorijiet “Dimesse Figlie di Maria Immacolata” minn Padova.
Insellem lill-grupp li ġie hawn fl-okkażjoni tal-“Ġurnata tal-Mard Rari”, b’talba speċjali u inkoraġġiment lill-assoċjazzjonijiet tagħkom tas-sokkors.
Nawgura lil kulħadd il-Ħadd it-tajjeb. Tinsewx titolbu għalija. L-ikla t-tajba u arrivederci!
Miġjub għall-Malti mit-Taljan minn Joe Huber