IL-PAPA FRANĠISKU
ANGELUS
Pjazza San Pietru
Il-Ħadd 27 ta' Ottubru, 2019
Għeżież ħuti, il-jum it-tajjeb!
Il-Quddiesa li kienet iċċelebrata dalgħodu ġo San Pietru temmet l-Assemblea Speċjali tas-Sinodu tal-Isqfijiet għar-Reġjun Panamażoniku. L-ewwel qari meħud mill-Ktieb ta' Bik Sirak fakkarna l-punt tat-tluq ta' dil-mixja: għaliex "Alla jisma' t-talba
tal-magħkus" (Sir. 35,21.16). L-għajta tal-foqra, flimkien ma' dik tal-art, waslet
għandna mill-Amażonja. Wara dawn it-tliet ġimgħat ma nistgħux nagħmlu tabirruħna li ma smajnihiex. Leħen il-foqra, flimkien ma' dak ta' tant oħrajn
kemm minn ġewwa kif ukoll minn barra
l-Assemblea Sinodali -Ragħajja, żgħażagħ,
xjenzjati - jixprunawna biex ma nibqgħux indifferenti. Spiss smajna l-frażi "aktar tard se jkun tard wisq": din il-frażi ma tistax tibqa' biss 'slogan'.
X'kien is-Sinodu?
Kien, kif tgħid il-kelma, mixja flimkien, ikkunslati mill-kuraġġ
u l-faraġ li jiġu
mill-Mulej. Imxejna nħarsu f'għajnejn xulxin u nisimgħu lil xulxin bis-sinċerità, bla ma ħbejna d-diffikultajiet, ġarrabna s-sbuħija li nimxu 'l quddiem flimkien magħqudin, biex inservu. F'dan jinkoraġġina l-Appostlu
Pawlu fit-tieni qari tal-lum: f'waqt
drammatiku għalih,
meta jaf li "wasal biex jingħata bħala offerta - jiġifieri li jkun ġustizzjat - u li qorob il-waqt li jħalli din l-art:
(cfr 2 Tim 4,6) f'dak il-waqt, jikteb: "Imma l-Mulej waqaf
miegħi u tani l-qawwa biex bis-saħħa tiegħi l-kelma tixxandar sal-aħħar u l-ġnus
kollha jisimgħuha"
(v. 17). Din hi l-aħħar
xewqa ta' Pawlu: mhux xi ħaġa għalih jew għal xi ħadd minn tiegħu, imma għall-Evanġelju, sabiex ikun imxandar
lill-ġnus kollha. Dan jiġi l-ewwel u jiswa aktar
minn kollox. Kull wieħed u waħda minna staqsa lilu nnifsu kemm-il darba, x'jista'
jagħmel tajjeb għal ħajtu: illum hu l-waqt it-tajjeb; nistaqsu lilna nfusna: "Jiena x'nista' nagħmel ta' fejda għall-Evanġelju?"
Dan staqsejnih lilna nfusna waqt
is-Sinodu, bix-xewqa li niftħu toroq ġodda għax-xandir tal-Evanġelju. Huwa dak li jingħex
biss li jista' jixxandar. U biex ngħixu b'Ġesù, biex ngħixu bl-Evanġelju jeħtieġ noħorġu
minna nfusna. B'hekk inħossuna xprunati biex naqdfu 'l barra, biex inħallu
warajna x-xtut komdi tal-portijiet żguri tagħna ħalli mmoru fl-ibħra fondi: mhux fl-ilmijiet imdardra tal-ideoloġiji, imma fil-baħar miftuħ li fih l-Ispirtu s-Santu jistedinna nitfgħu x'xbiek tagħna.
Għall-mixja li jmiss, ninvokaw lill-Verġni Marija, meqjuma u maħbuba bħala Reġina tal-Amażonja. Hi ma kisbitx dan
(it-titlu) bis-seduzzjoni imma "billi twaħħdet mal-kultura":
bil-kuraġġ umli tal-omm, saret il-protettriċi taċ-ċkejknin
tagħha, id-difiża
tal-magħkusin.
Dejjem toqrob lejn il-kultura tal-popli. M'hemmx kultura 'standard', m'hemmx kultura pura, li ssaffi lill-oħrajn; hemm l-Evanġelju, pur, li jinkultura. Lilha li fid-dar fqajra ta' Nażaret ħadet ħsieb Ġesù, nafdawlha l-ulied l-aktar foqra
u d-dar komuni tagħna.
Wara
l-Angelus
Għeżież ħuti,
Indur bi ħsieb speċjali
lejn il-poplu għażiż tal-Libanu,
partikolarment iż-żgħażagħ,
li dawn l-aħħar jiem
għollew leħinhom quddiem l-isfidi u l-problemi soċjali, morali u ekonomiċi ta' pajjiżhom. Inħeġġeġ lil kulħadd biex ifittex soluzzjonijiet ġusti fit-triq tad-djalogu u nitlob lill-Verġni Marija, Reġina tal-Libanu, sabiex bis-sapport tal-komunità internazzjonali, dak il-pajjiż ikompli jkun spazju
ta' konvivenza paċifika
u rispett tad-dinjità u l-libertà ta' kull persuna biex ikun
ta' fejda għar-reġjun
tal-Lvant Nofsani kollu, li qed isofri
ħafna.
Insellem minn qalbi lilkom ilkoll pellegrini
Taljani u minn pajjiżi differenti, partikolarment lil dawk ġejjin minn Sao Paolo fil-Brażil u
mill-Polonja, kif ukoll lill-grupp taċ-“Céntro
Académico Romano Fundación”, minn
Spanja.
Insellem lill-Appostli (nisa)
tal-Qalb Imqaddsa li qed ifakkru ċ-ċentinarju tat-twaqqif tagħhom; lill-komunità Siro-Malabrese mid-djoċesi ta'
Patti; lis-seminaristi mid-djoċesi
ta' Reggio Emilia-Guastalla, li dalgħodu
servew il-quddiesa fil-Bażilika. U qed nara wkoll
li hawn dawk li se jagħmlu l-Griżma minn Galzignano: insellmilkom!
Dan huwa l-aħħar Ħadd ta' Ottubru, ix-xahar missjunarju, li dis-sena kellu l-karatteristika ta' xahar straordinarju u huwa wkoll ix-xahar
tar-Rużarju.
Inġedded l-istedina
biex jingħad ir-Rużarju għall-missjoni
tal-Knisja tal-lum, partikolarment għall-missjunarji
rġiel u nisa li llum jitlaqgħu ma' diffikultajiet akbar. U fl-istess waqt inkomplu nitolbu
r-Rużarju għall-paċi. L-Evanġelju u
l-paċi jimxu id f'id.
Nawgura lil kulħadd il-Ħadd it-tajjeb. Jekk jogħġobkom tinsewx titolbu għalija. L-ikla t-tajba u arrivederci!
Miġjub
għall-Malti mit-Taljan
minn Joe Huber