Għeżież ħuti, il-jum it-tajjeb!
Illum il-liturġija tfakkar ix-xhieda ta’ San Stiefnu, il-Magħżul mill-Appostli flimkien ma’ sitta oħra, għad-djakonija tal-karità, jiġifieri biex jgħin lill-foqra, l-orfni, ir-romol, fil-komunità ta’ Ġerusalemm. Hu jsir il-protomartri tal-Knisja. Bil-martirju tiegħu, Stiefnu jagħti ġieħ lill-miġja fid-dinja tar-Re tar-rejiet, jagħti xhieda tiegħU u joffri bħala rigal ħajtu stess, kif kien jagħmel fil-qadi ma’ min kien l-aktar fil-bżonn. B’hekk jurina kif għandna ngħixu fil-milja tiegħu l-misteru tal-Milied.
L-Evanġelju ta’ din il-festa jtina parti mid-diskors ta’ Ġesù lid-dixxipli fil-mument li Hu jibgħathom għall-missjoni. Fost kollox jgħid: «Kulħadd ikun jobgħodkom minħabba f’ismi. Imma min jippersevera sal-aħħar ikollu s-salvazzjoni» (Mattew 10,22). Dan il-kliem tal-Mulej ma jaqlibx ta’ taħt fuq iċ-ċelebrazzjoni tal-Milied, imma jneżżugħa minn dik il-kisja biz-zokkor li mhix tagħha. Jgħinuna nifhmu li fil-provi li naċċettaw minħabba l-fidi, il-vjolenza tkun megħluba mill-imħabba, il-mewt mill-ħajja. U biex verament nilqgħu lil Ġesù fl-eżistenza tagħna u ntawlu l-ferħ tal-Lejl Qaddis, it-triq hi propju dik li jurina dan l-Evanġelju, jiġifieri li nagħtu xhieda ta’ Ġesù bl-umiltà, bis-servizz fis-satra, mingħajr biża’ li mmorru kontra l-kurrent jew li nħallsu prezz personali. U jekk mhux kulħadd hu msejjaħ, bħal San Stiefnu, biex ixerred demmu, però kull Nisrani hu msejjaħ biex ikun koerenti mal-fidi li jistqarr. U l-koerenza Nisranija hi grazzja li għandna nitolbuha lil-Mulej. Inkunu koerenti, ngħixu ta’ Nsara u mhux ngħidu: “jien Nisrani” u ngħixu ta’ pagani. Il-koerenza hija grazzja li għandna nitolbu għaliha llum.
Ċertament, li nsegwu l-Evanġelju mhix ħaġa faċli, imma sabiħa ħafna, u min jimxi f’dit-triq bil-fedeltà u l-kuraġġ jirċievi r-rigal imwiegħed mill-Mulej lill-bnedmin kollha ta’ rieda tajba. Kif kantaw l-Anġli fil-jum tal-Milied: Paċi! Paċi!”. Din il-paċi mogħtija min Alla għandha l-qawwa li tikkalma l-kuxjenza ta’ dawk li, minħabba l-provi tal-ħajja, jagħrfu jilqgħu l-Kelma t’Alla u jimpenjaw ruħhom biex josservawha bil-perseveranza sal-aħħar (cfr Mattew 10,22).
Illum, ħuti, nitolbu b’mod partikolari għal dawk li huma diskriminati, persegwitati u maqtulin minħabba x-xhieda tagħhom għal Kristu. Irrid ngħid lil kull wieħed u waħda minnhom: jekk intom iġġorru dan is-salib bl-imħabba, intom dħaltu fil-misteru tal-Milied, intom tinsabu fil-qalb ta’ Kristu u tal-Knisja.
Nitolbu wkoll biex bis-saħħa tas-sagrifiċċju ta’ dawn il-martri tal-lum – huma bosta u bosta! – f’kull parti tad-dinja jissaħħaħ l-impenn biex jingħata għarfien u tkun żgurata l-libertà reliġjuża li hi dritt inaljenabbli ta’ kull persuna umana.
Għeżież ħuti, nawguralkom li tgħaddu l-festi tal-Milied fis-serenità. San Stiefnu, djaknu u l-ewwel martri, jsostnina fil-mixja tagħna ta’ kuljum, li nittamaw li fl-aħħar għad ninkurunawha fost il-ġemgħa ferrieħa tal-qaddisin fil-ġenna.
Wara l-Angelus:
Għeżież ħuti,
Insellmilkom bil-ferħ tal-Milied u nġedded l-awgurju ta’ paċi: paċi fil-familji, paċi fil-komunitajiet parrokkjali u reliġjużi, paċi fil-movimenti u l-assoċjazzjonijiet. Insellem lill dawk kollha li jisimhom Stiefnu jew Stefania: awguri!
Tul dawn il-ġimgħat irċevejt ħafna messaġġi ta’ awguri minn Ruma u minn postijiet oħra. Peress li mhux possibbli nwieġeb lil kulħadd individwalment, illum irrid nesprimi s-sentimenti ta’ radd il-ħajr, speċjalment għar-rigal tat-talb. Grazzi minn qalbi! Il-Mulej iroddilkom lura bil-ġenerożità tiegħu!
U tinsewx, koerenza Nisranija: jiġifieri, naħsbu, nħossu u ngħixu ta’ Nsara u mhux naħsbu ta’ Nsara u ngħixu ta’ pagani: dan le! Illum nitolbu lil Stiefnu l-grazzja tal-koerenza Nisranija. U, jekk jogħġobkom komplu itolbu għalija, tinsewx!
Il-festa t-tajba u l-pranzu t-tajjeb! Arrivederci!
Miġjub għall-Malti mit-Taljan minn Joe Huber