Għeżież ħuti, il-jum it-tajjeb!
Illum jitemm il-qari tas-sitt kapitlu tal-Evanġelju skont San Ġwann, bid-diskors dwar “Il-Ħobż tal-Ħajja” li Ġesù għamel l-għada li kien wettaq il-miraklu tat-tkattir tal-ħobż u l-ħut. Fi tmiem dak id-diskors, l-entużjażmu kbir tal-jum ta’ qabel kien intefa’ għax Ġesù qal li hu l-Ħobż li niżel mis-sema, u li kellu jagħti ġismu bħala ikel u demmu bħala xorb, biex b’mod ċar ħabbar dak li kellu jiġri minn ħajtu. Dak il-kliem nissel delużjoni fin-nies għax iġġudikawh li ma kienx dehen tal-Messija, għax ma kienx kliem “rebbieħ”. Xi wħud minnhom kienu jħarsu lejn Ġesù bħala l-Messija li kellu jitkellem u jaġixxi b’mod li l-missjoni tiegħu jkollha suċċess, immedjat. Imma propju fuq dan kienu żbaljati: fuq il-mod kif kienu jifhmu l-missjoni tal-Messija! Saħansitra l-istess dixxipli ma jirnexxilhomx jaċċettaw dak il-lingwaġġ li jħassbek tal-Imgħallem. U s-silta tal-lum titkellem dwar l-iskumdità tagħhom: «Dil-kelma tqila! – bdew jgħidu – Min jista’ jismagħha?ì (Ġwanni 6, 60).
Fis-sew huma kienu fehmuh tajjeb id-diskors ta’ Ġesù. Tant tajjeb li ma ridux jisimgħuh għax kien kliem li daħħal il-mentalità tagħhom fi kriżi. Kliem Ġesù dejjem idaħħalna fi kriżi, per eżempju quiddiem l-ispirtu tad-dinja, quddiem il-mondanità. Imma Ġesù jffri l-muftiħ biex aħna ngħelbu d-diffikultajiet; muftiħ magħmul minn tliet elementi. L-ewwel: l-oriġini divina tiegħu: Hu nżel mis-sema u «se jerġa’ jitla’ fejn kien qabel» (v. 62). It-tieni: kliemu jista’ jinftiehem biss bis-saħħa tal-ħidma tal-Ispirtu s-Santu, dak li «jagħti l-ħajja» (v, 63) hu propju l-Ispirtu s-Santu li jgħinna nifhmu tajjeb lil Ġesù. It-tielet: ir-raġuni vera li kliemu ma jinftiehemx hi n-nuqqas ta’ fidi: «Fostkom hemm min ma jemminx« (v. 64), jgħid Ġesù. Infatti, jgħid l-Evanġelju, minn dak il-ħin «ħafna mid-dixxipli tiegħu telquh» (v 66). Quddiem dawk li abbandunawh Ġesù ma jraħħasx, ma jrattabx kliemu, anzi jġiegħel lil min fadal jagħmel għażla preċiża: jew miegħu jew mifrudin minnu u lit-tnax jgħidilhom: «Tridux titilqu intom ukoll?»
F’dal-ħin Pietru jagħmel l-istqarrija tal-fidi tiegħu f’isem l-Appostli l-oħra: «għand min immorru? Int għandek il-kliem tal-ħajja ta’ dejjem» (v. 68). Ma jgħidx “fejn immorru?”, imma “għand min immorru?” Il-problema prinċipali mhix li wieħed jitlaq u jabbanduna dak li jkun qed jagħmel, imma għand min imur. Minn dik il-mistoqsija ta’ Pietru aħna nifhmu li l-fedeltà lejn Alla hi kwistjoni ta’ fedeltà lejn persuna li magħha nintrabtu biex nimxu magħha fl-istess triq. Din il-persuna hi Ġesù. Dak kollu li għandna f’did-dinja qatt mhu xe jxebba’ l-ġuħ tagħna għal dak li hu infinit. Għandna bżonn lil Ġesù, noqgħodu miegħu, nitrejqu mill-medja tiegħu, bil-kliem tal-ħajja ta’ dejjem tiegħu!
Li nemmnu f’Ġesù jfisser li Hu jsir iċ-ċentru, is-sens ta’ ħajjitna. Kristu mhux xi element aċċessorju: Huwa “l-ħobż ħaj”, l-ikel indispensabbli. Ir-rabta miegħu f’għaqda vera ta’ fidi u mħabba, ma tfissirx li nkunu marbutin bil-ktajjen, imma li nkunu profondament ħielsa, dejjem f’mixja. Kull wieħed u waħda minnha nistgħu nistaqsu lilna nfusna: Min hu Ġesù għalija? Hu isem, idea, persunaġġ storiku biss? Jew hu verament dik il-persuna li tħobbni u li tat ħajjitha għalija u timxi miegħi? Min hu Ġesù għalik? Int qiegħed ma’ Ġesù? Tipprova tkun tafu permezz tal-kelma tiegħu? Tarqa silta mill-Evanġelju kuljum biex tkun taf lil Ġesù? Iżżomm il-ktieb tal-Evanġelju fil-but, fil-basket, biex tkun tista’ taqrah kullimkien? Għax aktar ma nkunu miegħu aktar tikber fina l-ħajra biex nibqgħu miegħu. Issa nitlobkom bil-kortesija, biex nagħmlu waqt ta’ skiet u kulħadd, f’qalbu, jistaqsi lilu nnifsu: «Min hu Ġesù għalija?» Fis-skiet kulħadd iwieġeb f’qalbu.
Il-Verġni Marija tgħinna “mmorru” dejjem għand Ġesù biex inħossu l-libertà li Hu joffrilna, u li tgħinna nnaddfu l-għażliet tagħna mill-qxur mondani u mill-biżgħat.
APPELL
Bi tħassib qed insegwi l-kunflitt li għaddej fil-lvant tal-Ukranja, li reġa’ tkebbes dawn l-aħħar ġimgħat. Intenni l-appell tiegħi biex l-impenji miftehema jkunu rispettati ħalli tasal il-paċi biex bl-għajnuna tal-organiżżazzjonijiet u tal-persuni ta’ rieda tajba tingħata tweġiba għall-emerġenza umanitarja tal-Pajjiż. Il-Mulej jagħti l-paċi lill-Ukranja li għada se tiċċelebra l-festa nazzjonali. Jalla tidħol għalikom il-Verġni Marija!
Wara l-Angelus
Għeżież ħuti,
Insellem minn qalbi lill-pellegrini kollha minn Ruma u mill-Pajjiżi l-oħra, partikolarment lis-seminaristi l-ġodda tal-Kulleġġ Pontifiċju tal-Amerika ta’ Fuq, li qiegħdin Ruma biex jibdew l-istudji tat-teoloġija.
Insellem lill-grupp sportiv minn San Giorgio sul Legnano, lill-fidili minn Luzzana u minn Chioggia; lill-adoloxxenti u liż-żgħażagħ mid-djoċesi ta’ Verona.
U matul dil-ġimgħa tinsewx tieqfu kuljum għal xi waqtiet biex tagħmlu l-mistoqsija: «Min hu Ġesù għalija?» u kulħadd iwieġeb f’qalbu.
Nawgura lil kulħadd il-jum it-tajjeb. U, jekk jogħġobkom, tinsewx titolbu għalija! Il-pranzu t-tajjeb u arrivederci!
Miġjub għall-Malti mit-Taljan minn Joe Huber