ANGELUS
Pjazza San Pietru
Il-Ħadd 23 ta' Frar 2014
Għeżież ħuti, il-jum it-tajjeb!
Fit-tieni qari ta' dan il-Ħadd, San Pawl jafferma: Għalhekk ħadd ma għandu jiftaħar bil-bnedmin; għax kollox hu tagħkom, sew jekk Pawlu, sew jekk Apollo, sew jekk Kefa, kollox hu tagħkom, u intom ta' Kristu, u Kristu ta' Alla (1 Kor, 3, 23). Għaliex jgħid hekk l-Appostlu? Għax il-problema li għandu quddiemu hi waħda ta' firdiet fil-komunità ta' Korintu, fejn kienu ffurmaw ruħhom gruppi li kienu jistqarru lil predikaturi diversi bħala kapijiet tagħhom. Kienu jgħidu: jiena ta' Apollo, jiena ta' Pawlu, jiena ta' Kefa (1,12). San Pawl jispjega li dan hu żbaljat għax il-komunità ma kinitx tal-Appostli imma huma l-Appostli li jappartjenu lill-komunità; imma l-komunità, kollha kemm hi, hija ta' Kristu!
Minn din l-appartenenza jiġi, li fil-komunitajiet insara – djoċesijiet, parroċċi, assoċjazzjonijiet, movimenti – id-differenzi ma jistgħux jikkuntradixxu l-fatt li lkoll, bis-saħħa tal-Magħmudija, għandna l-istess dinjità: ilkoll, f'Ġesù Kristu, aħna ulied Alla. U din hi d-dinjità tagħna: f'Ġesù Kristu aħna lkoll ulied Alla! Dawk li rċevew xi ministeru ta' tmexxija, ta' predikazzjoni, tal-amministrazzjoni tas-Sagramenti, ma jistgħux iqisu lilhom infushom propjetarji ta' xi poteri speċjali, imma għandhom iqegħedu lilhom infushom għas-servizz tal-komunità, u jgħinuha timxi bil-ferh it-triq tal-qdusija.
Il-Knisja llum qed tafda din ix-xhieda ta' stil ta' ħajja pastorali lill-Kardinali l-ġodda, li magħhom iċċelebrajt il-quddiesa dalgħodu. Nistgħu insellmu lill-Kardnali l-ġodda b'applaws. Insellmulhom kollha! Il-Konċistorju tal-bieraħ u ċ-Ċelebrazzjoni Ewkaristika tallum kienu okkażjoni prezzjuża biex inħossu l-kattoliċità, l-unversalità tal-Knisja li hi rappreżentata tajjeb mill-oriġini vajrata ta' mnejn ġejjin il-membri tal-Kulleġġ tal-Kardinali, miġburin f'kollaborazzjoni sħiħa mas-Suċċessur ta' Pietru. U l-Mulej itina l-grazzja li naħdmu għall-għaqda tal-Knisja, li nibnu din l-unità, għax l-għaqda hija aktar importanti mill-kwistjonijiet! L-għaqda tal-Knisja hi għaqda ta' Kristu, il-konflitti huma problemi li mhux dejjem huma ta' Kristu.
Jalla l-mumenti liturġiċi u ta' festa li kellna l-opportunità li ngħixu tul dwn l-aħħar jumejn, isaħħu fina l-fidi, l-imħabba lejn Kristu u lejn il-Knisja tiegħu! Nistedinkom ukoll biex tgħinu lil dawn ir-Rgħajja u tassistuhom bit-talb, sabiex huma jmexxu dejjem biż-żelu l-poplu afdat f''idejhom billi juru t-tenerezza u l-imħabba tal-Mulej. Imma kemm għandu bżonn ta' talb Isqof, Kardinal, Papa biex ikun jista' jgħin lill-Poplu t'Alla jimxi 'l quddiem? Qed ngħid “jgħin”, jiġifieri jaqdi lill-Poplu t'Alla, għax il-vokazzjoni tal-Isqof, tal-Kardinal u tal-Papa hi propju din: li jkun qaddej, iservi f'isem Kristu. Itolbu għalina biex inkunu qaddejja tajbin: qaddejja talbin mhux padruni tajbin! Ilkoll flimkien, Isqfijiet, presbiteri, persuni konsagrati u fidili lajċi jeħtiġilna noffru xhieda ta' Knisja fidila lejn Kristu, imqanqlin mix-xewqa li naqdu lill-aħwa u lesti biex, b'kuraġġ profetiku, nersqu lejn dak mistenni u l-ħtiġijiet spiritwali tal-irġiel u tan-nisa ta' żmienna. Il-Madonna takkumpanjana u tipproteġina f'din il-mixja.
Wara l-Angelus
Insellem lill-pellegrini kollha preżenti, partikolarment lil dawk li
ġew għall-okkażjoni tal-Konċistorju biex jakkumpanjaw lill-Kardinali
l-ġodda u nirringrazzja ħafna lil dawk il-pajjiżi li kienu preżenti
għal dan l-avveniment permezz ta' delegazzjonijiet uffiċjali.
Insellem lil-istudenti ta' Tolouse u l-komunità tal-Venezwelani li joqgħodu fl-Italja.
Insellem lill-fidili ta' Caltanissetta, Reggio Calabria, Sortino, Altamura, Ruvo u Lido degli Estensi; liż-żgħażagħ minn Reggio Emilia u lil dawk tad-djoċesi ta' Lodi; l-assoċjazzjoni ċiklistika ta' Agrigento u l-volontarji tal-Protezzjoni Ċivili ta' Bassa Padovana.
Ilkoll nawguralkom il-Ħadd it-tajjeb u l-ikla t-tajba. Arrivederci!
Miġjub għall-Malti minn Joe Huber.