Għeżież ħuti, il-jum it-tajjeb!
L-Evanġelju tal-lum (Mt 15,21-28), jippreżentalna eżempju singolari tal-fidi fil-laqgħa ta’ Ġesù mal-mara Kagħananija, li għal-Lhud kienet persuna barranija. Ix-xena sseħħ fil-ħin li Hu kien miexi lejn l-ibliet ta’ Tir u Sidon, lejn il-majjistral tal-Galileja: Huwa hawn li l-mara b’ħerqa kbira titlob lil Ġesù biex ifejjilha ‘l-bintha li – jgħidina l-Evanġelju - «hi mħabbta ħafna mix-xitan» (v. 22). Għall-ewwel, il-Mulej donnu ma jismax din il-karba ta’ tbatija, tant illi kienu d-dixxipli li qabżu għaliha. Iżda, id-distakk li donnu jidher f’Ġesù ma jaqtax qalb din l-omm, li tibqa’ tinsisti fit-talb ħerqan tagħha.
Il-qawwa interjuri ta’ dil-mara, li biha rnexxilha tegħleb kull ostaklu, tinsab fl-imħabba materna tagħha u fil-fiduċja li Ġesù seta’ jtiha dak li kienet qed titolbu. U dan iġegħelni naħseb dwar il-qawwa li għandhom in-nisa. Bil-qawwa tagħhom għandhom ħila jiksbu ħwejjeġ kbar. Nafu b’ħafna minn dawn! Nistgħu ngħidu li hija l-imħabba li tmexxi l-fidi u l-fidi, min-naħa tagħha, ssir il-premju tal-imħabba.
L-imħabba ta’ qsim il-qalb lejn bintha ġġegħelha «tgħajjat»: “Ħenn għalija Mulej, Iben David!”» (v. 22). U l-fidi perseveranti tagħha f’Ġesù tgħinha biex ma taqtax qalbha lanqas quddiem l-ewwel rifjut tiegħu; għalhekk il-mara «inxteħtet quddiemu u bdiet tgħidlu: “Mulej, għinni!”» (v.25).
Fl-aħħar, quddiem dik il-perseveranza kollha, Ġesù jimtela bl-ammirazzjoni, kważi mistħaġeb bil-fidi ta’ dil-mara pagana. Għaldaqstant jaċċetta u jgħidilha: «Mara, il-fidi tiegħek hija kbira! Isir dak li tixtieq”. U minn dak il-ħin, bintha fieqet» (v. 28). Ġesù juri lil dil-mara bħala eżempju ta fidi samma. L-insistenza tagħha hi u tinvoka l-azzjoni ta’ Ġesù hija stimolu għalina biex ma naqtgħux qalbna, biex ma niddisprawx meta nkunu mgħakusin mill-provi iebsin tal-ħajja. Il-Mulej ma jdawwarx wiċċu n-naħa l-oħra quddiem il-ħtiġijiet tagħna, u jekk xi drabi, donnu jidher insensibbli għal għajnuna li nkunu qed nitolbuh, ikun qed jagħmlu biex jgħaddina mill-prova u biex iseddaq il-fidi tagħna. Aħna għandna nkomplu ngħajjtu bħal dil-mara: “Mulej, għinni! Muelj, għinni!” Hekk, bil-perseveranza u bil-kuraġġ. U dan hu l-kuraġġ meħtieġ fit-talb.
Dan l-episodju evanġeliku jgħinna nifhmu li lkoll kemm aħna jeħtieġ li nikbru fil-fidi u nsaħħu l-fiduċja tagħna f’Ġesù. Hu jista’ jgħinna nerġgħu nsibu t-triq meta nkunu tlifna l-boxxla tal-mixja tagħna; meta t-triq tidher li mhix aktar lixxa imma mħattba u wieqfa; meta nsibuha iebsa nibqgħu fidili lejn l-impenji tagħna. Importanti li nżoqqu l-fidi tagħna kuljum bis-smigħ attent tal-Kelma t’Alla, biċ-ċelebrazzjoni tas-Sagramenti, bit-talb personali, bħala “għajta” li titla’ lejh – “Mulej, għinni!” -, u b’atteġġjamenti konkreti ta’ karità lejn il-proxxmu.
Nintelqu f’idejn l-Ispirtu s-Santu sabiex Hu jgħinna nipperseveraw fil-fidi. L-Ispirtu jnissel il-kuraġġ fil-qlub ta’ dawk li jemmnu; lill-ħajja tagħna u lix-xhieda Nisranija tagħna jtiha l-qawwa tal-konvinzjoni u l-persważjoni; jinkuraġġina biex ngħelbu n’nuqqas ta’ twemmin f’Alla u l-indifferenza lejn ħutna.
Jalla l-Verġni Marija tagħmilna dejjem aktar konxji dwar kemm neħtieġu lill-Mulej u l-Ispirtu tiegħu; tirregalalna fidi qawwija, mimlija mħabba, u mħabba li taf issir supplika, supplika ta’ kuraġġ lil Alla.
Wara l-Angelus
Għeżież ħuti,
Fi qlubna nġorru n-niket minħabba l-atti terroristiċi li f’dawn l-aħħar jiem ħallew għadd ta’ vittmi fil-Burkina Faso, fi Spanja u fil-Fillandja. Nitolbu għall-mejtin kollha, għall-miġrugħa u għall-familji tagħhom; u nitolbu bil-ħerqa lill-Mulej, Alla tal-ħniena u paċi, biex jeħles lid-dinja minn dil-vjolenza diżumana. Nitolbu flimkien, l-ewwel fis-skiet u wara lill-Madonna.
[Ave Maria…]
Insellem minn qalbi lilkom ilkoll għeżież pellegrini Taljani u minn pajjiżi diversi. Insellem b’mod partikolari lill-membri tal-Assoċjazzjoni Franċiża “Roulons pour l’Espoir”, li ġew bir-roti minn Besançon; lis-sminaristi l-ġodda flimkien mas-superjuri tagħhom, mill-Kulleġġ ‘North America” ta’ Ruma; lill-abbatini minn Rivoltella (Brescia) u lill-adoloxxenti minn Zevio (Verona).
Nawgura lil kulħadd il-Ħadd it-tajjeb. Jekk jgħoġobkom, tinsewx titolbu għalija. Il-pranzu t-tajjeb u arrivederci!
Miġjub
għall-Malti mit-Taljan minn Joe Huber