Għeżież ħuti, il-jum it-tajjeb!
L-Evanġelju ta’ dan it-tieni Ħadd tar-Randan jippreżentalna r-rakkont tat-Trasfigurazzjoni ta’ Ġesù (cfr Mt 17,1-9). Hu ħa miegħu lil tlieta mill-Appostli, Pietru, Ġakbu u Ġwanni u tela’ magħhom fuq muntanja għolja, hemmhekk seħħ dan il-fenomenu singolari: wiċċ Ġesù «idda bħax-xemx u ħwejġu saru bojod bħas-silġ» (v.2). B’hekk, il-Mulej bidel f’dawl jgħammex il-persuna divina tiegħu stess, persuna li tista’ tkun milqugħa bil-fidi fil-predikazzjoni tiegħu u fil-ġesti mirakolużi tiegħu. U fuq il-muntanja, flimkien mat-trasfigurazzjoni, dehru wkoll Mosè u Elija, «li kienu qed jitkellmu miegħu» (v.3).
Il-qawwa tad-dawl li jikkaratteriżża dan l-avveniment straordinarju hu wkoll simbolu tal-għan tiegħu li jdawwal l-imħuħ u l-qlub tad-dixxipli biex ikunu jistgħu jifhmu ċar min hu l-Imgħallem tagħhom. Hi roqgħa dawl li tinfetaħ f’daqqa fuq il-misteru ta’ Ġesù u ddawwal il-persuna tiegħu u l-istorja kollha tiegħu.
Issa, li kien sejjer Ġerusalemm biex ma jerġax lura, fejn kellu jsofri l-kundanna għall-mewt bit-tislib, Ġesù jrid iħejji lil tiegħu għal dan l-iskandlu, - l-iskandlu tas-salib – għal dan l-iskandlu wisq iebes għall-fidi tagħhom, u fl-istess ħin biex iħabbar il-qawmien tiegħu billi jimmanifesta ruħu bħala l-Messija, l-Iben t’Alla. U Ġesù jħejji għal dak il-waqt ta’ tant niket u tant tbatija. Fil-fatt Ġesù kien qed juri ruħu bħala Messija differenti minn dak li kien mistenni, minn dak li kienu qed jimmaġinaw dwar il-Messija, kif kien il-Messija: mhux re setgħani u glorjuż, imma qaddej umli u bla difiża; mhux xi sinjur ta’ għana bla qies, sinjal ta’ barka, imma bniedem fqir li ma kellux fejn imidd rasu; mhux xi patrijarka b’dixxendenza kbira, imma għażeb mingħajr dar u mingħajr bejta. Hu propju r-rivelazzjoni ta’ Alla rasha ‘l isfel, u s-sinjal l-aktar skunċertanti ta’ din ir-rivoluzzjoni huwa s-salib. Imma propju permezz tas-Salib Ġesù jasal għall-qawmien glorjuż, li kelllu jkun definittiv, mhux bħal dit-trasfigurazzjoni li damet ftit waqtiet, leħħa ta’ berqa.
Ġesù trasfigurat fuq il-muntanja Tabor, ried juri lid-dixxipli tiegħu l-glorja tiegħu mhux biex jeħles lilhom mis-salib, imma biex jurihom fejn iwassal is-salib. Min imut ma’ Kristu, ma’ Kristu jerġa’ jqum. U s-salib hu l-bieb tal-qawmien. Min jitqabad flimkien miegħu, iqum miegħu. Dan hu l-messaġġ ta’ tama li fih is-salib ta’ Ġesù, tħeġġiġa biex nibqgħu sodi fl-eżistenza tagħna. Is-salib Nisrani mhux xi vażun fuq biċċa mobbli jew xi tiżjin li jintlibes, imma s-salib Nisrani hu sejħa għall-imħabba li biha Ġesù ssagrifika ruħu biex isalva l-umanità mill-ħażen tad-dnub. F’daż-żmien tar-Randan, nikkuntemplaw bid-devozzjoni x-xbieha ta’ Ġesù Kurċifiss, Ġesù fuq is-salib: huwa s-simbolu tal-fidi Nisranija, hu l-emblema ta’ Ġesù li miet u rxoxta għalina. Ejjew nagħmlu s-Salib punt ta’ kull fażi tal-mixja tagħna tar-Randan biex nifhmu dejjem aħjar il-gravità tad-dnub u l-valur tas-sagrifiċċju li bih ir-Redentur salvana lkoll.
Il-Verġni Mqaddsa għarfet tikkontempla l-glorja ta’ Ġesù moħbija fl-umanità tiegħu. Ħa tgħinna hi nibqgħu miegħu bit-talb fis-skiet, li nħallu l-preżenza tiegħu iddawwalna, biex waqt l-iljieli l-aktar mudlama, inġorru fi qlubna rifless tal-glorja tiegħu.
Wara l-Angelus:
Għeżież ħuti,
Nesprimi l-qrubija tiegħi lejn il-poplu tal-Gwatemala, li jinsab f’luttu minħabba n-nirien kbar u ta’ niket li faqqgħu fid-dar tal-kenn Refugio Virgen de la Asunción, li ħallew vittmi u feruti fost it-tfajliet li jgħammru fiha. Il-Mulej jilqa’ ‘l ruħhom, ifejjaq il-feruti, ifarraġ lill-familji tagħhom imnikktin u lin-nazzjon kollu. Nitlob ukoll, u nitlob likom titolbu miegħi għaż-żgħażagħ kollha tfajliet u ġuvintur vittmi tal-vjolenza, trattament ħażin, sfruttament u gwerrer. Din hi ġerħa, din hi għajta moħbija li jeħtieġ tkun mismugħa minna lkoll li ma nistgħux inkomplu nagħmlu tabirruħna li mhux naraw u mhux nisimgħu.
Nagħti tislima minn qalbi lilkom ilkoll preżenti, fidili minn Ruma u minn tant inħawi tad-dinja.
Insellem lill-pellegrini minn Freiburg u Mannheim, fil-Ġermanja, kif ukoll lil dawk li ġew mill-Libanu u l-maratoneti mill-Portugall.
Insellem lill-gruppi parrokkjali li ġejjin minn Gioiosa Ionica u Pachino; liż-żgħażagħ minn Lodi li qed jitħejjew għall-“Professjoni tal-Fidi”’ lill-istudenti minn Dalmine u Busto Arsizio: hu minnu dak li tgħidu intom: “Le għall-kultura tal-iskart” (kien hemm poster kbir fil-pjazza); u lill-kor taż-żgħażagħ “Goccia doppo Goccia (Qatra wara Qatra) minn Bergamo.
Nawguralkom il-Ħadd it-tajjeb. Jekk jogħġobkom tinsewx titolbu għalija. Il-pranzu t-tajjeb. Arrivederci!
Miġjub għall-Malti mit-Taljan minn Joe Huber