Il-PAPA FRANĠISKU
ANGELUS
10 ta' Novembru,
2019
Għeżież ħuti, il-jum it-tajjeb!
Il-paġna evanġelika tal-lum (cfr Lq
20,27-38) toffrilna tagħlima
stupenda ta' Ġesù dwar il-qawmien mill-imwiet. Xi sadduċej, nies li ma kinux jemmnu bil-qawmien,
jikkonfrontaw lil Ġesù u jipprovokawh b'mistoqsija żlejali: fil-qawmien
mart min se tkun, mara li kienet iżżewġet seba rġiel, kollha aħwa, li wieħed wara l-ieħor ikunu mietu? Ġesù ma jinqabadx fin-nassa u jwieġeb li dawk li jkunu qamu fid-dinja l-oħra "la jżewwġu u lanqas jiżżewwġu: infatti
ma jistgħux imutu aktar għax isiru bħall-anġli, u għax huma wlied il-qawmien huma wkoll ulied
Alla" (vv 35-36). Hekk iwieġeb Ġesù.
B'dit-tweġiba, qabel xejn, Ġesù
jistieden lil min kien qed jisimgħu
- u lilna wkoll - biex jifhem li din id-dimensjoni terrena li qed ngħixu fiha bħalissa mhix l-unika dimensjoni,
iżda hemm oħra li mhix aktar taħt il-madmad tal-mewt u li fiha jkun jidher
ċar li aħna wlied Alla. Nimtlew b'faraġ kbir u tama meta nisimgħu dil-kelma sempliċi ta' Ġesù dwar il-ħajja ta' wara l-mewt; neħtieġuha ħafna speċjalment fi żmienna, tant għani fl-għarfien dwar l-univers imma tant fqir
fl-għerf dwar il-ħajja ta' dejjem.
Din iċ-ċertezza ċara kristall ta' Ġesù dwar il-qawmien tieqaf kollha kemm
hi fuq il-fedeltà ta' Alla, li hu Alla tal-ħajja. Fil-fatt il-mistoqsija tas-sadduċej taħbi mistoqsija oħra ferm aktar profonda:
mhux biss mart min tkun l-armla ta' seba' aħwa, imma ta' min se tkun ħajjitha. Huwa dubju li jmiss
lill-bniedem ta' kull żmien u lilna wkoll: wara dal-pellegrinaġġ fid-dinja,
x'se jsir minn ħajjitna? Se ssir xejn, se tkun tal-mewt?
Ġesù jwieġeb li l-ħajja hi ta' Alla li jħobbna u jinkwieta ħafna għalina, tant illi jorbot
ismu ma' tagħna: huwa "Alla ta' Abraham, Alla ta' Iżakk u Alla ta' Ġakobb. Mhux Alla tal-mejtin imma tal-ħajjin: għax kulħadd jgħix għalih" (vv 37-38). Il-ħajja teżisti kull fejn hemm
rabta, komunjoni, fratellanza; u hija ħajja li tiżboq il-mewt dment li hi mibnija fuq relazzjonijiet
veri u rabtiet ta' fedeltà. Bil-maqlub m'hemmx ħajja fejn hemm il-pretensjoni li bniedem huwa tiegħu
nnifsu u jgħix għalih waħdu, qiesu gżira: f'dawn l-atteġġjamenti toħroġ rebbieħa l-mewt. Huwa l-egoiżmu. Jekk jien ngħix għalija nnifsi, għal rasi, inkun qed niżra'
l-mewt f'qalbi.
Il-Verġni Marija tgħinna ngħejxu kuljum fl-istennija ta' dak li nistqarru fi tmiem il-Kredu: "Nistenna l-qawma mill-imwiet u l-ħajja taż-żmien li ġej". Nistennew dak li ġej wara.
Wara l-Anġelus
Għeżież ħuti,
ilbieraħ fi
Granada, fi Spanja, ġiet
ipproklamata Beata Maria Emilia Riquelme
y Zayas, fundatriċi tas-Sorijiet
MIssjunarji tas-Santissmu Sagrament u ta' Marija Immakulata. U llum fi Braga, il-Portugall, qed
tkun iċċelebrata
l-quddiesa ta' radd il-ħajr għall-kanoniżżazzjoni
ekwivalenti ta' San Bartilmew
Fernandes dei Martiri. Il-Beata l-ġdida
kienet eżemplari fil-ħrara tagħha lejn l-adorazzjoni Ewkaristika u ġeneruża fis-servizz lejn min hu fil-bżonn; filwaqt li l-qaddis il-ġdid kien evanġeliżżatur
kbir u ragħaj ta' niesu. Applaws liż-żewġ Beati l-ġodda!
Indur bi ħsieb speċjali lejn l-għażiż poplu tas-Sudan t'Isfel, li jien se nżuru s-sena d-dieħla. Bil-fakra tal-irtir spiritwali, li għadu frisk f'moħħi, li għamlu
l-awtoritajiet tal-pajjiż,
li sar fil-Vatikan f'April li għadda, nixtieq inġedded l-istedina tiegħi lill-atturi kollha tal-proċess politiku nazzjonali biex ifittxu dak li jgħaqqad u jegħlbu dak kollu li jifred,
fi spirtu ta' fratellanza vera. Il-poplu tas-Sudan t'Isfel sofra wisq
matul dawn l-aħħar
snin u jistenna b'tama kbira t-tmiem tal-kunflitti u paċi dejjiema darba għal dejjem. Għalhekk inħeġġeġ
lil min hu responsabbli biex bla heda
jibqa' jfittex u jimpenja ruħu fi djalogu inklussiv ħalli jinkiseb kunsens għall-ġid tan-nazzjon. Minbarra dan nawgura li l-komunità internazzjonali ma tinsiex takkumpanja lis-Sudan t'Isfel fil-mixja tar-rikonċiljazzjoni nazzjonali. Nistedinkom ilkoll biex titolbu flimkien
għal dal-pajjiż
li jien għandi f'qalbi b'mod partikolari.
(Sliem għalik, Marija..).
Nixtieq li intom titolbu wkoll
għas-sitwazzjoni fil-maħbuba
Bolivja, ġara tal-patrija tiegħi. Nistieden lill-Bolivjani kollha, partikolarment lill-atturi politiċi u soċjali biex jistennew bi spirtu kostruttiv u mingħajr ebda kundizzjonijiet, fi klima ta' paċi u serenità, ir-riżultati tal-proċess
tar-reviżjoni tal-elezzjonijiet
li għaddej bħalissa. Fil-paċi.
Illum fl-Italja qed ikun
iċċelebrat il-Jum
Nazzjonali ta' Radd il-Ħajr għall-frott tal-art u tax-xogħol. Ningħaqad mal-Isqfijiet biex infakkar fir-rabta kbira li hemm bejn
il-ħobż u x-xogħol,
u nawgura li l-politika
tax-xogħol tkun kuraġġuża u tagħti
kas tad-dinjità u s-solidarjetà
u sabiex tilqa' bil-quddiem ir-riskji tal-korruzzjoni. Jalla l-ħaddiema ma jkunux sfruttati, jalla jkun hemm
xogħol għal kulħadd imma xogħol veru mhux xogħol ta' lsira.
Irrodd ħajr lilkom ilkoll li ġejtu minn Ruma, mill-Italja u minn tant
inħawi tad-dinja. Insellem lill-pellegrini minn Haaren (il-Ġermanja), minn Darwin (l-Awstralja) u lill-istudenti minn Neuilly (Franza); kif ukoll
lill-fidili mid-Djoċesi
ta' Piacenza-Bobbio, lil dawk minn Bianzè
u minn Burano.
Nawgura lil kulħadd il-Ħadd it-tajjeb. Jekk jogħġobkom tinsewx titolbu għalija. Grazzi. L-ikla t-tajba u arrivederci!
Miġjub għall-Malti
mit-Taljan minn Joe Huber