Għeżież ħuti,
B’niket riċevejt l-aħbar dwar il-konsegwenzi gravi mħollija mill-uragan li fil-ġranet li għaddew laqat lill-Karajbi, partikolarment lil Ħaiti, u li ħalla warajħ bosta vittmi u nies bla dar, minbarra li kkawża ħsarat materjali bla qies. Nagħti l-assikurazzjoni tiegħi li ninsab qrib il-poplu u nesprimi t-tama fis-sens li jsibu s-solidarjtà tal-Komunità Internazzjonali, l-istituzzjonijiet Kattoliċi u l-persuni ta’ rieda tajba. Nitlobkom tingħaqdu miegħi fit-talb għal dawn ħutna milqutin tant iebes.
Ilbieraħ f’Oviedo (Spanja) ġew dikajarati Beati s-saċerdot Gennaro Fueyo Castañón flimkien ma’ tliet fidili lajċi. Niżżu ħajr lill-Mulej għal dawn ix-xhieda erojċi tal-fidi, li daħlu mal-qtajja tal-martri li offrew ħajjithom f’isem Kristu.
Nagħti tislima minn qalbi lilkom ilkoll, għeżież pellegrini, li ħadtu sehem f’dal-Ġublew Marjan. Grazzi tal-preżenza tagħkom! Magħkom irid intenni l-kliem li qal San Ġwanni Pawlu II nhar it-8 ta’ Ottubru, 2000, meta kien qed jagħmel l-att ta’ affidament ġjubilari lil Marija: «Omm tagħna, irridu nerħu f’idejk il-futur li qed jistenniena. L-umanità tista’ tagħmel ġnien minn did-dinja jew inkella tirriduċieha f’rovina sħiħa». F’dan salib it-toroq, il-Verġni tgħinna nagħżlu l-ħajja billi nilqgħu u nqiegħdu fil-prattika l-Evanġelju ta’ Kristu Salvatur.
Miġjub għall-Malti mit-Taljan minn Joe Huber