Għeżież ħuti, il-jum it-tajjeb!
Il-liturġija ta’ dan il-Ħadd ittina l-parabbola tal-ħaddiema tal-għalqa tad-dwieli, li lilhom is-sid kien afdalhom f’idejhom id-dwieli li kien żergħa u mbagħad telaq (cfr Mt 21, 33-43). B’hekk qed tgħaddi mil-prova l-lealtà ta’ dawn il-ħaddiema: l-għalqa hi afdata lilhom, għandhom jieħdu ħsiebha, jaħdmuha biex tagħmel il-frott biex imbagħad dak li jinħasad jingħata lis-sid. Meta wasal iż-żmiem tal-ħsad tal-għeneb, is-sid jibgħat lill-qaddejja tiegħu biex jiġbru l-frott. Iżda l-ħaddiema jieħdu atteġġjament possessiv: ma jħossuhomx sempliċi impjegati, imma sidien, u jirrifjutaw li jtuhom dak li ħasdu. Lill-qaddejja jittrattawhom ħażin tant li joqtluhom. Is-sid juri li jieħu paċenzja bihom: jibgħat aktar qaddejja, f’għadd akbar minn ta’ qabel, imma r-riżutat jibqa’ l-istess. Fl-aħħar, bil-paċenzja tiegħu kollha, jaqtagħha li jibgħat lil Ibnu; imma dawk il-ħaddiema, ilsira tal-imġieba possessiva tagħhom, joqtlu lill-iben ukoll għax jaħsbu li kienu se jirtu l-għalqa huma.
L-urġenza li nwieġbu bil-frott tajjeb għas-sejħa tal-Mulej titlob minna, li aħna nsiru l-għalqa tad-dwieli tiegħu, tgħinna nfihmu x’hemm ġdid u oriġinali fil-fidi Nisranija. Din mhix għaqda ta’ preċetti u regoli morali, imma qabel kollox hi proposta ta’ mħabba li permezz ta’ Ġesù, Alla kien jagħmel, u għadu jagħmel lill-umanità. Hi stedina biex nidħlu f’din l-istorja ta’ mħabba, u nisru dielja ħajja u miftuha, għanja bil-frott u t-tama għal kulħadd. Għalqa magħluqa tista’ ssir selvaġġa u tagħti għeneb selvaġġ. Aħna msejħin biex noħorġu mill-għalqa sabiex inkunu ta’ servizz għal ħutna li mhumiex magħna, biex inċaqalqu lil xuxlin u nikoraġġixxu lil xulxin, biex infakkru lil xulxin li għandna nkunu d-dielja tal-Mulej f’kull ambjent, anki f’dawk li huma l-aktar imbegħeda u ta’ sfida.
Għeżież ħuti, insejħu l-interċessjoni ta’ Marija Santissma biex tgħinna nkunu d-dielja li l-Mulej żergħa għal-ġid ta’ kulħadd u biex nferrgħu l-inbid tajjeb tal-ħniena tal-Mulej, speċjalment fil-periferiji tas-soċjetà.
Wara l-Angelus
Għeżież ħuti,
ilbieraħ f’Milan ġie dikjarat beatu patri Arsenio da Trigolo (imwieled Giuseppe Migliavacca), saċerdot tal-patrijiet minuri kapuċċini u fundatur tas-Sorijiet ta’ Marija Santissma Konsolatriċi. Infaħħru l-Mulej għal dan id-dixxiplu umli tiegħu, li fil-kuntrarju u wkoll u waqt il-prova – għadda minn ħafna u ħafna – qatt ma tilef it-tama.
Insellem minn qalbi lilkom, pellegrini, l-aktar lill-familji, lill-gruppi parrokkjali li ġejjin mill-Italja u minn diversi nħawi tad-dinja. Partikolarment: lill-fidili mill-Awstralja, minn Franza u mis-Slovakkja, kif ukoll lil dawk li ġejjin mill-Polonja, li jingħaqdu spiritwalment mal-konnazzjonali tagħhom li llum qed jiċċelebraw Il-Jum tal-Papa.
Insellem b’imħabba lilkom, il-grupp tas-Santwarju tal-Madonna ta’ Fatima minn Città del Pieve, akkumpanjati mill-Kardinal Gualtiero Bassetti: għeżież ħuti, nikuraġġikom biex tibqgħu mexjin il-mixja tal-fidi tagħkom bil-ferħ, taħt il-ħarsa mimlija ħrara u tenera ta’ omma ċelesti: Hi r-rifuġju tagħna u t-tama tagħna! Ibqgħu mexjin.
Insellem lill-fidili minn Grumo Appula, l-iskawts minn Gioiosa Ionica, il-kor parrokkjali minn Siror (Trento) u liż-żgħażagħ li se jagħmlu l-Griżma minn San Teodoro (Sardinja).
Nawgura lilkom ilkoll il-Ħadd it-tajjeb. Jekk jogħġobkom tinsewx titolbu għalija. Il-pranzu t-tajjeb u arrivederci!
Miġjub għall-Malti mit-Taljan minn Joe Huber