Għeżież ħuti, il-jum it-tajjeb!
Illum niċċelebraw l-Epifanija tal-Mulej, jiġifieri l-manifestazzjoni ta’ Ġesù li jiddi bħal dawl għall-ġnus kollha. Is-simbolu ta’ dan id-dawl li jiddi fid-dinja u jrid idawwal il-ħajja ta’ kull bniedem hija l-kewkba li mexxiet lill-Maġi lejn Betlem. L-Evanġelju jgħidilna li huma «raw tfiġġ il-kewkba tiegħu» (Mt 2,2) u qatugħa li jimxu warajha: għażlu li jħallu l-kewkba ta’ Ġesù tmexxihom.
Fil-ħajja tagħna wkoll hemm ħafna kwiekeb, dwal li jilmaw u jorjentaw. Jiddependi minna wara liema minnhom irridu nimxu. Per eżempju, hemm dwal li jixegħlu u jitfu, li jiġu u jmorru, bħalma jagħmlu s-sodisfazzjonijiet żgħar tal-ħajja: anki jekk ikunu tajbin, mhumiex biżżejjed, għax jintemmu f’ħakka t’għajn u ma jħallux fina l-paċi li nkunu qed infittxu. Hemm imbagħad, id-dwal li jgħammxu, dawk tal-palk, il-flus u s-suċċess, li jwiegħdu kollox u malajr: jisseduċuk, imma l-qawwa tagħhom tgħamik u minħabba fihom tgħaddi mill-ħolm tal-glorja għad-dlam taqtgħu b’sikkina. Imma l-Maġi jistiednuna għal mixja wara dawl stabbli, dawl ġentili, li qatt ma jnin għax mhux ta’ did-dinja: jiġi mis-sema u jiddi.. fejn? Fil-qalb.
Dan id-dawl veru hu d-dawl tal-Mulej, jew aħjar, hu l-Mulej innifsu. Huwa d-dawl tagħna: dawl li ma jgħammixx, imma jakkumpanja u jagħti ferħ uniku. Dan hu dawl għal kulħadd u jsejjaħ lil kulħadd: b’hekk nistgħu nisimgħu is-sejħa tal-istedina li l-Profeta Iżaija jagħmlilna llum: «Qum, imtela bid-dawl» (60,1). Hekk kien jgħid Iżaija meta kien jipprofetiżża dan il-ferħ tal-lum f’Ġerusalemm: «Qum, imtela bid-dawl». Kuljum fil-bidu tal-ġurnata nistgħu nilqgħu din l-istedina: qum, imtela bid-dawl, illum, fost il-bosta meteoriti tad-dinja, imxi wara l-kewkba tad-dawl ta’ Ġesù! Meta nimxu warajha, inħossu l-ferħ, kif ġralhom il-Maġi, li «malli lemħu l-kewkba imtlew b’ferħ kbir» (Mt 2,10), għax fejn hemm Alla hemm il-ferħ. Min iltaqa’ ma’ Ġesù ħass fih il-miraklu tad-dawl li jċarrat id-dlamijiet u jifhem x’inhu dan id-dawl li jdawwal u jnebbaħ. Nixtieq, b’rispett kbir, nistieden lil kulħadd biex ma jibżax minn dan id-dawl u jinfetaħ għall-Mulej. Fuq kollox, irrid ngħid li min tilef il-forza li jfittex, lil min hu għajjien, lil min, għax mgħarraq mid-dlamijiet tal-ħajja, intfietlu kull xewqa: qum, kuraġġ, id-dawl ta’ Ġesù jaf jegħleb l-iswed dlamijiet; qum, kuraġġ!
U kif jinstab dad-dawl divin? Nimxu fuq l-eżempju tal-Maġi li l-Evanġelju jiddeskrivihom bħala persuni dejjem f’moviment. Infatti, min irid id-dawl, joħroġ minnu nnifsu u jfittex: ma jibqax fl-għeluq, wieqaf iħares lejn dak li qed jiġri madwaru, imma jirriskja ħajtu; joħroġ minnu nnifsu. Il-ħajja Nisranija hi mixja bla waqfien, magħmula mit-tama’, mixja li, bħal tal-Maġi, tibqa’ għaddejja wkoll meta għal xi waqt il-kewkba tinħeba, ma narawhiex aktar. F’dil-mixja hemm perikli li għandhom ikunu evitati: it-tlablib superfiċjali u mondan, li jtaqqal il-pass; il-kapriċċi tal-egoiżmu li jipparaliżża; il-ħofor tal-pessimiżmu li huma nassa għat-tama. Dawn l-ostakli mblukkaw lill-Iskribi, li jkellimna dwarhom l-Evanġelju tal-lum. Huma kienu jafu fejn kien id-dawl imma ma ċċaqalqux. Meta Erodi jistaqsiehom: “Fejn għandu jitwieled il-Messija?” – “F’Betlem!” Kienu jafu fejn imma baqgħu ma ċċaqalqux. Il-kuxjenza tagħhom kienet frivola, kienu jafu ħafna affarijiet, imma kollu ta’ xejn, kollox fil-vojt. Mhux biżżejed l-għarfien li Alla twieled, jekk miegħu ma jsirx il-Milied fil-qalb. Alla twieled, hu minnu, imma f’qalbek twieled? Twieled f’qalbi? U hekk insibuH, bħalma sabuh il-Maġi, ma’ Marija u Ġużeppi, fl-istalla.
Il-Maġi dan għamlu: wara li sabu lit-Tarbija «inxteħtu minn tulhom u adurawHa» (v.11). Ma ħarsux lejHa biss, ma qalux biss xi talba taċ-ċirkostanza u telqu ‘l hemm, le, imma adurawHa; daħlu f’komunjoni personali ta’ mħabba ma’ Ġesù. Imbagħad tawh id-deheb, l-inċens u l-mirra, l-aktar ħwejjeġ prezzjużi li kellhom. Nitgħallmu mill-Maġi biex lil Ġesù ma ntuhx biss loqom ta’ ħin jew xi ħsieb dwaru kultant, għax inkella ma jkollniex id-dawl tiegħu. Bħall-Maġi, ejjew nitilqu f’mixja, ejjew nilbsu dan id-dawl aħna u mexjin wara l-kewkba ta’ Ġesù, u naduraw lill-Mulej bl-essri tagħna kollu.
Wara l-Angelus:
Għada, il-komunitajiet ekkleżjali tal-Orjent li jimxu fuq il-kalendarju Ġuljan se jiċċelebraw il-Milied Imqaddes. Bi spirtu ta’ fraternità ferrieħa nawgura li t-twelid mill-ġdid tal-Mulej Ġesù jimliehom bid-dawl u l-paċi.
L-Epifanija hi l-Jum tal-Infanzja Missjunarja. Nagħti kuraġġ lit-tfal kollha u liż-żgħażagħ li f’tant inħawi tad-dinja huma impenjati biex iwasslu l-Evanġelju u biex jgħinu lil min hu tamparhom li jinsab f’xi diffikultà. Insellem lil kull min illum ġie (mir-reġjuni) mill-Lazio, mill-Abruzzo u mill-Molise u nirringrazzja lill-Opra Pontifiċja tal-Infanzja Missjunarja għas-servizz edukattiv li tagħti.
Insellem lill-parteċipanti li qed jieħdu sehem fil-kortejo storiku/folkloristiku li dis-sena hu dedikat għall-artijiet tal-Umbria tan-nofsinhar u li għandu l-għan li jferrex il-valuri tas-solidarjetà u l-fratellanza.
Insellem lill-gruppi li ġew minn Malta, minn California u mill-Polonja; u nagħti l-barka tiegħi lill-parteċipanti tal-Kortejo tar-Re Maġi li jsir ġo Varsavja bil-parteċipazzjoni ta’ bosta familji u bosta tfal.
Insellem lill-fidili minn Ferrara, Correggio, Ruvo di Puglia, Robecco sul Naviglio u Cucciago; kif ukoll li dawk li se jagħmlu l-konfermazzjoni minn Rosolina u Romano di Lombardia, lill-ministranti tad-djoċesi ta’ Asti, liż-żgħażagħ minn Cologno al Serio, u lill-ħbieb u volontarji tal-Fraterna Domus.
Il-Maġi joffru lil Ġesù r-rigali tagħhom, imma fir-realtà Ġesù stess hu l-veru don ta’ Alla: infatti Huwa hu Alla li jingħata għalina, fiH aħna naraw il-wiċċ mimli ħniena tal-Missier li qed jistenniena, jilqagħna, jaħfrilna dejjem; il-wiċċ ta’ Alla li qatt ma jimxi magħna skont dak li nagħmlu, skont dnubietna, imma biss skont l-immensità tal-ħniena bla tarf tiegħu. U la qed nitkellmu dwar ir-rigali jien ukoll ħsibt li nagħtikom rigal żgħir... m’hawnx iġmla, imma se ntikom rigal. Il-ktejjeb “Ikoni tal-Ħniena”. Ir-rigal ta’ Alla hu Ġesù, il-ħniena t’Alla; u għalhekk, bħala tifkira ta’ dar-rigal ta’ Alla, se ntikom dar-rigal li se jitqassmilkom mill-foqra, minn min m’għandux saqaf u mir-rifuġjati flimkien ma’ volontiera u reliġjużi li nsellmilhom bil-ħerqa u nirringrazzjahom minn qiegħ qalbi.
Nawguralkom sena ta’ ġustizzja, maħfra, serenità, imma fuq kollox sena ta’ ħniena. Dan il-ktejjeb jgħinkom tagħmlu dan: jidħol fil-but, tistgħu ġġorruh magħkom.
Jekk jogħġobkom, tinsewx ittuni intom ukoll ir-rigal tat-talb tagħkom. Il-Mulej iberikkom. Il-festa t-tajba, il-pranzu t-tajjeb u arrivederci!
Miġjub għall-Malti mit-Taljan minn Joe Huber