IL-PAPA FRANĠISKU
ANGELUS
Pjazza
San Pietru
3 ta' Novembru,
2019
Għeżież ħuti, il-jum it-tajjeb!
L-Evanġelju tal-lum (cfr Lq
19,1-10) iqiegħdna mal-folla
miexja wara Ġesù hu u tiela lejn Ġerusalemm u jieqaf f'Ġeriko. Kien hemm folla
kbira tilqgħu, fosthom raġel jismu Żakkew, kap tal-pubblikani, jiġifieri dawk il-Lhud li kienu jiġbru t-taxxi f'isem l-imperu Ruman. Hu kien għani mhux minħabba qligħ onest imma għax kien jitlob
"commission" ħaġa li kienet iżżid id-disprezz lejh. Żakkew xtaq jara lil
Ġesù (v. 3); ma kellux
ħsieb jitlaqa' miegħu, imma kien mimli kurżità:
ried jara lil dak il-persunaġġ
li dwaru kien sama' ħwejjeġ straordinarji. Kellu kurżità. U billi kien qasir
"biex ikun jista' jarah" (v. 4), tela' ma' siġra. meta Ġesù jersaq qrib, jerfa'
ħarstu u jarah (cfr v. 5).
Dan huwa importanti: l-ewwel ħarsa ma kinitx ta' Żakkew, iżda ta' Ġesù, minn fost il-bosta uċuħ
ta' madwaru - il-folla -, fittex propju dak. Il-ħarsa ħanina ta' Ġesù tasal fuqna qabel
ma aħna nindunaw li neħtieġuha biex inkunu salvi. U b'dil-ħarsa tal-Imgħallem Divin jibda l-miraklu tal-konverżjoni tal-midneb. Infatti Ġesù jsejjaħlu, u jsejjaħlu b'ismu: "Żakkew inżel minnufih għax illum jeħtieġli noqgħod għandek"
(v. 5). Ma jċanfrux,
ma jagħmillux 'prietka';
jgħidlu li 'ried' imur għandu: 'jeħtieġ', għax dik hi r-rieda tal-Missier. Minkejja t-tgemgim tan-nies Ġesù jagħżel li joqgħod fid-dar ta' dak il-midneb pubbliku.
Aħna wkoll konna nieħdu skandlu minn din l-imġieba ta' Ġesù. Iżda d-disprezz u l-għeluq lejn il-midneb ma jagħmlu xejn aktar ħlief
jiżolawh u jwebbsu fih id-deni li jkun qed jagħmel
kontra tiegħu nnifsu u kontra l-komunità. Minflok, Alla jikkundanna
d-dnub imma jipprova jsalva lill-midneb, imur ifittxu biex ireġġgħu
lura lejn it-triq it-tajba. Min qatt ma ħassu mfittex mill-ħniena t'Alla jsibha bi tqila jifhem il-kobor straordinarju tal-ġesti u tal-kliem li bihom Ġesù jersaq lejn Żakkew.
L-akkoljenza u l-attenzjoni ta' Ġesù lejn Żakkew, lil dan iwassluh biex jagħmel bidla sħiħa fil-mentalità tiegħu: f'ħakka t'għajn jinduna kemm hi miżera l-ħajja mirkuba mill-flus li tasal tisraq lin-nies u t-tirċievi t-tmaqdir tagħhom. Il-fatt li kellu lill-Mulej
f'daru iġegħelu jibda' jara b'għajnejn
differenti, ukoll bi ftit mit-tenerezza li biha kien ħares
lejh Ġesù. U jibdel ukoll il-mod kif
iħares lejn u juża l-flus: l-attitudni tal-ħtif tinbidel f'dik ta' għotja. Infatti jaqtagħha li jagħti nofs ġidu lill-foqra u li jrodd erba' darbiet aktar
lil min kien seraq (cfr v. 8). Minn Ġesù Żakkew jiskopri li huwa possibbli tħobb bil-gratwità: sa dak il-ħin kien xħiħ, issa sar ġeneruż,
kellu l-kilba li jaħżen, issa qed isib il-ferħ
filli jqassam. Fil-laqgħa
mal-imħabba jiskopri
li minkejja dnubietu, kiseb il-ħila li jħobb lill-oħrajn u
l-flus bidilhom f'sinjal
ta' solidarjetà u komunjoni.
Il-Verġni Marija taqlgħalna l-grazzja li nġarrbu dejjem aktar fuqna
l-ħarsa ta' ħniena
ta' Ġesù, biex bil-ħniena niltaqgħu
ma' min żbalja ħalli
huma wkoll ikunu jistgħu jilqgħu għandhom lil Ġesù li ġie "biex ifittex u jsalva lill-mitluf" (v. 10).
Wara l-Angelus
Għeżież ħuti,
inħossni mnikket minħabba l-vjolenza li qed iġarrbu l-insara tal-Knisja Ortodossa Tewahedo fl-Etjopja. Nesprimi l-qrubija kollha tiegħi lejn dil-Knisja u l-Patrijarka tagħha, l-għażiż ħija
Abuna Matthias, u nistedinkom titolbu
għall-vittmi kollha tal-vjolenza li hemm f'din l-art.
Nitolbu flimkien: "Sliem
għalik, Marija....".
Nixtieq irrodd ħajr minn qiegħ qalbi lill-Komun u lid-Djoċesi ta' San Severo
fil-Puglia talli nhar it-Tnejn 28 ta' Ottubru ffirmaw il-Protokoll ta' Ftehim li lill-ħaddiema tal-id ta' dawk li jissejħu "caporalati"
fiż-żona ta' Foggia, jiksbu
kenn fil-parroċċi
u jkunu jistgħu ikunu reġistrati fil-insinwa tal-komun. Il-possibbiltà li jkollhom dokument ta' identifikazzjoni u ta' residenza toffrilhom dinjità ġdida u tgħinhom jinħelsu mill-kundizzjoni
ta' irregolarità u sfruttament. Grazzi kbira lill-Komun u lil dawk kollha
li ħadmu biex twettaq dal-pjan.
Insellem minn qalbi lilkom ilkoll, Rumanii u pellegrini . Insellem partikolarment lill-Korporazzjonijiet Storiċi
ta' Schützen u tal-Kavallieri
ta' San Bastjan ġejjin
minn diversi pajjiżi tal-Ewropa; u lill-fidili minn Lordelo de Ouro (il-Portugall).
Insellem lill-pellegrini minn
Reggio Calabria, Treviso, Pescara e Sant’Eufemia di Aspromonte; insellem lill-adoloxxxenti minn Modena li rċevew is-Sagrament tal-Griżma, lil dawk minn Petosino
fid-djoċesi ta' Bergamo u lil-iScouts
li ġew bir-roti minn Viterbo. Insellem lill-membri tal-Moviment Hakuna minn Spanja.
Nawgura lil kulħadd il-Ħadd it-Tajjeb. Jekk jogħġobkom tinsewx titolbu għalija. L-ikla t-tajba u arrivederci!
Miġjub għall-Malti
mit-Taljan minn Joe Huber