Għeżież ħuti,il-Ħadd it-tajjeb!!
Il-liturġija tal-lum, it-tieni Ħadd wara l-Milied, ittina l-prologu tal-Evanġelju ta’ San Ġwann li fih hemm iddikjarat li «Il-Verb – jew il-Kelma ħallieqa ta’ Alla – sar bniedem u ġie jgħammar fostna» (Ġwanni 1,14). Dik il-Kelma li tgħammar fis-sema, jiġfieri fid-dimensjoni ta’ Alla, ġiet fid-dinja biex aħna nisimgħuha u nsiru nafuha, immisu b’idejna l-imħabba tal-Missier. Il-Verb t’Alla hu l-istess Ibnu l-Waħdieni, magħmul bniedem, mimli mħabba u fedeltà (cfr Ġwanni 1,14), huwa Ġesù nnifsu.
L-Evanġelista ma jaħbix id-drammatiċità tal-Inkarnazzjoni ta’ Iben Alla, u jisħaq li r-rigal tal-imħabba t’Alla hi kuntrast maċ-ċaħda tal-bnedmin. Il-Kelma hi dawl, madankollu l-bnedmin għażlu d-dlam; il-Kelma niżlet fost tiegħu iżda huma ma laqgħuhiex (cfr vv. 9-10). Għalqu l-bieb f’wiċċ l-Iben t’Alla. Hu l-misteru tal-ħażen li jhedded anki ‘l ħajjitna u li jitlob minna li nishru u noqgħodu attenti biex ma jegħlibniex. Il-Ktieb tal-Ġenesi għandu sentenza sabiħa li biha nifhmu dan: jgħid li l-ħażen jinsab “jissajja wara biebna” (4,7). Gwaj għalina jekk inħalluh jidħol: b’hekk ikun hu li jagħlaq il-bieb tagħna għal kulħadd, hu min hu. Iżda aħna msejħin biex niftħu beraħ il-bieb ta’ qalbna għall-Kelma t’Alla, għal Ġesù, biex insiru wliedu.
Fil-jum tal-Milied kien diġà xxandar dan il-bidu tal-Evanġelju ta’ Ġwanni; illum qed jittenna. Hu l-istedina ta’ Ommna l-Knisja Mqaddsa biex nilqgħu din il-Kelma tas-salvazzjoni, dan il-misteru ta’ dawl. Jekk nilqugħ, jekk nilqgħu ‘il Ġesù, nikbru fl-għarfien u fl-imħabba tal-Mulej, nitgħallmu kif inħennu bħalU. Speċjalment f’din is-Sena tal-Ħniena, inqisu li L-Evanġelju jsir dejjem aktar laħam f’ħajjitna. Nersqu lejn l-Evanġelju, nimmeditawh, ninkarnawh fil-ħajja ta’ kuljum għax dan hu l-aħjar mod biex bih insiru nafu lil Ġesù u nwassluh lill-oħrajn. Din hi l-vokazzjoni u ferħ ta’ kull mgħammed: li juri u jagħti ‘l Ġesù lill-oħrajn; imma biex nagħmlu dan jeħtieġ inkunu nafuh u li jkun jinsab ġo fina, ikun is-Sid ta’ ħajjitna. U Hu jiddefedina mill-ħażen, mix-xitan li dejjem jinsab jissajja quddiem biebna, quddiem qalbna, u jrid jidħol.
B’entużjażmu mġedded ta’ abbandun filjali, nintlequ mill-ġdid f'idejn Marija: f’dawn il-jiem tal-presepju nikkuntemplaw ix-xbieha ħelwa tagħha ta’ omm ta’ Ġesù u ommna.
Wara l-Angelus:
Għeżież ħuti,
Insellem minn qalbi lilkom fidili minn Ruma u pellegrini li ġejtu mill-Italja u minn pajjiżi oħra. Insellem lill-familji, lill-assoċjazzjonijiet, il-gruppi parrokkjali, partikolarment dak li ġej minn Monzambano, liż-żgħażagħ minn Bonate li se jagħmlu l-Griżma u liż-żgħażagħ minn Maleo.
F’dan l-ewwel Ħadd tas-sena nġedded l-awguri ta’ paċi u ġid fil-Mulej. Fil-waqtiet hienja u f’dawk ta’ niket, nintelqu f’idejh, Hu li hu l-ħniena tagħna u t-tama tagħna! Infakkar ukoll fl-impenn li ħadna fl-ewwel tas-sena, il-Jum Dinji tal-Paċi: “Irbaħ l-indifferenza u ikseb il-paċi”; bil-grazzja t’Alla nistgħu nqiegħdu dan fi-seħħ. U nfakkar ukoll fil-parir li tajtkom kemm-il darba: ta’ kuljum aqraw silta mill-Evanġelju, pass mill-Evanġelju, biex issiru tafu lil Ġesù aħjar, biex niftħu qlubna għal Ġesù, u b’hekk inkunu nistgħu nwassluh aħjar lill-oħrajn. Inżommu kopja ċkejkna tal-Evanġelju fil-but, fil-basket: jagħmlilna tajjeb. Tinsewx, naqraw kuljum pass mill-Evanġelju.
Nawuguralkom il-Ħadd it-tajjeb u l-ikla t-tajba. U jekk jogħġobkom, jekk jogħġobkom, tinsewx titolbu għalija. Arrivederci.
Miġjub għall-Malti mit-Taljan minn Joe Huber